Wahala a Nenli
12 Nuumala omwene wa Robowamu olipihiwa,+ nuuwo okhala mutthu oolipa, aahihiya otthara nlamulo na Yehova,+ nave-tho atthu ootheene a Isarayeli yaahipaka etthu emosa-ru. 2 Eyaakha ya neethanu ya mwene Robowamu, mwene Xixaki+ a wExiitu aahituphela oYerusalemu, okhala wiira atthu awo khiyaaroromeleyale wa Yehova. 3 Owo aahikhalana ikaaro sa ekhotto 1.200, anakhavalo 60.000 ni anakhotto yahaakontareya aarwanne awe wExiitu, eyo piiyo, atthu a oLibia, a oSuki ni a wEthiyopia.+ 4 Owo aahikuxa ipooma soolipihiwa sa oYuda ni aahiphiya oYerusalemu.
5 Profeta Xemaya+ aahirowa wa Robowamu ni wa makhulupale a oYuda, yaawo yaathukumanne oYerusalemu mwaha wa Xixaki, onaahimeerya wiira: “Etthu onihimya awe Yehova, tiila: ‘Nyuwo mookinyanyala, tivo ni miyo kinimoonyanyalani+ koovahereryakani mmatatani mwa Xixaki’”. 6 Vano, makhulupale a wIsarayeli ni mwene yaahiiyeviha+ anahimya wiira: “Yehova ta xariya”. 7 Okathi Yehova oonale awe wiira atthu ale yaahiiyeviha, Yehova aahimuleela Xemaya, oriki: “Atthu ala ahiiyeviha. Nkinrowa waapwetexa,+ nave voohipisa kinoowoopola. Nkinrowa onanariwa ni atthu awo, nave nkinrowa omuhiya Xixaki opwetexaka oYerusalemu. 8 Masi awo anrowa okhala arumeyi awe, wiira asuwele ovirikana okhanle eriyari ya okirumeela ni waarumeela mamwene* a ilapo sikina”.
9 Siiso, Xixaki mwene a wExiitu, aahituphela oYerusalemu. Owo aahikuxa mihakhu sa empa ya Yehova+ ni mihakhu sa empa* ya mwene. Nave aahikuxa itthu sootheene, ohela muhina makula a wiixaakihana a* eweero, seiyo Salomooni aapanke awe.+ 10 Mwene Robowamu aahipaka makula a wiixaakihana a ekoopiri wiira oranttelihe ale yaakuxiwe, aavahererya maxeefi a makwarta, yaawo yeemela vamukhora va empa ya mwene. 11 Khula okathi mwene aarowa awe empa ya Yehova, makwarta yaanirwa ni yaanikuxa makula awo a wiixaakihana, nuumala-vo yaanittikiherya esaala ya makwarta. 12 Yehova aahihiya onanariwa ni mwene,+ ni khaapwetenxe atthu ale voomalela,+ okhala wiira mwene aahiiyeviha. Nave-tho, nlelo saahikhala itthu sikina sooloka oYuda.+
13 Mwene Robowamu aahikhalana owerya wuulupale oYerusalemu ni khaahiyale olamulela. Robowamu aarina iyaakha 41 okathi aakhalihiwe awe mwene. Nave aahilamulela iyaakha 17 oYerusalemu, epooma yeeyo Yehova aathanlale awe eriyari ya mahimo a Isarayeli ntoko opuro waarina nsina nawe. Maama awe mwene aihaniwa Naama, a wAmoni.+ 14 Masi owo aahipaka etthu yootakhala, okhala wiira khaalakenle vamurimani vawe omphavela Yehova.+
15 Yoowiiraneya ya Robowamu okhuma woopaceryani mpakha wookiseryani, yoolempwa eriyari ya moolumo a profeta Xemaya+ ni mulistani ya masina aya, yeeyo elempwale ni Ido,+ yoowo aasuwela otaphulela itthu ooniheriwa awe ni Muluku. Nave, Robowamu ni Yerobowamu yaamakelasa owana ekhotto.+ 16 Robowamu aahirowa omumula ni amuhavinre awe, ni aahivithiwa epooma ya Davidi.+ Vano mwanawe, Abiya,+ aahikhala mwene nipuro nawe.