Wahala a Nenli
14 Nuuvira okathi, Abiya aahirowa omumula ni amuhavinre awe, nave aahivithiwa epooma ya Davidi.+ Nto mwanawe, Asa, aahikhala mwene nipuro nawe. Elapo yaahimumula iyaakha 10.
2 Asa aahipaka itthu sooreera ni sooloka vamaithoni va Yehova Muluku awe. 3 Aahaamala-maliha altaari a amuluku a amalapo+ ni mapuro oorakamela osulu yaakokhoreliwa amuluku eethiru, opwexakasa ipilaari saakokhoreliwa+ ni aahiikittha miri soowuuma saakokhoreliwa.*+ 4 Nave-tho aahaaleela atthu a oYuda wiira amphaveleke Yehova, Muluku a amuhavinre aya ni yiiweleleke Nlamulo ni sooruma. 5 Siiso Asa aahimala-maliha mapuro oorakamela osulu yaakokhoreliwa amuluku eethiru ni altaari yaapahiwa nsenso,*+ ipooma sootheene sa oYuda. Omwene awe waanitepa okhalana murettele okathi wootheene aalamulela awe. 6 Aahiteka ipooma soolipihiwa sa oYuda,+ okhala wiira elapo yaahikhala ni murettele ni khuuvo aawana ekhotto nuuwo iyaakha iye, maana Yehova aahinvaha murettele.+ 7 Owo aahaaleela atthu a oYuda wiira: “Nrowe niteke ipooma iya, nirukurerihe ni ixiri ni ipa soorakamela osulu,+ nihele mikhora* ni itaranka. Tthiri elapo ti yawihu okhala wiira nomphavela Yehova Muluku ahu. Hiyo nomphavela, nave owo oonivaha murettele ni awanani ahu ootheene anirukurenrye”. Siiso, awo yaahiwerya ovara saana muteko wooteka.+
8 Asa aahikhalana anakhotto 300.000 alopwana a oYuda, yaawo yaakuxa iskuutu suulupale ni mavaka. Atthu a nihimo na Beniyamini yaahikhala anakhotto ootupa 280.000, yaawo yaakuxa iskuutu saamukhaani ni miyuura.*+
9 Muhoolo mwaya, Zerahi a wEthiyopia, aahirwa ni anakhotto awe 1.000.000 vamosa ni ikaaro sa ekhotto 300.+ Okathi aaphiyale awe oMarexa,+ 10 Asa aahikhuma wiira awane naawo, nto awo yaahiilokiherya wiira awane ekhotto oxepani wa oSefata, oMarexa. 11 Asa aahimukhuwelela Yehova Muluku awe,+ oriki: “Yehova, ekeekhai wiira awanani ahu khareere, ni hiyo khanrina owerya, masi eyo khahiyo etthu para nyuwo.+ Khoo Yehova Muluku ahu, munikhaliherye, okhala wiira nnoororomelani nyuwo,+ nave nihoorwa owana ni muttitthi ola wa atthu niroromelaka nsina nanyu.+ Xontte Yehova, nyuwo mwa Muluku ahu. Muheemererye wiira mutthu onikhwa okhale oowerya woovikanani nyuwo”.+
12 Siiso, Yehova aahaaxintta atthu a wEthiyopia ohoolo wa Asa ni ohoolo wa ayuda, nto atthu a wEthiyopia yaahitthyawa.+ 13 Asa ni atthu yaarina awe, yaahiwoomola mpakha oXerari,+ awiivaka atthu a wEthiyopia, ahimuhiyaka nnakhala mutthu mmosa mukumi, okhala wiira yaahixinttiwa vaalupale ohoolo wa Yehova ni ohoolo wa anakhotto awe. Nuumala-vo, atthu a oYuda yaahikuxa mireerelo sinceene sa awanani aya. 14 Nave-tho, yaahituphela ipooma sootheene saarukurenrye oXerari, okhala wiira atthu a ipooma iyo yaanimoova Yehova, nave yaahikuxa mireerelo sootheene sa ipooma iyo, okhala wiira saahikhala mireerelo sinceene. 15 Nave-tho yaahituphela itenta* sa atthu ale yaarina inama, akuxa ipwittipwitthi sinceene ni ikamelo, nuumala-vo yaahitthikela oYerusalemu.