Wahala Oopacerya
23 Okathi Davidi uuluvanle awe, ohakalanle ene ni mahiku a ekumi awe,* aahimukhaliha mwanawe Salomooni, mwene a atthu a Isarayeli.+ 2 Owo aahaathukumanya makhulupale ootheene a wIsarayeli, anamukuttho+ ni alevi.+ 3 Alevi yaarina iyaakha 30 orowa ohoolo yaahikontariwa.+ Mwaattelo aya, okontariwaka mulopwana ti mulopwana, waari wa 38.000. 4 Eriyari ya alopwana ala, 24.000 yaarumeela ntoko alipa yaaweherya muteko empa ya Yehova, 6.000 yaari makhulupale ni alipa-oophuka,+ 5 nave 4.000 yaari makwarta a vamukhora,+ nave-tho 4.000 yaanimwiipela isipo+ Yehova arumihaka ikaruma sa isipo, seiyo Davidi aahimmye awe wiira: “Koopaka ikaruma iya wiira iipeliweke isipo Muluku”.
6 Moottharelana, Davidi aahaakawanya+ moovarihana ni anamwane a Levi: Gerisoni, Kehathi ni Merari.+ 7 Anamwane a Gerisoni aari Ladani ni Ximeyi. 8 Anamwane a Ladani yaari araru: Muhooleli Yehiyeli, Zetami ni Yoweli.+ 9 Anamwane a Ximeyi yaari araru: Xelomothi, Haziyeli ni Harani. Ala yaari ahooleli a imusi sa Ladani. 10 Anamwane a Ximeyi yaari ala: Yahathi, Zina, Yewuxi ni Beriya. Anamwane ala axexe yaari a Ximeyi. 11 Yahathi aari muhooleli, nave Ziza aari muhooleli a nenli. Masi, okhala wiira Yewuxi ni Beriya khiyaarina anamwane anceene, yaakontariwa ntoko muhooleli a emusi emosa yaarina muritti mmosa-ru.
12 Anamwane a Kehathi, yaari axexe: Amurami, Isehari,+ Hebroni ni Uziyeli.+ 13 Anamwane a Amurami aari Aroni+ ni Moise.+ Masi Aroni ni anaawe, yaahivalaanyiwa+ wiira areeriheke Nipuro Noowaaryexa, avaheke mikuttho ohoolo wa Yehova, amurumeeleke yena ni yaareeliheke atthu ni nsina na Muluku okathi wootheene.+ 14 Vano anamwane a Moise, mulopwana a Muluku eekeekhai, yaakontariwe ntoko a nihimo na Levi. 15 Anamwane a Moise aari Gerisomi+ ni Eliyeezeri.+ 16 Anamwane a Gerisomi, muhooleli aari Xebuweli.+ 17 Osuulu* wa Eliyeezeri, muhooleli aari Rehabiya.+ Eliyeezeri khaarina anamwane akina, masi anamwane a Rehabiya khiyaareere waatta. 18 Anamwane a Isehari,+ muhooleli aari Xelomithi.+ 19 Anamwane a Hebroni, muhooleli aari Yeriya; a nenli aari Amariya; a neeraru aari Yahaziyeli; ni aneexexe aari Yekameyami.+ 20 Anamwane a Uziyeli,+ muhooleli aari Mika; ni a nenli aari Ixiya.
21 Anamwane a Merari aari Mali ni Muxi.+ Anamwane a Mali yaari Eleyazari ni Kiixi. 22 Eleyazari aahikhwa ohirina anamwane axilopwana, masi aarina anamwane axithiyana paahi. Vano anamwane a Kiixi yaawo yaari amusi aya,* yaahaathela axithiyana awo. 23 Anamwane a Muxi yaari araru: Mali, Ederi ni Yeremothi.
24 Ala yaari anamwane a Levi, moovarihana ni imusi saya ni moovarihana ni ahooleli a imusi saya. Alevi yaarina iyaakha 20 orowa ohoolo, yaahikontariwa ni yaahilempwa masina aya wiira avareke muteko empa ya Yehova. 25 Davidi aahihimya wiira: “Yehova, Muluku a Isarayeli, ohaavaha murettele atthu awe,+ nave owo onrowa okhalaka oYerusalemu mahiku ootheene.+ 26 Nave-tho, alevi khanrowa oteexaka etapernaakulu aahiiso mireerelo sinivareliwa muteko otapernaakulu”.+ 27 Siiso, atthariwaka malakiheryo ookiserya a Davidi, alevi yaarina iyaakha 20 orowa ohoolo yaahikontariwa. 28 Muteko aya waari waakhaliherya anamwane a Aroni+ ovara muteko empa ya Yehova, okhapelela nivate,+ esaala yaalyiwa, oreeriha itthu sootheene soowaarya ni ovara khula muteko waareerela ovariwa empa ya Muluku eekeekhai. 29 Awo yaanikhaliherya okhapelela iphaawu saavahiwa Muluku,+ otthu* wooreerexa wa yoovaha ya ipyo, iphaawu soonyakattiwa soohiheliwa eferemento,+ iphaawu soowooxiwa vaasateerani, otthu wooweetheiwa ni makhura+ ni muteko wootheene woophima mwaattelo ni munnuwelo. 30 Khula voosiisu,+ awo yaanivenya wiira amuxukhurele ni amuttottopele Yehova, nave yaanipaka etthu emosa-ru makaaripi.+ 31 Awo yaanikhaliherya okathi aavahiwa awe mikuttho soopahiwa Yehova khula esaabadu,+ khula mweeri musya+ ni okathi wa ifesta,+ nitthariwaka nummeru naavekeliwa ni nlamulo. Yaanipaka eyo khula okathi ohoolo wa Yehova. 32 Nave-tho, yaanikhapelela miritti saya saavarihana ni etenta* ya muthukumano, opuro woowaarya ni axinnaya, anamwane a Aroni avaraka muteko empa ya Yehova.