Wahala a Nenli

5 Siiso, Salomooni aahimaliha muteko wootheene wooteka empa ya Yehova.+ Salomooni aahiruuha itthu sootheene paapa awe, Davidi, aakhalinhe awe soowaarya,+ ni aahipweha eparatha, eweero ni ikaruma sootheene opuro waasukiwa aya mihakhu sa empa ya Muluku eekeekhai.+ 2 Okathi ole, Salomooni aahaathukumanya axitokweene a Isarayeli, ahooleli a mahimo ootheene ni makhulupale a atthu a nloko na Isarayeli. Awo yaahirowa oYerusalemu, wiira yathaamihe Nivuku na Nivarihano na Yehova Epooma ya Davidi,+ eyo piiyo, oSiyoni.+ 3 Alopwana ootheene a Isarayeli yaahithukumana ohoolo wa mwene okathi wa efesta* yaapakiwa mweeri wa neethanu nenli.+

4 Nto axitokweene ootheene a Isarayeli yaahirwa, nave alevi yaahiteexa Nivuku na Nivarihano.+ 5 Awo yaahiteexa Nivuku na Nivarihano, etenta ya muthukumano+ ni itthu sootheene soowaarya saari mutentani-mmo. Anamukuttho ni alevi* ti yaateexale itthu iyo. 6 Mwene Salomooni ni muloko wootheene wa atthu a Isarayeli, yaawo yaitthaniwe wiira athukumane nuuwo, yaari ohoolo wa Nivuku na Nivarihano. Saanivahiwa mikuttho sa ipwittipwitthi ni ipooyi sinceene,+ seiyo sahaaweryaneya okontariwa nnakhala osuweliwa mwaattelo aya. 7 Moottharelana, anamukuttho yaahiroiha Nivuku na Nivarihano na Yehova opuro aya, esaala ya muhina ya empa, Nipuro Noowaaryexa, vathi va mapupha a makerubi.+ 8 Siiso, mapupha a makerubi yaahitapuruxeliwa nipuro naari aya Nivuku na Nivarihano, wiira makerubi awo akhuneeleke Nivuku na Nivarihano nlo ni ivarelelo saya.+ 9 Ivarelelo iyo saari soorakama, vaaweryaneya aya woona oponta waya Nipuro Noowaarya, ohoolo wa esaala ya muhina, masi khivaaweryaneya woona ota. Iyo siri vaavo mpakha olelo-va. 10 Muhina mwa Nivuku na Nivarihano khiyaakhanle etthu ekina, ahikhanle paahi mapawe manli, yaawo Moise aapwenhe awe oHorebi,+ okathi Yehova aapanke awe nivarihano+ ni atthu a Isarayeli, akhumaka wExiitu.+

11 Okathi anamukuttho yaakhumme aya nipuro noowaarya (anamukuttho ootheene yaahiireeriha+ ahittharaka ekurupu yaari aya).+ 12 Nave alipa-oowiipa ootheene alevi+ yaawo yaari a osuulu wa Asafi,+ wa Hemani,+ wa Yedutuni+ ni wa anaaya ni axinnaya, yeemenle mpantta onikhuma nsuwa wa altaari awanre ene ikuwo sooreera,* akunxeene isimbalo,* atthakare ni aviola.* Awo yaari vamosa ni anamukuttho 120, yaawo yaarumiha malope.+ 13 Ale yaarumiha malope ni yiipa isipo yaaninvuwiha ni omuxukhurela Yehova okathi omosa-ru. Nave okathi yaarumiha aya malope, isimbalo ni ikaruma sikina sa masipo, yaaninvuwiha Yehova, “okhala wiira owo tooreera murima, nave ophenta wawe woororomeleya onikhala mahiku ootheene”.+ Okathi ene yoowo, naahisareya neeku mpaani, eyo piiyo, mpaani mwa Yehova.+ 14 Anamukuttho khiyaawerya-tho ovara miteko saya, mwaha wa neeku nle, okhala wiira ovuwa wa Yehova waahisareya empa ya Muluku eekeekhai.+