Zakariya
6 Vano miyo kaahitthukula maitho, nto kaahoona ikaaro xexe sa ekhotto sikhumaka eriyari ya miyaako miili, nave miyaako iyo saari sa ekoopiri. 2 Ekaaro yoopacerya yeettihiwa ni ikhavalo sooxeerya, ekaaro ya nenli yeettihiwa ni ikhavalo sooriipa.+ 3 Ekaaro ya neeraru yeettihiwa ni ikhavalo sootteela, nave ekaaro ya neexexe yeettihiwa ni ikhavalo sa malepa ni sa ikoore soovirikana.+
4 Miyo kaahikoha nlaikha nle naalavula ni miyo wiira: “Pwiyaka, itthu iya sintaphulela-ni?”
5 Nlaikha nle naahikaakhula wiira: “Iya soopattuxiwa xexe sa wiirimu,+ seiyo sinikhuma nuumala weemela opuro aya, ohoolo wa Pwiya a elapo yootheene.+ 6 Ekaaro enipuruliwa ni ikhavalo sooriipa enirowa elapo ya onorti. Ekaaro enipuruliwa ni ikhavalo sootteela enirowa mpantta onikela nsuwa.+ Nave ekaaro enipuruliwa ni ikhavalo sa malepa enirowa elapo ya osuuli. 7 Nave ikhavalo sa malepa oovirikana saahiilokiherya wiira sivenye, seetteette mulaponi”. Nto owo aahihimya wiira: “Nvenye, mweetteette mulaponi”. Vano ikhavalo iyo saahipacerya weetteetta mulaponi.
8 Moottharelana, nlaikha nlo naahikiihana nnakileela wiira: “Moone, ikhavalo sinirowa elapo ya onorti, soovukula onanariwa wa Yehova mulaponi mwa onorti”.
9 Kaahisuwelihiwa-tho moolumo a Yehova yaahimya wiira: 10 “Mukuxe etthu oruuhale awe Helidayi, Tobiya ni Yedaya, avahiwe aya ni atthu ari weepotthani. Nave nihiku nenlo, murowe owannyawe Yosiya, mwaana a Sefaniya, vamosa ni atthu awo akhumme oBabiloonia. 11 Mukuxe eparatha ni eweero, wiira mpake ekhara, munwarihe mmuru namukuttho muulupale Yooxuuwa,+ mwaana a Yehosadaki. 12 Nto mmuleele wiira:
“‘Etthu onihimya awe Yehova a anakhotto, tiila: “Mulopwana ola oniihaniwa Yoophuwa.+ Owo onoophuwa opuro awe, nave onooteka etemplo ya Yehova.+ 13 Ti yoola onrowa oteka etemplo ya Yehova, nave ti yoola onrowa waakhela ovuwa. Ola onrowa okilaathi veehiceni vawe olamuleleke, nave-tho onrowa okhala namukuttho veehiceni vawe.+ Ohiya-vo, onookhala ovarihana* eriyari ya makhulupale awo manli. 14 Nave ekhara enrowa okhalaka mutemplo mwa Yehova wiira uupuweleliweke Helemi, Tobiya, Yedaya+ ni Heni mwaana a Sefaniya. 15 Ale ari ottaiwene animoorwa wiira yiirele mpantta muteko wooteka etemplo ya Yehova”. Nto nyuwo munoosuwela wiira Yehova a anakhotto ookiruma orwa wa nyuwo. Eyo enimwiiraneya, vakhala wiira munoowiriyana tthiri nsu na Yehova, Muluku anyu’”.