EPAPHELO YOOPACERYA PAULO AAMULEPENLE AWE TIMOOTHEYO

1 Miyo Paulo, murummwa a Kristu Yesu, kirummwale ni Muluku, Moopoli ihu, vamosa ni Kristu Yesu, nlipelelo nahu,+ 2 kinnimulepela mwanaka Timootheyo,*+ yoowo ori oororomeleya+ mmutekoni mwa Apwiya, kiiraka:

Oreera murima wuulupale ni omoriwa ikharari ni murettele wa Muluku Tiithi ihu, vamosa ni wa Pwiya ahu Kristu Yesu, okhale ni nyuwo.

3 Ntoko koovekenlyaakani wiira muhale wEefeso okathi kaaphavela aka orowa oMasedonia, vano kinnoovekelani-tho wiira mwaalopole oratteene atthu akina, wiira ahiixuttiheke itthu soowoothiwa, 4 nnakhala ahiwiriyaneke myaha soowoothiwa+ ni okontari masina a amuhavinre. Itthu siiso khasirina efaita,+ ohiya-vo, sinniwiiriha atthu ohimya itthu ahinisuwela aya. Nave, khasiniirela mpantta itthu Muluku onnivaha awe, seiyo sinlipiha waamini. 5 Etthu enikiiriha ovaha malakiheryo ala,* tiila: wiira mphentaneke+ ni murima wooreera, mukhalaneke murima wooloka ni waamini+ woohoothererya. 6 Atthu akina aakhootta itthu iya, vano annivaanyihana ithiru.+ 7 Awo aniphavela okhala alipa-oowiixuttiha+ Nlamulo, masi khanisuwela itthu anihimya aya, nnakhala khanisuwela itthu anithipelela aya wiixuttiha.

8 Hiyo noosuwela wiira Nlamulo ti nooreera, vakhala wiira mutthu onneettela oratteene. 9 Nave noosuwela wiira Nlamulo khanipakeliwe anaxariya, masi nipakeliwe atthu ootakhala,+ oohiiwelela, ahinimuttittimiha Muluku, anatampi, oohiroromeleya, ale annanariha itthu soowaarya, ale aniwiiva apapaya ni amamaya, anawiive, 10 atthu anrupihana voohiloka,* alopwana anrupihana yaawo-ru,* ale aniwiiya atthu, anawoothe, ale anlapha yoothaka ni khula etthu enivirikanya mwiixuttiho wooreera.*+ 11 Mwiixuttiho ola onikhuma wa Muluku oohakalala, ottharaka ihapari sooreera soovuwa, seiyo kiroromeliwe aka.+

12 Kinnimuxukhuru Kristu Yesu, Pwiya ahu, yoowo onikivaha ikuru, maana ookoona okhala oororomeleya, okivahaka muteko wa Muluku,+ 13 nnaamwi khalai kanveeha Muluku, kaalupattha arumeyi awe ni kaari mutthu oowiisoona.+ Hata vari siiso, Muluku ookimorela ikharari, okhala wiira kaapaka itthu iyo kihisuwelaka ni kihirina waamini. 14 Masi, Apwiya aakireerela murima vaalupalexa, nave kinnaamini ni ophenta mwaha woowi ka mwiixutti a Kristu Yesu. 15 Moolumo ala teekeekhai, nave hiyo nikupaliki ni murima wootheene wiira: Kristu Yesu ohoorwa moolumwenkuni wiira owoopole anatampi.+ Eriyari ya anatampi awo, miyo kitepanxe okhala natampi.+ 16 Masi, koomoreliwa ikharari wiira mwaha wa miyo kitepanxe okhala natampi, Kristu Yesu ooniherye opixa wawe murima wootheene, okikhalihaka ntakiheryo na ale anrowa omwaamini, wiira aphwanye okumi ohinimala.+

17 Vano, Mwene onikhala mahiku ootheene,+ ohinikhwa,+ ohinooneya,+ Muluku mmosa paahi,+ ottittimihiwe ni ovuwihiwe mahiku ootheene. Amen.

18 Nyuwo mwanaka Timootheyo, kinnoovahani malakiheryo ala,* kittharihelaka iprofesia soohimyani nyuwo, wiira muttharaka seiyo, muthipeleleke owana ekhotto yooreera,+ 19 mukhalanaka waamini ni murima wooreera,+ itthu seiyo atthu akina akhoottale aya. Nto eyo yoohonona waamini waya, ntoko pakiti onyaanyiwe mphareya. 20 Mwa atthu awo, ookhala Himeneyo+ ni Alexandre, yaawo kaavaherenrye aka wa Satana,+ wiira avahiwe ehukhumu ni ahinveeheke Muluku.

2 Tivo, opacerya wene, kinootumereryani wiira mmuxontteleke Muluku, munvekeleke ni mmuxukhureleke, mwaha wa atthu a makhalelo ootheene, 2 waahela muhina mamwene ni anamalamulela ootheene,+ wiira nikhaleke oomaaleleya ni murettele, nimurumeelaka Muluku ni murima wootheene.+ 3 Eyo etthu yooloka ni enimusivela Muluku, Moopoli ihu,+ 4 yoowo oniphavela wiira atthu a makhalelo ootheene yoopowe+ ni akhalane osuwela weekeekhai. 5 Muluku ori mmosa,+ nave ole oniwaataaniha+ atthu ni Muluku,+ ori mmosa, eyo piiyo, Kristu Yesu. Mulopwana ola,+ 6 oovaha okumi awe, ntoko mukuttho onoopola, yoowo oniphiyerya owoopola itampi atthu ootheene.*+ Itthu iya sinoolavuliwa waphiya okathi aya. 7 Tivo, Muluku ookithanla wiira kikhale namalaleerya+ ni murummwa,+ wiira kiwiixuttihe ale ahikhanle ayuda+ waamini ni kiwiixuttihe ekeekhai. Miyo kinilavula ekeekhai, nkinootha.

8 Siiso, kiniphavela wiira khula opuro onithukumana anyu, alopwana avekeleke, nave ahaana opaka eyo ni murima wooloka,+ ahinanariwe+ nnakhala ahivaanyihanaka.+ 9 Siiso-tho, athiyana ewareke ikuwo ntoko vaniphwanela aya,* vookhalela ni voohuuliha muru. Ehitthaveke ikharari ephavelaka ottakala.* Ehiiphwaneliheke ni eweero aahiiso ipeerola,* wala ikuwo sa musurukhu munceene.+ 10 Masi yiiphwaneliheke ntoko vanireerela aya athiyana animoova Muluku.+ Awo ahaana ovara miteko sooreera, nto opaka eyo tonrowa okhala wiiphwaneliha waya.

11 Okathi athiyana aniixutta aya, ahaana omaala ni awiiweleleke alopwana voohinlaseya.+ 12 Nkiniweemererya athiyana wiixuttiha aahiiso waawerya alopwana, masi ahaana omaala.+ 13 Adamu taapacenrye opattuxiwa, nuumala-vo onapattuxiwa Eva.+ 14 Nave-tho, Adamu khaawokiwe, masi muthiyana taawokiwe voomalela,+ khukhala natampi. 15 Masi, muthiyana onookhapeleleya mwaha wa waayara anamwane.+ Eyo enimwiiraneya aahihiye-ru waamini, ophenta, okhala ooreera vamaithoni va Muluku ni okhalana muupuwelo wooloka.+

3 Moolumo anihimya aka teekeekhai: Akhala mulopwana oniphavela okhala mutokweene onihoolela,+ owo onniphavela etthu yooreera. 2 Mutokweene onihoolela, ohaana weettiha saana okumi awe wiira atthu ahimphwanyaneke mulattu. Okhaleke mulopwana orina muthiyana mmosa paahi, osuweleke wiiphimela itthu sootheene, uupuweleke vookhalela,+ okhaleke oowiitthokiha saana, oowaakhela aletto,+ onisuwela wiixuttiha.+ 3 Ohikhaleke namuhapaliwa,+ nnakhala oowali, masi okhaleke ooreera murima,*+ ohininyakulihana,+ ohiniphenta musurukhu.+ 4 Okhaleke mulopwana oneettiha saana etthoko awe, okhalaneke anamwane aniiwelela ni arina mweettelo wooloka,+ 5 (maana akhala mulopwana ohinisuwela weettiha saana etthoko awe, onrowa owerya sai okhapelela muloko wa Muluku?) 6 Ohikhale mulopwana opatisiwe niinaano,*+ wiira ohiixinnuwihe ni ohiphukeliwe ntoko Diabo ophukeliwe awe. 7 Nave-tho, ohaana wooniwaka saana ni atthu ahikhanle a mmulokoni,+ wiira ohilavuliweke voohikhalela ni ohimorele vantaphani na Diabo.

8 Siiso-tho, arumeyi ookhaliherya ahaana okhala oororomeleya, ehootheke, ehiwuryeke eviinyu yinceene, ehiphaveleke ophwanya itthu voohiphiyeriwa,+ 9 evarexexeke esiiri ya Muluku ya waamini, erina ene murima wooreera.+

10 Nave, awo apaceryeke toko owehiwa yaaphwanelelaka; nuumala-vo, arumeeleke ntoko arumeyi, vakhala wiira kharina mulattu.+

11 Athiyana ekhaleke oororomeleya, ehiwootheryeke atthu,+ esuweleke wiiphimela itthu sootheene, eroromeleyeke mwa itthu sootheene.+

12 Arumeyi ookhaliherya ekhaleke alopwana arina muthiyana mmosa paahi, eweettiheke saana anaaya ni yeettiheke saana etthoko aya. 13 Tthiri, alopwana anivara saana muteko wa Muluku, anniiphwanyiha nttittimiho ni annilavula omwaamini waya Kristu Yesu ahoovaka etthu.

14 Miyo kinniphavela vanceene woowehani, masi kinnoolepelani itthu iya wiira kaahirwe niinaano, 15 musuweleke moota wooweetta vatthokoni va Muluku,+ eyo piiyo, muloko wa Muluku mukumi. Muloko owo ti epilaari ni alisenso eekeekhai. 16 Mweekeekhai, esiiri ya okhala oororomeleya wa Muluku ti yuulupale: ‘Yesu ohiixooniherya ntoko mutthu,+ oohimmwa okhala naxariya orina ene erutthu ya wiirimu,+ ookhumelela ohoolo wa malaikha,+ oolaleiwa eriyari ya ale ahikhanle ayuda,+ ookupaliwa moolumwenkuni,+ ohaakheliwa wiirimu ni oovuwihiwa’.

4 Masi, moolumo anikhuma wa Muluku annihimya oratteene wiira ohoolo, onoophiya tthiri okathi atthu akina anrowa aya ohiya waamini, awiriyaneke ihapari soowoothiwa, seiyo sinikhala ntoko sinikhuma wa Muluku.+ Nave, anrowa owiriyanaka itthu siniixuttihiwa ni malaikha ootakhala. 2 Awo anrowa owiriyanaka itthu soowoothiwa sinilavuliwa ni anawoothe,+ yaawo murima aya okhutureyale,* okhalaka ntoko opahiwe ni eyuuma yooviha. 3 Awo annaakhoottiherya atthu othela aahiiso otheliwa+ ni annaakhoottiherya olya soolya sikina,+ seiyo Muluku opattunxe awe, wiira ale anaamini+ ni anisuwela oratteene ekeekhai, elyeeke+ ni emuxukhuruku Muluku. 4 Itthu sootheene sipattuxiwe ni Muluku ti sooreera,+ khiivo ekhanle ahu oothanya,+ vakhala wiira nnaakhela ninvekelaka Muluku ni nimuxukhurelaka, 5 maana nuulumo na Muluku ni ovekela, sinnireeriha soolya iyo.

6 Mwaavahaka miruku iya axinna, munookhala murumeyi oororomeleya a Kristu Yesu, oniixuttihiwa ni moolumo oowaamini ni a mwiixuttiho wooreera, yoowo muneettela anyu oratteene.+ 7 Masi mukhootteke myaha soowoothiwa sininveeha Muluku,+ seiyo sinilavuliwa ni athiyana akina oowuuluvala. Ohiya-vo, mwiilimaleliheke omoova Muluku ni mphaveleke wooniherya eyo. 8 Okhomaaliha erutthu onikhaliherya vakhaani. Masi, ororomeleya onnimukhaliherya mutthu mwa itthu sootheene, okhala wiira onimwaakhela mareeliho vano ni onimwaakhela-tho ohoolo.+ 9 Moolumo ala teekeekhai, nave hiyo nikupaliki ni murima wootheene. 10 Tivonto, hiyo ninnivara muteko niilipihaka ni wiimananiha vanceene,+ okhala wiira ninnimuroromela Muluku mukumi, yoowo ori Moopoli+ a atthu ootheene,+ vanceenexa ale oowaamini.

11 Muhihiye waatumererya atthu ni owiixuttiha itthu iya. 12 Muhimuhiye mutthu oothanyakani mwaha wa okhala mmiravo. Ohiya-vo, mukhaleke ntakiheryo nooloka para ale oowaamini mwaha wa moolumo anyu, mweettelo anyu, ophenta wanyu, waamini wanyu ni makhalelo anyu ooreera. 13 Mpakha okathi kinrowa aka ophiya iwo, muhihiye wiilipiherya osoma ohoolo wa atthu,+ waalipiha* akina wiira avareke itthu sooreera ni owiixuttiha atthu. 14 Muhihiye owerya murina anyu, weiwo nvahiwe anyu erumeeliwaka eprofesia, okathi nikhuuru na axitokweene naawiixaathenryaayani matata.+ 15 Muupuweleleke* itthu iya, mukhaleleke nthiti seiyo, wiira atthu ootheene yooneke wiira munnirowa ohoolo. 16 Okathi wootheene, mukasoopeke mukhalelo anyu ni moota muniixuttiha anyu.+ Nvarexexeke itthu iya, nto mwiiraka siiso, munimoopola okumi anyu ni okumi wa atthu anoowiriyanani.+

5 Muhimpwapweleke vootakhala mulopwana oowuuluvala.+ Ohiya-vo, mmuthokoreryeke ntoko paapa anyu. Vano, mwaathokoreryeke amiravo ntoko axinninyu. 2 Athiyana oowuuluvala, mwaathokoreryeke ntoko aximaminyu. Nave athiyana oohuuluvala, mwaathokoreryeke ntoko axirokorinyu ni mukhalelo wooloka.

3 Mwaattittimiheke ni mwaakhapeleleke anaamukhweli athiyana, yaawo anikhala mekhaya.*+ 4 Masi, akhala wiira muthiyana naamukhweli ookhalana anamwane ni axisulwaawe, awo ahaana wooniherya wiira annimoova Muluku, yaakhapelelaka amusi aya.+ Nave, awo ahaana waavaha itthu sinaathowa axipapaya ni aximamaya, vamosa ni axipiipi aya ni axitaata aya.+ Eyo ti etthu enimusivela Muluku.+ 5 Vano, muthiyana naamukhweli, yoowo onikhala mekhawe tthiri ni ohirina etthu, onnimuroromela Muluku+ ni khonihiyererya omuxonttela ni onvekela, othana ni ohiyu.+ 6 Masi muthiyana naamukhweli, yoowo oniphavela paahi itthu sinimusivela,* owo ohookhwa hata ori ene mukumi. 7 Tivo, mwaavaheke malakiheryo ala,* wiira ohikhale mutthu onrowa waahimyana itthu soohiloka. 8 Tthiri, akhala mutthu ohinaakhapelela amusi awe, vanceenexa ale anikhala vatthokoni vawe, owo onnikhootta waamini. Nave tootepa otakhala onvikana mutthu ohinaamini.+

9 Mmuhele valistani muthiyana naamukhweli, orina iyaakha sinivikana 60, yoowo aari oororomeleya wa iyawe, 10 nave aasuweliwe mwaha wa miteko sawe sooreera,+ ntoko waahuwa anamwane,+ owaakhela aletto,+ orapiha inawu sa ale oororomeleya,*+ waakhaliherya atthu oohaawa+ ni wiivahererya ovara miteko sootheene sooreera.

11 Masi, muhaahele valistani athiyana anaamukhweli oohuuluvala, okhala wiira okathi ophavela waya orupihana onaakhoottiherya aya omurumeela Kristu, awo anrowa ophavelaka otheliwa. 12 Awo anookhalana mulattu mwaha woohiya waamini yaarina aya woopaceryani.* 13 Nave-tho, anaamukhweli awo anniixutta okhala oolosowa, yeetteettaka mmawaani. Ohiya paahi wiixutta okhala oolosowa, masi-tho anniixutta owaapa atthu ni anniikeliha+ myaha sihikhanle sawaya. Siiso, annilavula itthu yahaareerela aya olavula. 14 Tivo, kiniphavela wiira athiyana anaamukhweli oohuuluvala, etheliweke,+ yaayareke anamwane,+ ekhapeleleke etthoko aya wiira ahaavahe nthowa ale annivirikanya, wiira enaapeke. 15 Mweekeekhai, athiyana akina anaamukhweli aahiya ephiro yooreera, enamutthara Satana. 16 Akhala muthiyana oowaamini orina mmusi awe naamukhweli, owo tonrowa omukhaliheryaka naamukhweli owo. Muloko khorina muritti woomukhaliherya. Siiso, muloko onrowa waakhaliheryaka athiyana anaamukhweli*+ oohaawa, ahirina mutthu oowaakhaliherya.

17 Axitokweene anihoolela saana muloko,+ ahaana ovahiwa nttittimiho nuulupale,+ vanceenexa ale anivara muteko ni nthiti, alavulaka nuulumo na Muluku ni yiixuttihaka.+ 18 Soolempwa sinihimya wiira: “Muhitthukwe iyano sa epooyi, okathi eninyakela aya ipyo”+ ni “Namuteko onniphwanela oliviwa”.+ 19 Akhala mutthu mmosa onimuhimyana etthu mutokweene, muhipake etthu. Masi yakhala atthu anli wala araru animuhimyana etthu,+ nyuwo pooti opaka etthu. 20 Mwaapwapweleke+ ohoolo wa atthu ootheene ale anipaka etampi,+ wiira akina yooveke. 21 Kinnootumereryani oratteene, ohoolo wa Muluku ni wa Kristu Yesu ni wa malaikha oothanliwa, wiira mutthareke malakiheryo ala muhaathanyaka nnakhala muhaathanlaka atthu.+

22 Muhaakuveleke omwiixaatherya matata mutthu,*+ nnakhala muhiireleke mpantta itampi sa atthu akina. Muhihiye okhalana mukhalelo wooloka.

23 Muhiwuryeke-tho maasi-ru paahi,* masi nwuryeke eviinyu vakhaani mwaha wa mmirimani mwanyu* ni mwaha woowi munniwereiwa ikwaha sinceene.

24 Itampi sa atthu akina, sinnisuweliwa ni atthu ootheene, nto awo anniphukeliwa voohipisa. Masi itampi sa atthu akina, sinisuweliwa nuuvira okathi.+ 25 Siiso-tho, miteko sooreera sinnisuweliwa ni atthu ootheene,+ nave hata sihisuweliwaka, iyo khasinwerya wiipithihiwa.+

6 Ale ari ipottha, yaattittimiheke vanceene+ ale anaavarela aya muteko ntoko vaniphwanela aya, wiira nihiveehiwe nsina na Muluku ni mwiixuttiho awe.+ 2 Nave, ale ari ipottha, anaavarela muteko makristau, ahihiye waattittimiha mwaha wookhala axinna. Masi, ahaana waavarela saana muteko, okhala wiira ale anittottela mureerelo muteko aya, ti makristau ni axinna oophentiwa.

Muhihiye wiixuttiha ni waatumererya atthu itthu iya. 3 Akhala mutthu onimwarya-mwarya soowiixuttiha soowoothiwa ni ohineemererya soowiixuttiha sooreera,*+ seiyo sinikhuma wa Pwiya ahu Yesu Kristu, nnakhala ohineemererya soowiixuttiha sinooniherya moota nikhanle ahu oomurumeela Muluku ni nthiti,+ 4 mutthu owo toowiixinnuwiha vanceene ni khiivo etthu enisuwela awe.+ Nave omusivela onyakulihana ni ovaanyihana moolumo.+ Itthu iyo sinnikumiherya nrima, owana-wana, owootherya akina,* ohaaroromela atthu akina, 5 omakela onyakulihana myaha saamukhaani ni atthu ahirina muupuwelo wooloka+ ni ahinisuwela ekeekhai, yuupuwelaka wiira omurumeela Muluku ni nthiti onniphwanyiha mureerelo.+ 6 Mweekeekhai, ole onimurumeela Muluku+ ni nthiti ni onihakalala ni itthu orina awe, onniphwanya mureerelo munceene. 7 Okathi naayariwe ahu moolumwenkuni-mu, khinaaruhale etthu. Nave okathi ninrowa ahu okhwa, khaninkuxa etthu.+ 8 Tivo, naakhalanaka-ru etthu yoolya ni etthu yoowara,* nitteeliweke murima ni itthu iyo.+

9 Ale aniphavela othaaciri, anneehereriwa ni annimorela vantaphani,+ nave annikhala ipottha sa itthu sinceene sihirina efaita ni sootakhala, seiyo sinaakumiherya maxakha ni okhwa.+ 10 Ophenta musurukhu ti maphattuwelo a itthu sootheene soonanara. Nto mwaha wa ophenta musurukhu, atthu akina aahiya waamini ni ahiiphwanyiha maxakha manceene.+

11 Masi, nyuwo muri murumeyi a Muluku, mutthyaweke itthu iya. Ohiya-vo, mphaveleke ni murima wootheene exariya, omurumeela Muluku ni nthiti, waamini, ophenta, ovilela, ni okhalana murima woomaala.+ 12 Nwaneke ekhotto yooreera ya waamini. Nvarexexeke okumi woohimala. Muluku oowiihanani wiira mwaakhele okumi owo, nave nyuwo moolaleya okumi owo, ohoolo wa anamoona anceene.

13 Kinnoorumani ohoolo wa Muluku, yoowo oniiriha itthu sootheene okhala sikumi ni wa Kristu Yesu, yoowo aalavunle oratteene ohoolo wa Ponsio Pilato,+ ohoovaka etthu, 14 wiira mwiiweleleke yooruma muhirina nthowa ni muhihimyaniwaka etthu yootakhala, mpakha ophiya okathi Pwiya Yesu Kristu+ onrowa awe wiixooniherya. 15 Owo toohakalala ni ti Pwiya Oowerya, nave onrowa wiixooniherya waphiya okathi aya. Ti Mwene a mamwene ootheene ni Pwiya a mapwiya ootheene.+ 16 Owo paahi tohinikhwa+ ni ti yoowo onikhala mapuro oovuwa atthu ahiniwerya aya waattamela,+ mapuro yaawo ahitonko wooniwa aahiiso ahinooniwa.+ Ottittimihiwe ni ovahiwe owerya voohimala. Amen.

17 Mwaavahe malakiheryo* athaaciri a olumwenku ola,* wiira ahiisooneke ni wiira ahiroromeleke mihakhu sinimala.+ Masi amuroromeleke Muluku, yoowo onniiriha othaaciri, onivahaka itthu sootheene sinnihakalaliha.+ 18 Mwaaleele wiira avareke miteko sooreera, akhaleke athaaciri a miteko sooreera, evaheke, akhaleke oolikana ene wiira yaakaweleke atthu akina itthu sirina aya.+ 19 Opaka eyo, onrowa olikanaka ni wiithukumanyerya mihakhu sinikhuma wa Muluku. Eyo enitaphulela wiira annimpaka alisenso ooloka a muhoolo,+ wiira avarexexe okumi weekeekhai.+

20 Nyuwo Timootheyo, muhihiye etthu mwaakhenle anyu+ wa Muluku. Muhiwiriyaneke moolumo eethiru aninvirikanya Muluku ni miyuupuwelo sa atthu aniihimya osuwela,+ masi osuwela waya onivirikanya ekeekhai. 21 Akina annooniherya osuwela iwo, nto eyo yoowiiriha ohiya waamini.

Oreera murima wuulupale wa Muluku, okhale ni nyuwo.