WIIKHUPANYERYA
א [aalefe]*
1 Mmooneke Yerusalemu yoowo aari epooma yoowaatta atthu,+ vano ohanle meekhaawe!
Mmooneke Yerusalemu yoowo aari oovuwa eriyari ya maloko,+ vano ori ntoko naamukhweli!
Mmooneke ole aari pwiyamwene eriyari ya iprovinsia, vano onivara miteko sookhanyereriwa!+
ב [beete]
2 Owo onninla vanceene ohiyu,+ nave owiitho wawe onnimoroxa maithori.
Atthu ootheene yamphenta khakhanle wiira ammaalihe.+
Apatthani awe ootheene aamuhiya,+ vano awanani awe.
ג [kiimele]
3 Yuda ooroihiwa weepotthani+ ohaaxiwaka ni okhalihiwe ene epottha.+
Owo ohaana okhala eriyari ya maloko,+ khoniphwanya opuro woophumurya.
Atthu ootheene yaamulupattha anvara okathi waakhulumunwe awe.
ד [taalete]
4 Istaraata sa oSiyoni sinninla, okhala wiira khuuvo onirweela ifesta.+
Mikhora sawe sootheene, soohononeya,+ nave anamukuttho awe annithukumela.
Athiyana awe ahitonko orupa ni alopwana, aakhulumuwa, nave Siyoni onnihaawa vanceene.
ה [he]
5 Awanani awe vano tanimuhoolela, awo khanivelavela.+
Okhala wiira Yehova oomwiiriha oriipiwa murima mwaha wa itampi sawe sinceene.+
Nave anaawe aaroihiwa weepotthani ohoolo wa nwanani awe.+
ו [vaawu]
6 Oreera wootheene wa mwaana mwaamuthiyana a oSiyoni woomala.+
Nave makhulupale awe ari ntoko naahe ohiniphwanya opuro woolya,
Ni oneettakasa ookhulumuwa ene ohoolo wa ale animulupattha.
ז [saine]
7 Okathi onrowa awe oxanka ni ohinrowa awe okhalana opuro wookhala, Yerusalemu onimuupuwela
Itthu sootheene sa faita saarina awe mahiku a khalai.+
Okathi atthu awe yaamorenle aya mmatatani mwa awanani awe ni yahaarina aya mutthu oowaakhaliherya,+
Awanani aya yaahinweha ni yaahimutheya mwaha wa ehasara awe.+
ח [heete]
8 Yerusalemu oottheka vanceene.+
Tivonto ori awe etthu yoohiirya.
Atthu ootheene yaamuttittimiha vano annimuthanya okhala wiira aamoona ohiwanre etthu.+
Owo mmansawe onnittettemela+ ni onnitthyawa uuliwe ene muru.
ט [teete]
9 Ohiloka wawe ori musaayani mwawe.
Owo khuupuwenle etthu enrowa omwiiraneela muhoolo.+
Omora wawe waari wootikiniha, khuuvo aawerya ommaaliha.
Khoo Yehova, moone oxanka waka, okhala wiira nwanani aka ohiivuwiha.+
י [iyoote]
10 Awanani awe aakuxa mihakhu sawe sootheene.+
Owo ohoona maloko akelaka opuro awe woowaarya,+
Yaawo mwaakhoottihenrye anyu okela mmulokoni mwanyu.
כ [kaafe]
11 Atthu awe ootheene annithukumela, awo annaavya ephaawu.+
Awo aavaha itthu saya sa efaita wiira ephwanye yoolya, ephavelaka paahi okhala akumi.
Khoo Yehova, nkoonani moota kikhalihiwe aka ntoko muthiyana ohirina efaita.
ל [laamete]
12 Niireke eyo khahiyo etthu para nyuwo munivira mustaraatani?
Mutthukule maitho ni moone!
Niireke ookhala otonko woona owereya onivikana woona owereya koonale aka okathi kaahukhummwale aka,
Weiwo Yehova aakiirinhe awe ohaawa nihiku aananariwa awe vanceene?+
מ [meeme]
13 Ori ene osulu, owo ooruma mooro wiira opahe makhuva aka,+ nto mooro owo onnipaha khula nikhuva.
Owo ooreya ntthavi para inawu saka, nave ookikhanyereriha otthikela ottuli.
Owo ookiiriha okhala ntoko muthiyana oonyanyaliwa.
Khula nihiku kinniwereiwa.
נ [nuune]
14 Itampi saka sookuxiwa ntoko mwiri, sootthukiwa ntoko mwiri,* sootthukiwa oratteene ni ntata nawe.
Iyo soopwehiwa muxikoni mwaka, nto ikuru saka soovukuwa.
Yehova ookivahererya mmatatani mwa atthu kihinwerya aka waavilela.+
ס [saameke]
15 Yehova ohaarihela ottaiwene anakhotto ootheene oowerya yaari eriyari aka.+
Owo ohiihana muttitthi wa atthu okivirikanyaka wiira yaapwetexe amiravo aka.+
Yehova oomunyakela nipuro ninnyakattiwa ewuuva mwaana mwaamuthiyana a oYuda ohitonko orupa ni mulopwana.+
ע [aine]
16 Miyo kinninla mwaha wa itthu iya sootheene,+ nave maitho aka aasareya maithori.
Ootheene ale yaawerya okimaaliha aahiiso okilipiha aakirakamela.
Anaaka kharina-tho nlipelelo, okhala wiira nwanani ahu ooniwerya.
פ [pe]
17 Siyoni ohookola matata awe,+ owo khorina mutthu ommaaliha.
Yehova ohaaruma awanani ootheene amurukurenrye Yakobe wiira onvirikanya.+
Awo annimoona Yerusalemu ntoko etthu yoohiirya.+
צ [tisaate]
18 Yehova ta xariya,+ okhala wiira ti miyo kivirikannye sooruma sawe.+
Mwiiwe, nyuwo atthu ootheene, nkawehani moota kinoona aka owereya.
Aximwali aka ni amiravo aka aaroihiwa weepotthani.+
ק [koofe]
19 Miyo kaahiwiihana ale yaakiphenta, masi awo yaahikirukunuwela.+
Anamukuttho aka ni axitokweene aka yaahikhwela opooma,
Okathi yaaphavelasa aya yoolya wiira akhale akumi.+
ר [reexe]
20 Yehova, moone, okhala wiira nkireere oxanka.
Marupo aka annithukumela.
Murima wookiriipa, okhala wiira kootepa ohiiwelela.+
Ota, espaata enniiva,*+ nave okhala mpaani onlikana ni okhwa.
ש [xiimi]
21 Atthu ahiiwa wuupulela waka, khuuvo onikimaaliha.
Awanani aka ootheene ahiiwa ehasara yootheene ekiphwannye.
Awo aahakalala, okhala wiira ti nyuwo mukumihenrye.+
Masi nyuwo munooruuha nihiku mulaleyale anyu,+ okathi awo anrowa aya olikanaka ni miyo.+
ת [taawu]
22 Nwehe otakhala waya wootheene, nave nwiirihe etthu yootepa otakhala,+
Ntoko mukiirenle anyu etthu yootakhala mwaha wa itampi saka sootheene.
Tthiri nkireere wiipulela, nave murima aka onnikiwereya.
א [aalefe]
2 Mooneke moota Yehova omukhunenle awe mwaana mwaamuthiyana a oSiyoni mmeekuni mwa onanariwa wawe!
Owo ooriha oreera wa Isarayeli okhuma wiirimu mpakha vathi.+
Nihiku na onanariwa wawe owo khonuupuwela-tho, opuro onipweherya awe inawu sawe.+
ב [beete]
2 Yehova oopwetexa mapuro ootheene anikhaliwa a oYuda ohoonaka othunku.
Owo oopwexakasa mapuro oolipihiwa a mwaana mwaamuthiyana a oYuda ni oviruwa wawe.+
Owo oomoroxa mpakha vathi ni ohoonona omwene+ ni makhulupale awe.+
ג [kiimele]
3 Oviha wa onanariwa wawe owo oomala-maliha owerya* wootheene wa Isarayeli.
Owo ookumiha ntata nawe noolopwana okathi nwanani aattamenle awe,+
Nto kaahiyerenrye ompaha Yakobe ntoko mooro onipaha itthu sootheene sirukurenrye.+
ד [taalete]
4 Owo ookokha muura awe ntoko nwanani, nave moono awe woolopwana ori woolikane ene owana ekhotto ntoko nwanani.+
Owo oowiiva ootheene ale yaamusiveliha.+
Nave ooviruwela vanceene ntoko mooro+ itenta* sa mwaana mwaamuthiyana a oSiyoni.+
ה [he]
5 Yehova ohiikhaliha ntoko nwanani,+
Owo ommirya Isarayeli.
Owo oomirya ipa sawe sootheene soorakamela osulu,
Nave oopwetexa mapuro awe ootheene oolipihiwa.
Owo ohincererya wunla ni wiikhupanyerya wa mwaana mwaamuthiyana a oYuda.
ו [vaawu]
6 Owo onnoona vootakhala+ muxaxa awe, ntoko nlaxi nri muxarti.
Owo oomala-maliha* ifesta sawe.+
Yehova ohiiriha mahiku a ifesta ni isaabadu oliyaliwa oSiyoni,
Nave mwaha wa otikinihiwa wawe wuulupale khonimuthokorerya mwene ni namukuttho.+
ז [saine]
7 Yehova oomukhootta altaari awe,
Owo ookhootta opuro awe woowaarya.+
Owo oovahererya ixiri sa mapuro awe oolipihiwa, mmatatani wa awanani awe.+
Awo anookhuwela mpaani mwa Yehova,+ okhalaka ntoko nihiku na efesta.
ח [heete]
8 Yehova oolakela opwetexa exiri ya mwaana mwaamuthiyana a oSiyoni.+
Owo ohookola mukhoyi woophimana.+
Owo khonittikiherya ottuli ntata nawe okhuma nihiku opacenrye awe opwetexa.
Nave ohiiriha opuro woorakamela osulu ni exiri wunla.
Mapuro awo oomanli aamora.
ט [teete]
9 Mikhora sawe soomorela vathi.+
Owo oopwexa ni oohonona itaranka sawe.
Mwene awe ni makhulupale awe ari eriyari ya maloko.+
Khanikhanle nlamulo,* hata maprofeta awe khanooniheriwa itthu ni Yehova.+
י [iyoote]
10 Axitokweene a mwaana mwaamuthiyana a oSiyoni annikilaathi vathi amaalale ene.+
Awo annitathela ntthupi mmuru mwaya ni anniwara isaakho.+
Axithiyana a oYerusalemu ahitonko orupa ni alopwana, annuuramiha muru aya mpakha vathi.
כ [kaafe]
11 Maitho aka aatemwa mwaha woomakelaka wunla.+
Marupo aka annithukumela, murima wookiriipa.
Hapa aka oomwareela vathi mwaha wa opwetexiwa wa mwaana mwaamuthiyana* a atthu aka,+
Mwaha wa amiravo ni axinamwane anitiximayari mapuro oowaatta atthu a opooma.+
ל [laamete]
12 Okathi anitiximayari aya ntoko atthu avulalihiwe mapuro oowaatta atthu a opooma
Ni okathi okumi aya onimala-mala aya mmatatani mwa aximamaya,
Awo annaakoha aximamaya wiira: “Eri vai yoolya ni yoowurya?”+
מ [meeme]
13 Kirumeele exeeni ntoko namoona?
Aahiiso koolikanyiheni naani, nyuwo mwaana mwaamuthiyana a oYerusalemu?
Koolikanyiheni naani wiira koomaaliheni, nyuwo mwaana mwaamuthiyana a oSiyoni ohitonko orupa ni mulopwana?
Ehasara anyu ti yuulupale ntoko ephareya.+ Ti pani onwerya woopenuxani?+
נ [nuune]
14 Sooloha seiyo maprofeta anyu yooleelaayani, saari soowootha ni soohikhala etthu,+
Nave awo khiyaaphavela owoopolani weepotthani,+ yooniheryaka itampi sanyu.
Masi, awo nlelo yaanooleelani sooloha soohikhala seekeekhai ni soowoka.+
ס [saameke]
15 Mwaha wa nyuwo, atthu ootheene anivira mustaraatani annoopa makuphi voonyohola.+
Annoopa muturi atikinihiwe ene+ ni annittikinya muru aya mwaha wa mwaana mwaamuthiyana a oYerusalemu, yiiraka:
“Niireke ela epooma yeele yaahimmwa wiira: ‘Epooma ela ti yooreera ni enniwiiriha atthu ootheene anikhala mulaponi ohakalala’?”+
פ [pe]
16 Awanani anyu ootheene ahootthukulelani eyano aya.
Annoopa muturi ni annilumanyiha maino yiiraka: “Hiyo nompwetexa.+
Nla nihiku nenle naalipelela ahu!+ Nlo noophiya, hiyo ninnoona!”+
ע [ayine]
Oopwexa ohimoriwaka ikharari.+
Owo oomuhiya nwanani ohakalalaka mwaha wa nyuwo, ootthapa ni owerya wa awanani anyu.
צ [tisaate]
18 Nyuwo exiri ya mwaana mwaamuthiyana a oSiyoni, murima wa atthu onnimukhuwelela Yehova.
Muhiye maithori amoreke ntoko muro woowaatta maasi othana ni ohiyu.
Muhihiye maitho anyu amaalaka wunla.
ק [koofe]
19 Nvenye! Munleke ohiyu wootheene, okathi makwarta anipacerya aya owehaweha.
Mmwarexe murima anyu ntoko maasi ohoolo wa Yehova.
Mmuteexerye matata anyu mwaha wa okumi wa aniinyu,
Yaawo anitiximayari+ mapuro ootheene sinikumaana aya iphiro.
ר [reexe]
20 Xontte Yehova, munwehe ole mmuhukhummu anyu ni omwiivale anyu.
Niireke athiyana ahaana waakhuura anaaya akumi, yaawo yaayanre aya?+
Aahiiso niireke anamukuttho ni maprofeta ahaana wiiviwa opuro woowaarya wa Yehova?+
ש [xiimi]
21 Amiravo ni atthu oowuuluvala aamora mustaraatani akhwela vaavo.+
Athiyana aka ahitonko orupa ni alopwana ni amiravo aka ahiiviwa ni espaata.*+
Nyuwo moowiiva nihiku na oviruwa wanyu, nyuwo moowiiva muhiwoonelaka othunku.+
ת [taawu]
22 Nyuwo munniwiitthana atthu oowoopiha a ipantta sootheene, okhalaka ntoko muniwiihana atthu para nihiku na efesta.+
Nihiku na oviruwa wa Yehova, khuuvo aahanle nnakhala ooponwe.+
Ale kaayanre aka ni kaahunwe aka, aamala-malihiwa ni nwanani aka.+
א [aalefe]
3 Miyo ka mulopwana yoole owenhe maxakha, mwaha woowi Muluku oonihukhumu ni oviruwa wawe wuulupale.
2 Owo ookoomola ni onnikiiriha weetta weepiphini, ohiya moowaaryani.+
3 Ohiya-vo, owo onnikookolela ntata nawe okivirikanyaka khula okathi, nihiku nootheene.+
ב [beete]
4 Owo oolaliha erutthu aka ni ethayi aka;
Owo oopwexa makhuva aka.
5 Owo ookirukurerya, ookihelela eveneno yoowaawa+ ni ookirukureriha mixankiho.
6 Owo ookikhanyererya okilaathi mapuro ooriipa, ntoko atthu akhwiiye khalai.
ג [kiimele]
7 Owo ookirukureriha exiri, wiira kihitthyawe;
Owo ookitthukwa ni ikwirinti soolemela sa ekoopiri.+
8 Okathi kinimukhuwelela aka kiphavelaka vanceene okhaliheriwa, owo khoniwiriyana nivekelo naka.+
9 Owo oottiyelela iphiro saka ni maluku oopwexiwa ni oolokiheriwa,
Owo ohiiriha ephiro aka okhala yooxankiha ovira.+
ד [taalete]
10 Owo onnikiipithela ntoko mwaamunama a mutakhwani oniihaniwa ursu, ntoko kharamu iipinthe.+
11 Owo ookikumiha mphironi ni ookikhaliha ipetaaso,
Owo ookiiriha onyanyaliwa.+
12 Owo ookokha muura awe ni ookiiriha okhala nttheere* nawe.
ה [he]
13 Ohiiriha mattheere* a muyuununi mwawe ohoma isyo saka.
14 Miyo koopakeya etthu enitheiwa ni atthu ootheene, muru wa isipo sawe nihiku nootheene.
15 Owo ookisariha ni itthu soowaawa ni ookiiriha owurya maasi a mwiri woowaawa.+
ו [vaawu]
16 Owo onnipwexa maino aka ni maluku macikhaani,
Ookiiriha wiittheliwa ettuurwa.+
17 Nyuwo munnikaakha murettele, kooliyala ohakalala.*
18 Tivonto kinnihimya wiira: “Ovuwa waka woolakaseya, nkimmulipelela-tho Yehova”.
] זsaine]
19 Muhiliyale wiira kiri mmaxakhani ni nkirina opuro wookhala,+ kinnoona owaawa mwaha wa mwiri wa eveneno.+
20 Tthiri nyuwo munimuupuwela nave munimuurama ohoolo waka.+
21 Kinnuupuwelela etthu eyo vamurimani vaka, tivonto kinrowa aka olipelela moopixa murima.+
ח [heete]
22 Ophenta woororomeleya wa Yehova wooniiriha ohimala-malihiwa,+
Okhala wiira miteko sawe ni omoriwa wawe ikharari khonimala.+
23 Khula nihiku+ owo onninooniherya omoriwa ikharari, nave ororomeleya wawe ti wuulupale.+
24 Miyo kinnihimya wiira: “Yehova etthu kihiyeriwe aka,+ tivonto kinrowa omulipelelaka moopixa murima.+
ט [teete]
25 Yehova tooloka wa ale animulipelela,+ para mutthu ohinihiya omphavela.+
26 Fataari olipelela moopixa murima+ woopoliwa onikhuma wa Yehova.+
27 Fataari mutthu omphwanya mixankiho ori ene mmiravo.+
י [iyoote]
28 Okathi Muluku onimukapattiha awe mwiri,* mmuhiye okilaathiki mekhawe omaalale ene.+
29 Okwatihe iyano sawe vathi,+ woonasa wene onookhalana nlipelelo.+
30 Mmuhiye onvahererye owiitho wawe ole onimmana, mmuhiye eemererye oruwaniwa.
כ [kaafe]
31 Yehova khonrowa onikhootta mahiku ootheene.+
32 Nnaamwi owo onihaaxaka, onoonimorela ikharari mwaha wa ophenta wawe woororomeleya wuulupale.+
33 Owo khonimusivela okumiherya maxakha, aahiiso waahaaxa anamwane a atthu.+
ל [laamete]
34 Waanyakatta vathi va inawu aperesu ootheene a valaponi,+
35 Omukhoottela exariya mutthu ohoolo wa Muluku Muulupalexa,+
36 Omuhaaxa mutthu mwaha wa mulattu awe,
Yehova khonivilela itthu ntoko iyo.
מ [meeme]
37 Ti pani onwerya ohimya etthu ni wiiriha etthu eyo wiiraneya, vahikhanle wiira Yehova torumme?
38 Mwaano mwa Muluku Muulupalexa,
Khasinkhuma itthu sootakhala vamosa ni itthu sooreera.
39 Xeeni mutthu mukumi aakhanle awe oowiikhupanyerya, mwaha wa itampi sawe?+
נ [nuune]
40 Nrowe nivarerye ni nitokose iphiro sahu,+ nave nimutthikele Yehova.+
41 Nrowe nimutthukulele murima ahu ni matata ahu Muluku a wiirimu,+ niiraka:
42 “Hiyo noottheka ni nihoovirikanyani,+ nto nyuwo khamunlevelenle.+
ס [saameke]
43 Onanariwa wanyu woonikhoottiherya owaattamelani;+
Nyuwo moonoomola ni mooniivakasa muhinimorelaka ikharari.+
44 Nyuwo muhiiriha meeku ottiyelela eriyari ahu ni nyuwo, wiira mavekelo ahu ahiphiyeke wa nyuwo.+
45 Nyuwo mooniiriha okhala ikokhola siri oliixuni eriyari ya atthu”.
פ [pe]
46 Awanani ahu ootheene annintthukulela eyano aya.+
47 Woova ni miraakho ti etthu naakhenle ahu,+ vamosa ni omala-malihiwa ni opwetexiwa.+
48 Mmaithoni mwaka annimora maithori manceene ntoko muro, mwaha wa opwetexiwa wa mwaana mwaamuthiyana a atthu aka.+
ע [aine]
49 Maitho aka anninla ahimaalaka, ahikhulumuwaka,+
50 Mpakha Yehova oweha moota atthu awe anihaawa aya, ori ene wiirimu wuuwu.+
51 Maitho aka aakihaaxa, okathi kinaaweha aka anamwane ootheene axithiyana a epooma aka.+
צ [tisaate]
52 Voohikhala mulattu, awanani aka aakixaya okhalaka ntoko wiira ka mwaapalame.
53 Awo annipwetexa okumi aka mulittini. Awo aakivonya maluku.
54 Maasi aakisamiha, nto kinnihimya wiira: “Kihookhwa!”
ק [kaafe]
55 Yehova, kihiitthana nsina nanyu kiri ene mulittini moowiixa.+
56 Mwiiwe nsu naka, muhittiyele maaru anyu wiira muhiiwe okhuwela waka kivekelaka nikhaliheryo.
57 Nihiku kaawiihannaakani mwaahikaattamela, munahimya wiira: “Muhoove”.
ר [reexe]
58 Yehova, nyuwo mwaahaakiherya mulattu aka, nyuwo mwaahoopola okumi aka.+
59 Yehova, nyuwo mooweha ohixariya kiireliwe aka, xontte mukiirele exariya.+
60 Nyuwo muhoona okinlela waya ikuhu, itthu sootheene akiirenle aya.
ש [siini] aahiiso [xiimi]]
61 Yehova, nyuwo muhiiwa oruwana waya ni itthu sootheene akiirenle aya,+
62 Muhiiwa wiira nihiku nootheene, ale ankilupattha yaanilavula itthu wiiphiini akihimyaka miyo.
63 Mwaaweheke, akilanthi ene aahiiso yeemenle ene, awo annikitheya ni masipo aya!
ת [taawu]
64 Yehova, nyuwo munimwaaliva moovarihana ni miteko saya.
65 Nyuwo munimuumiha mirima saya. Ela ti enamuna munrowa anyu waatakhaliha.
66 Nyuwo munoowoomola munanariwe ene, nave munimwaamala-maliha mulaponi mwa Yehova.*
א [aaleefe]
4 Mooneke moota eweero yoowaarya, aayo, eweero yooreerexa eriipihiwe aya!+
Mooneke moota maluku oowaarya+ amwara-mwareyale aya mapuro ootheene sinikumana aya iphiro.+
ב [beete]
2 Atthu a oSiyoni yaawo yaari ooreera ntoko eweero yooreerihiwa,
Anithokoreriwa ntoko mirinki sa oloko,
Muteko yoowo onivariwa ni mulipa onuupa oloko!
ג [kiimele]
3 Hata alapwa a mutakhwani anniwaamwiha axaana aya.
Masi mwaana mwaamuthiyana a atthu aka, oopaka etthu yootakhala+ ntoko mipisa* sa moothakoni.+
ד [taalete]
4 Mwaana mwaamukhaani ninnimphara nlumi nawe mwaha wa ntthona.
Anamwane annivekela yoolya,+ masi khuuvo onaavaha.+
ה [he]
5 Ale yaalya yoolya yooloka annimora mustaraatani mwaha wa etala.+
Ale yinnunwe awaraka ikuwo sooreera,+ annimmaathi vattuurwani.
ו [vaawu]
6 Ohukhummwa* wa mwaana mwaamuthiyana a atthu aka ti wuulupale ovikana ohukhummwa mwaha wa etampi ya oSodoma,+
Weiwo waapwetexiwe mootutuxerya, ohikhalaka mutthu aakhalihenrye.+
ז [saine]
7 Munaziri* awe+ aari ootepa oreera ovikana eneevi, ootepa otteela ovikana eleeti.
Awo yaari ootepa oxeerya ovikana maluku oowaaryexa; awo yaanaarya ntoko maluku aniihaniwa safira.
ח [heete]
8 Mukhalelo aya ti wootepa oriipa ovikana ewiriphi.
Awo khanisuweliwa mustaraatani.
Erutthu aya ehuumelela mmakhuvani mwaya,+ ehuuma ntoko ikhuni.
ט [teete]
9 Fataari ale akhwiiye espaata* waavikana ale akhwiiye etala,+
Yaale apacenrye okhulumuwa mwaha woohikhalana yoolya.
י [iyoote]
10 Athiyana oomoriwa ikharari aawaapeya anaaya.+
Awo yaahaapaka okhala yoolya aya okathi aapwetexiwa awe mwaana mwaamuthiyana a atthu aka.+
כ [kaafe]
11 Yehova ohooniherya onanariwa wawe,
Oomwarexela onanariwa wawe wuulupale.+
Owo oopatta ntoko mooro oSiyoni yoowo onaapaha alisenso awe.+
ל [laamete]
12 Mamwene a mulaponi ni atthu ootheene a elapo ele khiyaakupali
Wiira awanani yanvolowa aviraka mikhora sa oYerusalemu.+
מ [meeme]
13 Eyo yaahiiraneya mwaha wa itampi sa maprofeta awe ni soottheka sa anamukuttho awe,+
Yaawo yaawiivale atthu ahitthenke etthu eriyari awe.+
נ [nuune]
14 Awo yaaneettakasa mustaraatani ntoko atthu oohoona.+
Ephome yaahiwiiriha okhala oohiloka,+
Mpakha ohikhala mutthu aawerya ovara ikuwo saya.
ס [saameke]
15 Awo annikhuweleliwa wiira: “Muroweke! Nyuwo atthu oohiloka! Muroweke! Muroweke! Muhinikwate!”
Okhala wiira awo kharina opuro wookhala ni animweettakasa.
Atthu aahimya eriyari ya maloko wiira: “Awo khakhanle ookhala vaava ni hiyo.*+
פ [pe]
16 Yehova mwaneene ohaamwara-mwarya;+
Owo khontthikela-tho waaweha mooreerela murima.
Atthu khanrowa waattittimihaka anamukuttho,+ nnakhala khanrowa waareerelaka murima axitokweene”.+
ע [aine]
17 Maitho ahu aavela oweha mahala ene, nilipelelaka okhaliheriwa.+
Hiyo nihaavya ni noophavelasa okhaliheriwa ni nloko nahaawerya onoopola.+
צ [tisaate]
18 Awo yaaniweha mavalo ahu ootheene,+ nto khinaawerya weetta mapuro ahu oowaatta atthu.
Okathi wa okhwa wahu onnaattamela, nave mahiku ahu annimala, okhala wiira okathi wa okhwa wahu ori vakhiviru.
ק [koofe]
19 Ale yaanoomola yaari ootepa otthyawa waavikana amurumaasi a musulu.+
Awo aanoomola omiyaakoni, nave aaniipithela woothakoni.
ר [reexe]
20 Ole othanliwe ni Yehova, eyo piiyo, iphumu sahu,+ oovariwa munlittini mwawe moowiixa,+
Yoowo naamuhimya ahu wiira: “Nikhapeleliwaka nuuwo* ninrowa okhala eriyari ya maloko”.
ש [siini]
21 Nyuwo mwaana mwaamuthiyana a wEdomi,+ munikhala elapo ya wUsi, mutthapeke ni mutteeliweke murima.
Masi nyuwo-tho munoovahiwa ekaalisi,+ nave munoohapaliwa ni munimweetta muhiwanre etthu.+
ת [taawu]
22 Nyuwo mwaana mwaamuthiyana a oSiyoni, ehukhumu ya etampi anyu yoomala.
Muluku khontthikela-tho wooroihani weepotthani.+
Masi owo onimoohukhumuni mwaha wa etampi anyu, nyuwo mwaana mwaamuthiyana a wEdomi.
Owo onimooniherya soottheka sanyu.+
5 Khoo Yehova, muupuweleke etthu eniiranenle.
Muniwehe, moone wuuliwa wahu muru.+
2 Etthu nihiyeriwe ahu yoovahereriwa atthu nihinaasuwela ahu, ipa sahu soovahereriwa anamurwa.+
3 Hiyo nri ntoko anamwane ahirina apapaya, aximaamiihu ari ntoko anaamukhweli.+
4 Wiira niwurye maasi ahu nihaana othuma,+ nave nihaana othuma ikhuni sahu.
5 Ale annoomola ahanle onivara,
Nookhulumuwa masi khaninhiiwa niphumuryaka.+
6 Nihookolela ntata nahu wExiitu+ ni wAsiiria+ wiira nikhalane etthu yoolya.
7 Amuhavinre ahu atthenke ahookhwa, masi hiyo nihaana oliva soottheka saya.
8 Vano arumeyi tannilamulela; khuuvo mutthu oniwerya onoopola mmatatani mwaya.
9 Nooleva okumi ahu wiira niphwanye yoolya+ mwaha wa espaata* woothakoni.
10 Erutthu ahu yooviha ntoko efornu, mwaha wa etala yuulupale.+
11 Athiyana a oSiyoni ahuulihihiwa muru, ntoko athiyana a ipooma sa oYuda,+ yaawo ahitonko orupa ni alopwana.
12 Makhulupale aahomphwa matata aya,+ nave axitokweene khanittittimihiwa.+
13 Amiravo annikuxa nxilo, nave anamwane anneettakasa alemeliwe ene ni ikhuni.
14 Makhulupale khaniphwanyaneya-tho vamukhora va epooma,+ nave amiravo khaniipa-tho isipo saya.+
15 Otteeliwa wahu murima woomala, wiina wahu woothatuwa oriipiwa murima.+
16 Ekhara yoomora mmuru mwahu. Nootakhaliwa, okhala wiira noottheka!
17 Mwaha wa etthu ela murima ahu onniniwereya,+
Mwaha wa itthu iya maitho ahu khanoona saana,+
18 Mwaha wa mwaako Siyoni yoowo otatuxiwe milepe.*+ Nave akhwatte aneetteetta weiwo.
19 Masi nyuwo Yehova, munnikilaathi veehiceni vanyu mahiku ootheene.
Olamulela wanyu ti wa mahiku ootheene.+
20 Xeeni munniliyala anyu mahiku ootheene? Xeeni munninyanyala anyu okathi munceene?+
21 Khoo Yehova, munittikiherye wa nyuwo, nto hiyo nnimootthikelani.+
Muniruuhele-tho mahiku ooreera ntoko okathi wa khalai.+
22 Masi, moonikhootta voomalela.
Nyuwo munnithipelela onanariwa ni hiyo.+
Ekapiitulu 1 mpakha 4 masipo a wiikhupanyerya ni alfapeetu a Eheeperi, aahiiso akrostiku.
Aahiiso, “exuuku”.
Aahiiso, “xoowa onniiva”.
Eheeperi, “manyaka ootheene”.
Aahiiso, “iheema”.
Aahiiso, “oopwetexa”.
Aahiiso, “malakiheryo”.
Moolumo a epoesia anirumeeliwa ophavelaka ohimmwa mutthu onooneliwa othunku aahiiso onimoreliwa ikharari.
Aahiiso, “xoowa”.
Aahiiso, “nreetthe”.
Aahiiso, “mareetthe”.
Eheeperi, “etthu yooloka”.
Aahiiso, “exuuku”.
Eheeperi, “vathi va erimu”.
Mwaapalame nttaava na ekunya oniihaniwa avestruz.
Eheeperi, “Etampi”.
Eheeperi, nazír, nintaphulela “Mutthu ovahereriwe; othanleliwe; ovalaanyiwe”.
Aahiiso, “amukhwiiye xoowa”.
Aahiiso, “okhala vaava ntoko anamurwa”.
Eheeperi, “Vamuuttutthini vawe”.
Aahiiso, “xoowa”.
Aahiiso, “opuro ohinikhaliwa”.