Yehova Aahinvaha Ikuru Sansoni

AIsarayeli anceene yaahitthikela-tho waakokhorela amuluku eethiru, nto Yehova aaheemererya wira awo ehaaxiweke ni aFilisti. Masi yaahikhala aIsarayeli akina yamphenta Yehova. Mmosa a yaawo aari Manowa. Owo ni mwaarawe khiyaarina mwaana. Nihiku nimosa Yehova aahiruma nlaikha orowa omuleela mwaarawe Manowa wira: ‘Nyuwo munoomuyara mwaana mwaamulopwana. Mwaana owo onrowa owoopola aIsarayeli mmatatani mwa aFilisti. Nave onrowa okhala muNaziri’. Nyuwo munnisuwela ti pani yaari aNaziri? Yaari arumeyi oothanliwa a Yehova. ANaziri khiyeemiheriwa omettha ikharari saya.

Muhoolo mwaya, Manowa ni mwaarawe yaahimuyara mwaana mwaamulopwana, ni khunvaha nsina na Sansoni. Vaavo Sansoni annunwe awe, Yehova aahimwiiriha okhala mutthu a ikuru. Owo aaniwerya omwiiva kharamu ni matata. Nihiku nimosa, Sansoni aahiwiiva aFilisti 30 mekhawe. AFilisti yaanimulupattha ni yaaniphavelasa inamuna soomwiiva. Ohiyu omosa vaavo Sansoni aarumpe awe muttetthe wa oGaza, aFilisti yaahirowa vamukhora wa epooma ele wira amwiive vaasiisu. Masi ohiyu eriyari, Sansoni aahivenya anarowa vamukhora wa epooma ni aahiphela mukhora wa epooma akumiherya ota. Owo aahikapatta mukhora owo, khuwelana mpakha vamwaako waattamela oHebroni!

Muhoolo mwaya, aFilisti yaahimuleela mwaarawe Sansoni, Dalila, wira: ‘Hiyo nnimoovahani musurukhu 5.500 wa eparatha mwanileela nthowa naya Sansoni orina awe ikuru sinceene. Hiyo nimphavela onvara nimuhele mukhatteya’. Dalila aaniphavela musurukhu, nto aaheemererya. Wanipacerya, Sansoni aahikhootta omuleela nthowa naya aarina awe ikuru sinceene. Masi Dalila aahimukhanyererya Sansoni mpakha ohimya esiiri awe, oriki: ‘Ikharari saka khasitonko ometthiwa, okhala wira ka muNaziri. Kametthiwa-vale, ikuru saka sotheene sinookimalela’. Tthiri Sansoni aahivonya vanceene mwaha wa omuleela Dalila ekeekhai!

Moohipisa Dalila aahaaleela aFilisti wira: ‘Owo ookileela esiiri awe!’ Dalila aahimwiiriha Sansoni orupa vamettoni vawe, khumwiitthana mulopwana mmosa wira ommetthe ikharari sawe. Nuumala-vo, Dalila aahimwiirela Sansoni wira: ‘Sansoni aFilisti aaphiya!’ Sansoni aahivenya, nto vano khaarina-tho ikuru. AFilisti yaahinvara, yaahimukumiha maitho, khunwalela mukhatteya.

Nihiku nimosa aFilisti anceene yaahithukumana mutemplo mwa Muluku aya Dagoni. Nto yaanikhuwelasa ariki: ‘Muluku ahu oonivaha Sansoni! Haya aroweliwe Sansoni, nimuthweeliheke!’ Nto yaahimweemexa eriyari ya maripu manli ni yaahipacerya onveeha. Vano Sansoni aahinvekela Muluku wira: ‘Xontte Yehova, mukivahe ikuru olelo paahi’. Okathi ole ikharari sa Sansoni siira sitthikenle ene wunnuwa. Owo aahikakha maripu a etemplo ni ikuru sawe sotheene. Nto empa ele yotheene yaahimora nave atthu ootheene yaari mutemplo mme yaahikhwa, omuhela muhina Sansoni.