Yesaya
42 Nkamooneeni murumeyi aka,+ yoowo kinimukhaliherya aka!
Ti yoowo kimuthanlale aka+ ni kimweemerenrye aka!+
2 Owo khonrowa okhuwela, nnakhala wuncererya nsu nawe,
Nave nsu nawe khaninrowa wiiwanyeyaka mphironi.+
Mweekeekhai, owo onooruuha murettele.+
4 Muthuko awe khonrowa ottipha, nave khonrowa onyaanyiwa. Onrowa okhaliha exariya mulaponi,+
Nave atthu anikhala musisironi, annilipelela nlamulo nawe.*
5 Muluku eekeekhai Yehova,
Mpattuxa a erimu ni Muluku Muulupale,
Yoowo aatanle erimu eyo,+ ni aatanle elapo ya vathi ni itthu siri memmo,+
Yoowo onaavaha iphumu atthu anikhala mulaponi,+
Nave onaavaha ikuru ale aneetta mulaponi memmo, onihimya wiira:+
6 “Miyo Yehova, koowiihanani wiira kooniherye exariya;
Miyo kihoovarelani ntata nanyu.
Kinimookhapelelani, nave munrowa okhala ntoko nivarihano, eriyari ya miyo ni atthu,+
Nave-tho, munrowa okhala ntoko muthuko para maloko ootheene,+
7 Wiira muhule maitho a atthu ahinoona,+
Wiira mwaakumihe aperesu mukhatteya,
Nave mwaakumihe mukhatteya ale akilanthi mweepiphini.+
8 Miyo ka Yehova. Nla nsina naka;
Ovuwa waka, nkininvaha mutthu mukina,*
Nnakhala ottottopeliwa waka, nkinivaha ilatarato soopatthiwa.+
9 Moone, itthu soopacerya sihiiraneya;
Vano kinilaleya itthu isya.
Miyo kinnooleelani itthu iyo, sihinatthi wiiraneya”.+
10 Mmwiipele Yehova nsipo na niinaano,+
Nmwiipele masipo oottottopela mpakha omalenle elapo,+
Nyuwo munrowa mphareya ni nyuwo-tho itthu sootheene siri memmo,
11 Othako ni ipooma siri moothakoni-mmo, sikhuweleke,+
Vamosa ni mittetthe sinikhala aya atthu a oKedari.+
Atthu anikhala mmiyaakoni, atthapeke;
Awo akhuweleke vasulu va miyaako.
12 Ootheene aya amuttottopeleke Yehova,
Hata atthu yaale ari musisironi,+ amuttottopeleke yoowo.
13 Yehova onookhumelela ntoko mulopwana ootupa.+
Owo onrowa olikanaka ni nakhotto olikanne wiira owane ekhotto.+
Onookhuwela, aayo, onookhuwela ntoko anikhuwela aya ale anrowa okhottoni;
Onrowa wiixooniherya okhala ootupexa waavikana awanani awe.+
14 “Okhuma khalai, miyo kaaroomaala.
Kaaroomaala paahi, nave nkaapanke etthu.
Ntoko muthiyana oniyara,
Kinrowa ottettemelaka, sinookimalela iphumu ni nkinrowa omumulaka saana.
15 Kinoopwexakasa miyaako ni mattumuxa,
Nave kinimuumiha malaxi aya ootheene.
16 Kinimwaahoola alipa-oohoona, ephiro ahinisuwela aya,+
Nave kinoowiiriha weetta miphito sihinisuweliwa.+
Epiphi eri ohoolo waya, kinootatuxa ekhale waarya,+
Kinimwiiriha etthaya yoothetemana, okhala yoowaataleya.+
Ela ti etthu kinrowa aka owiirela. Nave nkinrowa waanyanyala”.
17 Atthu yaale aniroromela ilatarato soopatthiwa,
Yaawo anihimeerya ilatarato sa eyuuma wiira: “Nyuwo mwa amuluku ahu”,+
Anrowa oxinttiwa ni animuuliwa muru vanceene.
18 Nyuwo atthu ahiniiwa, mwiiweke;
Nyuwo atthu ahinoona, mooneke ni nwehexexeke.+
19 Ti pani ohinoona onlikana ni murumeyi aka?
Ti pani ohiniiwa nnakhala vakhaani, onlikana ni namitthaka aka?
Ti pani ohinoona nnakhala vakhaani, onlikana ni ole kimutthuvenle aka?
Yoowo ohinoona nnakhala vakhaani, onlikana ni murumeyi a Yehova?+
20 Nyuwo munniweha itthu sinceene, masi khamunoona saana.
Nyuwo mookhalana maaru, masi khamuniiwa.+
21 Yehova ohoona oreera wooniherya wiira nlamulo nawe, ti nuulupale ni noovuwa,*
Okhala wiira owo naxariya.
22 Masi ala atthu yaakhiwe ni yiiyeriwe mireerelo saya;+
Ootheene aya aatthukweliwa mulittini ni ahiipithihiwa mukhatteya.+
Awo ahiiyiwa, nto khuuvo oniwerya owoopola.+
Nave aakuxiwa, nto khuuvo oniwerya ohimya wiira: “Mwaattikihe!”
23 Ti pani a nyuwo onrowa wiiwa etthu ela?
Ti pani onrowa owiriyana ni ovaha ephoole, wiira ottottele mureerelo ohoolo?
24 Ti pani owiirinhe atthu a Yakobe wiiyeriwa mireerelo saya,
Nave ti pani owiirinhe aisarayeli waakhiwa mireerelo saya?
Kiira ti Yehova, yoowo amutthekenle aya?
25 Tivonto, Muluku aahaaviruwela,
Aahinanariwa naawo ni aahaaruuhela ekhotto yootakhala.+
Ekhotto eyo yaanihonona itthu sootheene, masi awo khiyaavanhe ephoole.+
Eyo yaanaapaha, masi awo khiyaacanle.+