MWAHA 1
Muluku Onnipacerya Opaka Itthu
ITTHU sotheene sooreera sirinaahu sinikhuma wa Muluku. Owo aahipaka nsuwa wira ninivaheke omwaleya othana, nto mweeri ni itheneeri wira niweryeke woona ohiyu. Nto Muluku aahipaka elapo ya vathii wira hiyo nikhaleke memmo.
Masi nsuwa, mweeri, itheneeri ni elapo ya vathii khisaahiyo itthu soopaceriwa opakiwa ni Muluku. Nyuwo munnisuwela ele yaari yoopacerya? Wanipacerya Muluku aapanke atthu oolikanasa n’uwo. Hiyo khinniwerya owoona atthu ala, siisaale hiyo sihiniwerya ahu omoona Muluku. MBiibiliyani atthu ala aniihaniwa malaikha. Muluku aahipaka malaikha wira akhaleke n’uwo wirimu.
Nlaikha noopacerya opakiwa ni Muluku naari navameekh’aya vanceene. Nna naari Mwaana oopacerya a Muluku, ni owo aahivara muteko ni Atithi awe. Owo aahimukhaliherya Muluku opaka itthu sikina sotheene. Owo aahimukhaliherya Muluku opaka nsuwa, mweeri, itheneeri ni elapo ahu tho ya vathii.
Vanonto elapo ya vathii yaari sai? Wanipacerya khuuvo aakela owerya okhala mu elapo ya vathii. Khivaakhanle etthu, masi maasi a ephareya yuulupale yaakhuneelela etthaya yotheene. Masi Muluku aaphavela wira atthu akhaleke elapo ya vathii. Siiso aahipacerya olokiherya itthu wa hiyo. Exeeni yaapanka awe?
Saana, wanipacerya elapo ya vathii yaatthuneya okhala yookokola. Siiso Muluku aahiiriha wira waarya wa nsuwa omwaleeleke elapo ya vathii. Owo aahipaka eyo wira vakhalee ohiyu ni othana. Vattuli vaya Muluku aahiiriha wi etthaya ekhumele vasuluu va maasi a ephareya.
Wanipacerya khivaakhanle eetthu vatthayani. Yaari ntoko sinoona anyu valataratoni va. Khivaakhanle ithutuu, mirii aahiiso inamaa. Khiyaakhanle hataa ehopa mphareya. Muluku aahikhalana muteko munceenexa oovara wira okhalihe elapo ya vathii yooreera tthiri wira inamaa ni atthu akhaleke memmo.
Yeremiya 10:12; aKolosi 1:15-17; Maphattuwelo 1:1-10.