Samuweli a Nenli
6 Davidi aahaathukumanya-tho anakhotto awe ootupa wIsarayeli, alopwana oowiiraka 30.000. 2 Davidi ni anakhotto awe ootheene, yaahirowa oBayale-Yuda wiira aruuhe Nivuku na Muluku eekeekhai,+ weiwo atthu yaarowa aya onvekela Yehova a anakhotto,+ yoowo ori vasulu va* makerubi.+ 3 Nto, awo yaahirowela Nivuku na Muluku eekeekhai owannyawe Abinadabi,+ yoowo aakhala opuro woottukhuwa, aweliha ekaaro esya+ enipuruliwa ni inama. Uza ni Ahiyo anamwane a Abinadabi, ti yeettiha ekaaro eyo.
4 Awo yaahikuxa Nivuku na Muluku ekeekhai, owannyawe Abinadabi yoowo aakhala opuro woottukhuwa. Ahiyo aari ohoolo wa Nivuku nno. 5 Davidi ni atthu ootheene a nloko na Isarayeli, yaahitthapa ohoolo wa Yehova, arumihaka mithinto sootheene sa ikaruma+ sa isipo saapakiwe ni matera a xuniiperu, aviola, malapa macikhaani,+ xakala ni isimbalo.*+ 6 Masi okathi yaaphiyale aya opuro yeepetthiwa etiriku wa Nakoni, Uza aahookola ntata nawe ovarela Nivuku na Muluku eekeekhai,+ okhala wiira naahanle omoroxiwa ni ipooyi. 7 Vano Yehova aahinanariwa vanceene ni Uza. Nto Muluku eekeekhai aahimwiiva+ Uza mwaha wa wiikuxererya wawe.+ Siiso Uza aahikhwa opuro yoole waattamela Nivuku na Muluku eekeekhai. 8 Masi Davidi aahiriipiwa murima mwaha wa Yehova onanariwa vanceene ni Uza. Tivo opuro ole oniihaniwa aya Perezi-Uza* mpakha olelo-va. 9 Nto Davidi aahimoova Yehova+ nihiku nle, onahimya wiira: “Kinrowa okuxa sai Nivuku na Yehova wiira kiroihe epooma aka?”+ 10 Davidi khaaphavela-tho okuxa Nivuku na Yehova wiira oroihe opuro aakhala awe, epooma ya Davidi.+ Ohiya-vo, Davidi aahirumiha wiira nikuxiwe nivuku nlo, niroihiwe owannyawe Obedi-Edomi,+ a oGathi.
11 Nivuku na Yehova, naahikhala owannyawe Obedi-Edomi a oGathi, miyeeri miraru. Nave Yehova aanimureeliha Obedi-Edomi ni atthu ootheene a etthoko awe.+ 12 Mwene Davidi aahileeliwa wiira: “Yehova ooreeliha etthoko ya Obedi-Edomi ni itthu sawe sootheene mwaha wa Nivuku na Muluku eekeekhai”. Nto, Davidi otteeliwe ene murima, aahirowela Nivuku na Muluku ekeekhai owannyawe Obedi-Edomi, wiira oroihe epooma ya Davidi, otteeliwe ene murima.+ 13 Okathi ale yaattukhula+ Nivuku na Yehova yeettale aya mavalo 6, owo aahivaha mukuttho epooyi yoolopwana ni epooyi yooneneva.
14 Davidi aaniina ohoolo wa Yehova, ni ikuru sawe sootheene, nave Davidi iira owanre ene eefodi* ya eliinyu.+ 15 Davidi ni etthoko yootheene ya aisarayeli, yaahikuxa Nivuku na Nivarihano+ na Yehova, akhuwelaka vootteeliwa murima+ ni yoopaka malope.+ 16 Masi okathi Nivuku na Nivarihano na Yehova naapixiwe aya epooma ya Davidi, mwaana mwaamuthiyana a Sawuli, Mikali,+ ori ene vaxanelani, aahinweha mwene Davidi otuphaka ni iinaka ohoolo wa Yehova, nto owo aahipacerya omunyohola Davidi vamurimani vawe.+ 17 Nto yaahikuxa Nivuku na Yehova ehela mutentani, yeeyo Davidi aalokihenrye awe, epweha opuro aya.+ Nuumala-vo, Davidi aahivaha soovaha para opahiwa+ ni mikuttho sa opatthani,+ ohoolo wa Yehova.+ 18 Nuumala Davidi ovaha soovaha para opahiwa ni mikuttho sa opatthani, aahaareeliha atthu mwa nsina na Yehova a anakhotto. 19 Nuumala-vo, Davidi aahaavaha atthu ootheene, eyo piiyo, muttitthi wootheene wa Isarayeli, khula mulopwana ni khula muthiyana, ephaawu yoovilikeya yoowooxiwa, epoolu ya itaamara, ni epoolu ya ifiiku soonyakattiwa, nto atthu ootheene yaahikhuma, khula mutthu orowaka owannyawe.
20 Okathi Davidi aatthinke awe wiira aareelihe atthu a etthoko awe, mwaana mwaamuthiyana a Sawuli, Mikali,+ aahirowa okumana nuuwo. Owo aahihimya oriki: “Olelo mwene a Isarayeli ohiivuwiha mmansawe, orulaka ikuwo sawe* ohoolo wa ipottha sawe soothiyana ni wa arumeyi awe, ntoko oniira awe mulolo!”+ 21 Nto Davidi aahimwaakhula Mikali wiira: “Miyo kitthampe ohoolo wa Yehova, yoowo okithanlale wiira kikhale muhooleli a atthu a Yehova, aisarayeli,+ nipuro na paapa anyu ni atthu ootheene a etthoko awe. Tivo miyo kinootthapa ohoolo wa Yehova. 22 Miyo kinimwiiyeviha vanceene mmensaka, nave kinoopaka itthu sinceene sinooniherya wiira miyo nkihiyo etthu. Masi athiyana yaawo ari ipottha mwaaromonle anyu, anookivuwiha”. 23 Nto Mikali+ mwaana mwaamuthiyana a Sawuli khonayare mpakha okhwa wawe.