EPAPHELO YOOPACERYA YA PEDRU

1 Miyo Pedru, murummwa+ a Yesu Kristu, kinoolepelani nyuwo oothanliwa, mmwarenle ntoko anamurwa, mittetthe sa oPonto, oKalaasia, oKapadosia,+ wAsia ni oBitinia. 2 Muluku, Tiithi ihu a wiirimu, ohoothanlani moovarihana ni etthu aalakenle awe khalai ene.+ Ohooreerihani ni ikuru sawe soowaarya.+ Owo oopaka eyo wiira mmwiiweleleke ni wiira ooreeriheni orumeelaka ephome ya Yesu Kristu.+

Murettele ni oreera murima wuulupale wa Muluku, sikhale ni nyuwo voowaatta.

3 Ottottopeliwe Muluku, Tiithi a Pwiya ahu Yesu Kristu, okhala wiira oowiirihani oyariwa vasya+ mwaha wa omoriwa wawe ikharari wuulupale, wiira mukhalane nlipelelo+ mwaha wa Yesu Kristu, yoowo ohihimuxiwe mwa alipa-ookhwa,+ 4 wiira mwaakhele etthu muhiyeriwe anyu ehinintta, ehinihononeya ni ehinimala.+ Etthu eyo, musukeriwe wiirimu,+ 5 nyuwo munikhapeleliwa ni Muluku, orumeelaka owerya wawe mwaha wa waamini wanyu. Owo onookhapelelani wiira owoopoleni mahiku ookiserya. 6 Mwaha wa itthu iyo, nyuwo munnitteeliwa murima vanceene, nnaamwi mweehereriwaka mwa okathi vakhaani ni itthu soovirikana, masi woonasa wene, muhaana weehereriwa,+ 7 wiira waamini wanyu weehereriwaka,+ owiiriheni ottottopeliwa, ovuwihiwa ni ottittimihiwa, okathi Yesu Kristu onrwa awe. Waamini wanyu iwo, wookhalana efaita yuulupale ovikana eweero. Eweero eyo ennihononeya, nnaamwi ereerihiwe ene ni mooro.+ 8 Nyuwo munnimphenta Kristu, nnaamwi muhitonko omoona. Munnooniherya omwaamini, nlelo muhimoonaka. Nto munnitteeliwa murima vanceene, mwa enamuna ehiniweryaneya otthokiherya, 9 maana munnisuwela wiira waamini wanyu onoowiirihani woopoliwa.+

10 Woopoliwa iwo, waahihimmwa ni maprofeta yaalavunle sa oreera murima wuulupale wa Muluku, mooniheriwe anyu. Awo yaahitokosa aphavelaka vanceene osuwela woopoliwa iwo.+ 11 Maprofeta awo, yaanitokosa saana yeettihiwaka ni ikuru soowaarya, wiira asuwele okathi ene saarowa aya omwiiraneela Kristu+ itthu saahimmwale khalai ene. Ikuru iyo saahooniherya khalai ene, moota Kristu aarowa awe ohaawa+ ni moota aarowa awe ovuwihiwa. 12 Muluku aahaasuweliha maprofeta wiira khahiyo yairumeela mmansaya, masi yoorumeelani nyuwo. Maprofeta awo aalepa itthu muleeliwe anyu, nto nyuwo muhiiwa itthu iyo ni ale yoolalenryeni ihapari sooreera, akhaliheriwaka ni ikuru soowaarya, seiyo saakhumme wiirimu.+ Malaikha anniphavela vanceene osuwela saana itthu iyo.

13 Mulokiherye muupuwelo anyu wiira nvare muteko.+ Mpakeke itthu sootheene mwa miruku.+ Mulipeleleke oreera murima wuulupale wa Muluku, onrowa wooniheriwa okathi Yesu Kristu onrwa awe. 14 Ntoko anamwane oowiiwelela, muheetteleke-tho makhalelo anyu ootakhala, mweettela anyu khalai, okathi mwahaamusuwela anyu Muluku. 15 Ohiya-vo, mweettelo anyu wootheene okhaleke woowaarya, okhala wiira Muluku owiihanneni, toowaarya.+ 16 Tthiri, voolempwa wiira: “Mukhaleke oowaarya, okhala wiira miyo koowaarya”.+

17 Okhala wiira munninvekela itthu Tiithi, yoowo oniphuka milattu ohimuthanlaka mutthu+ ni onittharihela miteko sa khula mmosa, mweetteke mmoovaka,+ okathi muri anyu ntoko anamurwa vathi-va. 18 Nyuwo moosuwela esisapo moopolaniwe anyu, mwaha wa makhalelo anyu oohiloka, yaawo muravihiwe anyu+ ni amuhavinre anyu. Khamoopoliwe ni itthu sinipweteya, ntoko eweero aahiiso eparatha. 19 Ohiya-vo, moopoliwe ni ephome+ ya Kristu, erina efaita yuulupale, ntoko ephome ya mwaapwittipwitthi+ ooloka ni oohirakala.+ 20 Kristu yoowo othanliwe ni Muluku, olumwenku ohinatthi opattuxiwa,*+ vano ohooniheriwa mwaha wa nyuwo mahiku ala ookiserya.+ 21 Mwaha wa Yesu, nyuwo munnimukupali Muluku,+ yoowo omuhihimunxe Yesu mwa alipa-ookhwa,+ khunvuwiha,+ wiira mmwaaminiki ni mmulipeleleke Muluku.

22 Vano nyuwo muhiireeriha mwiiwelelaka ekeekhai, wiira mwaaphenteke axinninyu voohoothererya.+ Tivo, mphentaneke vanceene ni murima wootheene.+ 23 Nyuwo mooyariwa vasya+ ni epyo* ehinintta,+ ohiya ni epyo enintta. Tthiri, muyariwe ni nuulumo na Muluku mukumi ni ohinimala.+ 24 Veekeekhai, “apinaatamu ootheene ari ntoko malaxi; ovuwa waya wootheene onlikana ni ifilori sa mutakhwani. Malaxi annuuma, ifilori sinnimora, 25 masi moolumo a Yehova,* annikhala mahiku ootheene”.+ “Moolumo” awo, ti ihapari sooreera mulaleeriwe anyu.+

2 Tivo, muhiye owoka, wootha, nrima, waapa ni itthu sootheene sootakhala.+ 2 Ntoko anamwane ayariwe niinaano+ aniphavela aya vanceene waamwa nipele, siiso-tho, nyuwo mphaveleke vanceene nuulumo na Muluku wiira munnuwe ni moopowe.+ Nuulumo na Muluku ninlikana ni eleeti ya nipele.* 3 Nyuwo moosuwela saana wiira Apwiya tooreera murima.

4 Nwaattamele Apwiya, yaawo ari nluku nikumi nikhoottiwe ni atthu,+ masi nithanliwe ni Muluku,+ maana nookhalana efaita yuulupale. 5 Ntoko maluku makumi, nyuwo mwa empa etekiwe sirumeeliwaka ikuru soowaarya sa Muluku.+ Nave mookhalihiwa anamukuttho oowaarya, wiira nvaheke mikuttho+ sinivarihana ni ikuru soowaarya sa Muluku ni sinimusivela yoowo mwaha wa Yesu Kristu.+ 6 Yoolepa enihimya wiira: “Nkawehani! Koothanla nluku noowaarya wiira kipwehe oSiyoni. Nlo nluku nuulupale na alisenso. Khuuvo mutthu onaamini nluku nno, onrowa othanana”.+

7 Tivonto, okhala wiira munnaamini, owo ookhalana efaita yuulupale para nyuwo. Masi para atthu ahinaamini, Soolempwa sinihimya wiira: “Nluku nenlo alipa-ooteka empa yaakhontte aya,+ nookhalihiwa nluku nuulupale na alisenso”.+ 8 Nlo ti “nluku nnaakwattuliha* atthu ni mwala onaatthekiha atthu”.+ Atthu awo annikwattuliwa, okhala wiira khaniiwelela nuulumo na Muluku. Tthiri eyo ti emalelo ya atthu awo. 9 Masi nyuwo mwa “atthu oothanliwa,+ anamukuttho anirumeela ntoko mamwene, nloko na atthu oowaarya,+ nloko na atthu a Muluku. Nyuwo moothanliwa wiira mulaleye itthu sootikiniha sa Muluku”,+ yoowo owiihanneni mweepiphini mwaari anyu, wiira mukele moowaaryani mwawe mooreerexa.+ 10 Khalai, nyuwo khahiyo mwaari atthu a Muluku,+ masi vano mwa atthu awe. Khimwaamoreliwe ikharari, masi vano, moomoreliwa ikharari.+

11 Anna oophentiwa, nyuwo mwa aletto ni anamurwa+ vathi-va. Tivo, kinootumereryani wiira mukhootteke itthu soohiloka erutthu eniphavela aya,+ seiyo sinivirikanya makhalelo anyu ooreera.+ 12 Mweettelo anyu okhaleke wooreera eriyari ya atthu+ a vathi-va, wiira yaawootheryakani okhala atakhali, aweheke miteko sanyu sooreera+ ni anvuwiheke Muluku nihiku onrowa awe waaphukela atthu.

13 Mwaha wa Apwiya, mwiiweleleke voohinlaseya okhulupale* wootheene okumiheriwe ni apinaatamu.+ Nave, mmwiiweleleke mwene,+ mwaha wa okhala mukhulupale. 14 Aahiiso, nwiiweleleke makuvernatoro, yaawo athanliwe ni mwene wiira yaavaheke ehukhumu atakhali, masi yaattottopeleke ale anipaka itthu sooreera.+ 15 Tthiri, Muluku oniphavela wiira niireke itthu sooreera wiira niwale iyano sa alolo, yaawo anilavula itthu ahinsuwela aya.+ 16 Mweetteke ntoko atthu ootaphuwa,+ masi muhirumeeleke otaphuwa iwo wiira mukhuneele* itthu sootakhala munivara anyu.+ Ohiya-vo, mweetteke ntoko arumeyi a Muluku.+ 17 Mwaattittimiheke atthu ootheene.+ Mwaaphenteke anna a olumwenku wootheene.+ Mmooveke Muluku.+ Mmuttittimiheke mwene.+

18 Nyuwo anamuteko, nwiiwelekeke mapatarau anyu muhinlaseyaka. Nwooveke vookhalela,+ ohiya paahi ale ooreera murima ni anaathokorerya atthu, masi-tho ale oovila waahakalaliha. 19 Muluku onnisiveliwa ni mutthu oniimananiha okhalana murima* wooloka ohoolo wa Muluku, onivilela mixankiho ni onihaawa hata ohitthenke.+ 20 Muniphwanya-ni ovilela omaniwa, mwaha wa itthu sootakhala mwiirale anyu?+ Masi, mwaavilelaka ohaawa mwaha wa opaka itthu sooreera, eyo etthu enimusivela Muluku.+

21 Tthiri, nyuwo muhiihaneliwa ohaawa iwo, okhala wiira Kristu nave oohaawa mwaha wa nyuwo.+ Nto, ohoohiyeryani ntakiheryo wiira mutthareke vakhiviru vene mavalo awe.+ 22 Owo khonapake etampi,+ nnakhala khotonko wootha.+ 23 Okathi aaruwaniwa awe,*+ owo khaaruwana.*+ Okathi aahaaxiwa awe,+ khanla ikuhu, masi aamuroromela Muluku, yoowo oniphuka milattu mwa xariya.+ 24 Owo aahikuxa itampi sahu+ mweerutthuni mwawe vamwirini,*+ wiira nikhwele itampi, masi nikhalane okumi mwaha wa exariya. Nave “mwaha wa makhwatta awe, nyuwo moopenuxiwa”.+ 25 Tthiri, nyuwo mwaari ntoko ipwittipwitthi saarimenle.+ Nto vano, mootthikela wa makampusi anyu+ ni mutokweene onikhapelela ikumi sanyu.

3 Nave, nyuwo athiyana ootheliwa, nwiiweleleke axiiyanyu muhinlaseyaka.+ Vano, awo yaahiiweleleke Nuulumo na Muluku, mweettelo anyu owiirihe wiiwelela, hata muhilavunle etthu,+ 2 okhala wiira aaweha mweettelo anyu wooloka+ ni nttittimiho nanyu nuulupale. 3 Oreera wanyu ohikhaleke wa weerutthuni, ntoko otthava ikharari, owara ipulseera* sa eweero+ ni ikuwo sa musurukhu munceene. 4 Masi oreera iwo okhaleke wa vamurimani, weiwo ohinooneya, ohinintta, onooniheriwa ni murima woomaala ni woowiiyeviha.+ Oreera iwo torina efaita yuulupale vamaithoni va Muluku. 5 Ti siiso yaiphwaneliha aya athiyana oowaamini a khalai, yaawo yaamulipelela Muluku, awiiwelelaka axiiyaya voohinlaseya. 6 Sara aahiira siiso. Owo aanimwiiwelela Abrahamu, amwiirelaka pwiyaka.+ Nave nyuwo munookhala anaawe, mwaahihiye-ru opaka itthu sooreera ni mwaahooveke etthu.+

7 Siiso-tho, nyuwo alopwana oothela, musuweleke saana mukhalelo a mwaarinyu wiira mukhaleke nuuwo vookhalela. Mwaattittimiheke athiyana awo,+ ntoko siisaale munikhapelela anyu mwaapu woowaakuva ophweeya, okhala wiira Muluku ohaareerela murima, aavaha okumi, ntoko nyuwo nvahiwe anyu nuuwo.+ Mwaahiire siiso, Muluku khonrowa owiriyana mavekelo anyu.

8 Nto, ootheene anyu mwiiwananeke,+ moonelaneke othunku, mphentaneke ntoko anna, mmorelaneke ikharari+ ni mwiiyeviheke.+ 9 Muhiliveryeke etthu yootakhala ni yootakhala ekina,+ aahiiso mwaaruwaniwaka, muhiruwaneke.+ Masi, nwiireleke itthu sooreera akina,+ okhala wiira mwiihaneliwe yeeyo ni Muluku. Nto owo onrowa woovahani itthu sooreera.

10 Tthiri, “ole oniphavela okhala mukumi ni okhala mahiku manceene, ohaana okasoopa nlumi nawe, wiira nihilavuleke itthu sootakhala.+ Nave ohaana okasoopa eyano awe, wiira ehootheke. 11 Osyakeke itthu sootakhala,+ ovareke itthu sooreera.+ Ophaveleke murettele ni eetteleke yoowo.+ 12 Tthiri, maitho a Yehova* annaaweha anaxariya, maaru awe annaawiriyana yaaxonttelaka.+ Masi, Yehova* onnaanyokha ale aniira itthu sootakhala”.+

13 Nto, ti pani onrowa owiirelani itthu sootakhala, mwaakhalelaka nthiti ovara itthu sooreera?+ 14 Masi, hata muhaawaka mwaha wa exariya, muhakalaleke.+ Muhooveke etthu anoova aya,* nnakhala muhixankeke.+ 15 Vano, vamurimani vanyu, mmuttittimiheke Kristu, ntoko Pwiya anyu. Nave, okathi wootheene, mukhaleke oolikana ene wiira nwaakhule saana ootheene ale anookohani etthu mwaha wa nlipelelo murina anyu. Masi, mwaakhuleke mooniheryaka oreera murima+ ni nttittimiho nuulupale.+

16 Mukhalaneke murima wooloka,+ wiira okathi munihimyaniwa anyu itthu sootakhala, ale anihimya itthu iyo, yuuliweke muru,+ mwaha wa mweettelo anyu wooreera, ntoko atthu animutthara Kristu.+ 17 Halaali ohaawa mwaha wa opaka itthu sooreera,+ vakhala wiira oniphavela awe Muluku ti yeeyo, ohiya ohaawa mwaha wa opaka itthu sootakhala.+ 18 Tthiri Kristu, yoowo ori naxariya, ohookhwa ekwaha emosa paahi, mwaha wa itampi+ sa atthu ahikhanle anaxariya,+ wiira ooroiheni wa Muluku.+ Owo aahiiviwa ntoko pinaatamu,+ masi aahikhalihiwa mukumi ni erutthu ya wiirimu.+ 19 Nto, aahirowa olaleya moolumo oophukela, olaleeryaka malaikha yaatthukweliwe.+ 20 Malaikha awo, khiyaamwiiwelenle Muluku, okathi aawehererya awe ni opixa murima, mahiku a Nowe,+ etekiwaka ekalawa.+ Atthu vakhaani paahi, eyo piiyo, atthu 8, yaahikela mukalawani, yoopoliwa vasulu va maasi.+

21 Etthu enlikana ni ela, ti opatiso. Opatiso owo onniwoopolani vano, mwaha wa ohihimuxiwa Yesu Kristu. Opatiso, khahiyo orapiha itthu soonanara sa erutthu, masi onithoonyerya onvekela Muluku murima wooloka.+ 22 Kristu owo, ori moono woolopwana wa Muluku,+ maana oowela wiirimu, weiwo malaikha, makhulupale ni owerya wootheene animwiiwelela aya.+

4 Okhala wiira Kristu aahihaawa ori ene pinaatamu,+ nave-tho nyuwo mwiilokiherye wiira muupuweleke ntoko Kristu, maana mutthu onihaawa, onnooniherya wiira oohiya opaka itampi.+ 2 Siiso, nlelo mutthu owo ori ene mukumi, ophaveleke opaka etthu Muluku oniphavela awe,+ ohiya itthu sinaasivela atthu.+ 3 Khalai, mwaahiviriha okathi munceene mpakaka itthu sinipakiwa ni atthu a mulaponi,+ itthu ntoko iya: Mweettelo woohiloka onooniherya ohuuliwa muru,* ophavela itthu sootakhala, ohapaliwa, ifesta sootakhala,* owuryexa ni okokhorela ilatarato.*+ 4 Atthu awo khanisuwela nthowa naya vano muhinipaka anyu itthu sootakhala mwaavara anyu hoothe. Tivo, awo annilavula itthu sootakhala yoohimyakani nyuwo.+ 5 Masi, atthu awo animwaakhula ohoolo wa Kristu, yoowo onrowa waaphukela atthu akumi ni alipa-ookhwa.+ 6 Tivonto alipa-ookhwa yaalaleeriwe aya ihapari sooreera,+ wiira nnaamwi aphukeliwaka ntoko aniphukeliwa aya apinaatamu, awo awerye okhala akumi yeettihiwaka ni ikuru soowaarya sa Muluku.

7 Masi, omala wa itthu sootheene ori vakhiviru. Tivonto, mukhalaneke muupuwelo wooloka+ ni nvekeleke okathi wootheene.*+ 8 Ohiya-vo, mphentaneke vanceenexa,+ okhala wiira ophenta onnikhuneela itampi sinceene.+ 9 Mwaakhelaneke muhinlaseyaka.+ 10 Khula etthu mutthu ovahiwa awe ni Muluku, orumeeleke wiira aavareleke muteko akina ntoko murumeyi ooloka, oreereliwe murima vaalupale ni Muluku. Oreera murima iwo, onooniheriwa mwa inamuna soovirikana.+ 11 Akhala mutthu onilavula, olavuleke ntoko onilavula moolumo a Muluku. Akhala mutthu onirumeela, opakeke eyo olipanaka ikuru sinikhuma wa Muluku,+ wiira mwa itthu sootheene, Muluku ovuwihiwe+ mwaha wa Yesu Kristu. Muluku ookhalana ovuwa ni owerya mahiku ootheene. Amen.

12 Axinnaka oophentiwa, muhitikinihiweke okathi sinoophwanyaayani sooweeha suulupale,*+ vanakhala ntoko wiira itthu iyo khasitonko owiiraneelani. 13 Ohiya-vo, mutteeliweke murima+ okhala wiira munnihaawa ntoko aahaawale awe Kristu,+ wiira okathi ovuwa wawe onrowa aya wooniheriwa, mutepeke otteeliwa murima.+ 14 Nyuwo mwa atthu oohakalala, mwaaruwaniwaka mwaha wa nsina na Kristu,+ maana ikuru soowaarya sa Muluku* ni ovuwa waya, siri ni nyuwo.

15 Ohikhale onihaawa mwaha wookhala nawiive, latarau, mutakhali aahiiso noohankawaani.+ 16 Masi akhala mutthu onihaawa mwaha wa okhala mukristau, ohuuliwe muru.+ Ohiya-vo, onvuwiheke Muluku, eettelaka ekristau. 17 Tthiri woophiya okathi wiira atthu apacerye ophukeliwa. Nto ophukeliwa iwo onrowa opacerya ni atthu a Muluku.*+ Vano akhala wiira ti hiyo ninrowa opacerya ophukeliwa,+ nto exeeni enrowa owiiraneela ale ahiniiwelela ihapari sooreera sa Muluku?+ 18 “Vakhala wiira naxariya ohaana wiimananiha vanceene wiira oopoliwe ni Muluku, nto exeeni enrowa omwiiraneela mutthu ohinimwiiwelela Muluku ni natampi?”+ 19 Tivonto, ale anihaawa mwaha wa opaka etthu Muluku oniphavela awe, yiivahereryeke ni murima aya wootheene wa Mpattuxa oororomeleya, avaraka miteko sooreera.+

5 Tivonto, miyo mutokweene mukhwiinyu, kooweha ohaawa wa Kristu, nave kinrowa ottittimihiwa vamosa ni ale oothanliwa okathi ninrowa ahu ovuwihiwa.+ Nto, kinnaatumererya axitokweene eriyari anyu, kiiraka: 2 Mukhapeleleke nikoto na* Muluku+ muhiyeriwe anyu, murumeelaka ntoko axitokweene anihoolela. Muhikhaleke ntoko munookhanyereriwa, masi mwiireke ni murima wootheene, ntoko Muluku oniphavela awe.+ Mukhapeleleke ni nthiti, ohiya mwaha wa ophavela ophwanya etthu.+ 3 Muhaapuheryeke atthu a Muluku,+ masi nvaheke ntakiheryo nooloka nikoto na* Muluku.+ 4 Nave, okathi makampusi muulupale+ onrowa awe wooniheriwa, nyuwo munimwaakhela etthuvo* yoovuwa,+ ehinihononeya.

5 Siiso, nyuwo amiravo, nwiiweleleke axitokweene muhinlaseyaka.+ Masi ootheene anyu muthokoreryaneke, mooniheryaka wiiyeviha,* okhala wiira Muluku onnaanyokha atthu oowiisoona, masi onnaareerela murima vaalupale atthu oowiiyeviha.+

6 Tivonto, mwiiyeviheke ohoolo wa Muluku muulupale ni oowerya,* wiira owunnuwiheni okathi wooreerela.+ 7 Mmurihele* Muluku mixankiho sanyu sootheene,*+ maana owo onnookhapelelani.+ 8 Mukhaleke a miruku ni nwehaweheke.+ Nwanani inyu, Diabo, onneetteetta ntoko kharamu onoopa murukulu,* ophavelaka omukhuura mutthu.+ 9 Masi mmukhootteke Diabo owo+ ni waamini woolipa, musuwelaka wiira anninyu a olumwenku wootheene annihaawa ntoko nyuwo.+ 10 Nto, nuumala ohaawa vakhaani, Muluku ooreera murima vanceene, yoowo owiihanneni wiira mwiiraane ni Kristu ni mwaakhele ovuwa ohinimala,+ onoomaliherya wiixutta wanyu. Owo onimoolipihani,+ onimoovahani ikuru+ ni onooweemexani.* 11 Owerya ti wawawe mahiku ootheene. Amen.

12 Miyo kihoolepelani epaphelo ela ni moolumo vakhaani, kikhaliheriwaka ni Silvano,*+ munnaka oowaamini. Kiniphavela woolipihani ni woororomelihani wiira oreera murima wuulupale mooniheriwe anyu ni Muluku, ti weekeekhai. Nvarexexeke oreera murima iwo wuulupale. 13 Muthiyana* onikhala oBabiloonia, yoowo othanliwe ntoko nyuwo, onnookhomasani. Nave-tho Marko,+ yoowo ori ntoko mwanaka, onnookhomasani. 14 Mukohaneke ihaali, nvahanaka epeexo* ya niphento.

Murettele okhale ni nyuwo ootheene muri awiixutti a Kristu.