Samuweli Oopacerya

25 Nuuvira okathi Samuweli+ aahikhwa. Nto aisarayeli ootheene yaahithukumana wiira amunlele, nave yaahinvitha owannyawe oRama.+ Moottharelana Davidi aahivenya, onarowa woothakoni wa oParani.

2 Aahikhala mulopwana mmosa oMawoni,+ aavara muteko oKarmelo.*+ Mulopwana owo aari oothaaciri vanceene. Aahikhalana ipwittipwitthi 3.000 ni ipuri 1.000, nave aanimettha ipwittipwitthi sawe oKarmelo. 3 Mulopwana owo aihaniwa Nabali,+ vano mwaarawe aihaniwa Abigayili.+ Mwaarawe owo aari a miruku ni ooreera, masi iyawe, yoowo aari a emusi ya Kalebi,+ aari ootakhala ni oowali.+ 4 Davidi aahiiwa ori ene woothakoni wiira Nabali aamettha ipwittipwitthi sawe. 5 Davidi aahaaruma alopwana 10 wiira arowe wa Nabali. Davidi aahaaleela alopwana awo wiira: “Murowe oKarmelo, mwamphwanya Nabali, mwamukohe ihaali ni nsina naka. 6 Mwamuhimeerye wiira: ‘Mukhaleke mahiku manceene, nave murettele okhale ni nyuwo vamosa ni atthu a etthoko anyu, ni itthu sanyu sootheene. 7 Kihiiwa wiira munimettha ipwittipwitthi sanyu. Okathi amakampusi anyu yaari aya ni hiyo, khinaawiirinhe etthu yootakhala,+ nave khiivo etthu yaarimenle okathi wootheene yaari aya oKarmelo. 8 Mwaakohe arumeyi anyu, animooleelani. Nwaakhele alopwana awo vooreerela murima, okhala wiira niphiyale okathi wooreerela.* Xontte mwaavahe arumeyi anyu ni mwaninyu Davidi ele eniwerya anyu waavaha’”.+

9 Arumeyi a Davidi yaahimuleela Nabali moolumo ootheene a Davidi. Okathi yaamalinhe aya, 10 Nabali aahiwaakhula arumeyi a Davidi oriki: “Davidi ti pani? Mwaana a Yese ti pani? Mahiku ala khareere anamuteko anitthyawa wa mapatarau aya.+ 11 Xeeni kaarowaka okuxa ephaawu aka, maasi aka ni enama kaarowa aka waavaha anamuteko aka, wiira kaavahe atthu kihinisuwela aka onikhuma aya?”

12 Nto arumeyi a Davidi yaahitthika ni yaahimuleela moolumo ootheene a Nabali. 13 Moowaakuveya Davidi aahaahimeerya arumeyi awe wiira: “Ootheene anyu mukuxase ispaata sanyu!”*+ Vano ootheene aya yaahikuxa ispaata saya ahela muyuununi opuro onikhala aya, nave Davidi aahipaka etthu emosa-ru. Alopwana oowiiraka 400 yaahirowa ni Davidi, vano alopwana 200 yaahihalana miritti.

14 Nto mmosa a arumeyi a Nabali aahimuleela Abigayili, mwaara a Nabali wiira: “Davidi ohaaruma arumeyi awe akhumaka woothakoni omukoha ihaali pwiya ahu, masi owo ohaaruwana.+ 15 Alopwana awo yaahinireerela murima vanceene. Awo khiyaaniirinhe etthu yootakhala, nave khiivo etthu yaanirimenle okathi wootheene naari ahu naawo woothakoni.+ 16 Awo yaalikana ni exiri yaanikhapelela, othana ni ohiyu, okathi wootheene naari ahu naawo nilyihaka inama. 17 Vano muupuwele ele enrowa anyu opaka, okhala wiira anoomukhumelela maxakha patarau ahu ni atthu ootheene a etthoko awe.+ Tthiri owo mulopwana ohirina efaita,+ nave khuuvo onwerya olavula nuuwo”.

18 Moowaakuveya, Abigayili+ aahikuxa iphaawu 200, mirinki miili suulupale soosareya eviinyu, ipwittipwitthi ithanu soohitiwa, isaakho ithanu* sa ipyo soowaarikiwa, ipoolu 100, ni ipoolu 200 sa ifiiku soonyakattiwa, aareya apuuru.+ 19 Nto owo aahaaleela arumeyi awe wiira: “Muhooleke, miyo kinimoottharakani ottuli”. Masi, Abigayili khaamulenle etthu iyawe, Nabali.

20 Abigayili aahinwela puuru awe onarowa, masi Davidi ni arumeyi awe, yaawo yaarwa ohoolo wawe, khiyaawerya omoona okhala wiira aari wiithela wa mwaako. Nto Abigayili aahikumana naawo. 21 Davidi aanihimya wiira: “Kikhapelenle mahala ene mireerelo sa mulopwana ole woothakoni. Khiivo nnakhala etthu emosa yaamurimenle,+ masi yena ookittikiherya etthu yootakhala nnaamwi kimwiirenle ene etthu yooreera.+ 22 Kaahimwiive Nabali ni atthu awe meelo voosiisu, Muluku aahukhumu vanceene awanani aka”.

23 Okathi Abigayili aamoonale awe Davidi, moowaakuveya aahikhuruwa vapuuruni vawe, okokhora ohoolo wa Davidi, uuramaka mpakha vathi. 24 Abigayili aahimwaattamela Davidi onamuhimeerya wiira: “Pwiyaka, mulattu owo okimorele miyo. Mmweemererye murumeyi anyu ola mwaamuthiyana, olavule ni nyuwo. Nwiriyane moolumo a murumeyi anyu ola. 25 Xontte, pwiyaka, muhimuthokorerye mulopwana owo ohirina efaita, Nabali,+ okhala wiira owo onlikana ni nsina nawe. Nsina nawe ti Nabali,* ololo ori ni yoowo. Masi, miyo murumeyi anyu nkaawenhe alopwana mwaarumme anyu. 26 Vano, pwiyaka, ntoko siisaale Yehova onikhala awe, ni nyuwo munikhala anyu, Yehova tookhoottihenryeni+ okhalana mulattu mwaha wa omwiiva mutthu,+ ni opaka exariya ni matata anyu. Ele enimwiiraneela Nabali, ewiiraneele awanani anyu, ni ale aniphavela owiirihani etthu yootakhala. 27 Iya soovaha+ murumeyi anyu oruuhale awe, mwaavahe alopwana muneettana anyu.+ 28 Xontte, mulevelele soottheka sa murumeyi anyu, okhala wiira Yehova ononvaha pwiya aka etthoko ya mahiku manceene,+ maana pwiya aka oniwana ikhotto sa Yehova,+ nave khiivo etthu yootakhala opanke awe, mahiku ootheene a okumi awe.+ 29 Okathi mutthu onoolupatthaaweni ni oniphavela awe owiivani, okumi anyu onoosukiwa ni Yehova Muluku anyu, mmurupani mwa okumi, masi okumi wa awanani anyu, onooriheliwa otteiwene, ntoko maluku anivonyiwa ni fiska. 30 Okathi Yehova onrowa awe owiirelani itthu sooreera ooleihenryaaweni ni wookhalihani muhooleli a Isarayeli,+ 31 khamunrowa oriipiwa murima nnakhala othanana mwaha woomwiiva mutthu vahimulattu, aahiiso mwaha woopaka exariya ni matata anyu.+ Okathi Yehova onrowa awe owiirelani itthu sooreera, mmuupuwele murumeyi anyu ola”.

32 Nto Davidi, aahimuhimeerya Abigayili wiira: “Ottottopeliwe Yehova, Muluku a Isarayeli, yoowo oorummeni orwa okumana ni miyo olelo! 33 Ottottopeliwe Muluku mwaha wa miruku sanyu! Muluku ooreeliheni mwaha wa okikhoottiherya nihiku nla, okhalana mulattu mwaha wa omwiiva mutthu+ ni opaka exariya ni matata aka. 34 Kinnimulaphela Yehova, Muluku a Isarayeli, yoowo okikhoottihenrye owiirihani etthu yootakhala,+ mwahaarwaale moowaakuveya okumana ni miyo,+ mpakha meelo voosiisu, khuuvo nnakhala mulopwana* mmosa a etthoko ya Nabali aarowa ohala mukumi”.+ 35 Davidi aaheemererya itthu Abigayili aaruuhale awe, ni omuleela wiira: “Muroweke owannyu ni murettele. Miyo koowiiwani muhimmye anyu, kinimwiira siiso”.

36 Abigayili aahitthikela wa Nabali. Nabali owo aahipaka efesta yuulupale owannyawe ntoko aari mwene, nave iira otteeliwe ene murima, owuryaka ntoko aaphavela awe. Abigayili khaamulenle etthu, mpakha mmeeloni mwaya voosiisu. 37 Mmeeloni mwaya voosiisu, okathi eviinyu yaamuukulunwe aya Nabali, mwaarawe aahimuleela itthu sootheene. Nto murima wa Nabali waahikhwa, owo aahuuma ntoko nluku. 38 Nuuvira mahiku oowiiraka 10, Yehova aahimwiiriha Nabali okhwa.

39 Okathi Davidi aiwaale awe wiira Nabali ohookhwa, owo aahihimya wiira: “Ottottopeliwe Yehova, yoowo okaakinhe+ okathi kaaveehiwa aka ni Nabali,+ ni omukhoottihenrye murumeyi awe opaka etthu yootakhala.+ Yehova ohiiriha yootakhala ya Nabali omutthikela mwaneene yoowo!” Vano Davidi aahiruma oleeliwa Abigayili wiira aaphavela omuthela. 40 Arumeyi a Davidi yaahirowa oKarmelo omuleela Abigayili wiira: “Davidi ooniruma orwa wooleelani wiira oniphavela woothelani”. 41 Moowaakuveya Abigayili aahivenya okokhora uurama mpakha vathi, onahimya wiira: “Miyo-va murumeyi anyu, kiri oolikana ene orapiha inawu+ sa arumeyi a pwiyaka”. 42 Moowaakuveya Abigayili+ aahivenya, onwela puuru awe onatthariwa ni arumeyi awe axithiyana athanu. Vano Abigayili aahaatthara alopwana yaarummwale ni Davidi, ni aahitheliwa ni Davidi.

43 Nave Davidi aahimuthela Ahinowami,+ a oYezireyeli,+ nto athiyana awo oowanli, yaahikhala axaarawe.+

44 Masi Sawuli aahimukuxa mwanawe, eyo piiyo, Mikali,+ yoowo aari mwaara a Davidi, omutheliha Paliti,+ mwaana a Layixi, a oGalimi.