MMWAATTAMELE MULUKU

‘Muhakhuwa Itthu Iya . . . Khwasuweliha Axikhani’

Nyuwo munniphavela osuwela ekeekhai voohimya sa Muluku? Owo tani? Exeeni eniphenta awe ni eninyokha awe? Nuulumo nawe, Biibiliya, Yehova Muluku onnihimya itthu sotheene sa yena. Khahiyo wira khula mutthu onimusoma Biibiliya onniwerya osuwela ekeekhai. Mwaha wa xeeni? Okhala wira owerya osuwela ekeekhai eri eparakha eniphwanyiwa ni atthu vakhaani, khahiyo atthu otheene. Nrowe nithokorerye ele Yesu aalavunle awe.​—Mmusome Matheyo 11:25.

Eveersu eyo enipacerya ni masu anihimya so: ‘Okathi yowo, Yesu ahihimya wira’. Nto Yesu onnilavula masu ala, mwaha wa etthu yiiranen’ye okathi yoole. Owo onomalaru waapwapwela atthu yahacalela masu a isidade tthaaru sa oGalileya weiwe aapanke awe miiriirya. (Matheyo 11:20-24) Nyuwo pooti wiikoha so: ‘Vaniweryaneya sai mutthu owenhe miiriirya sa Yesu, masi ahineemererya sowiixuttiha sawe? Etthu yaawiiriha atthu ale ohicalela sowiixuttiha sa Yesu, mwaha wa wuuma mirima saya.​—Matheyo 13:10-15.

Yesu aanisuwela wira naphavela osuwela ikeekhai siri mBiibiliyani, nihaana okhalana iponto piili: Weemya nikhaliheryo na Muluku ni okhalana murima wooloka. Yesu aahitthokiherya wira: ‘Miyo kinnottottopelani, Tithi, mwanene wirimu ni vathí, okhala wira muhakhuwa itthu iya atthu òsuwela ni a miruku, khwasuweliha axikhani’. Munniweha nthowa naya vanihimmwa aya wira osuwela ikeekhai sa mBiibiliyani eri eparakha yuulupale? Yehova, ‘Pwiya a wiirimu ni a elapo’, owo pooti ovitha wala wuupulula moovarihana ni yootthuna awe ni okhulupale awe. Masi khula mutthu onniwerya osuwela ekeekhai, maana Muluku khonaathanla atthu. Nto xeeni Muluku owooniheryaka akina, masi khwaavitherya akina?

Yehova onnisiveliwa ni atthu owiiyeviha, ohiya atthu owixinnuwiha. (Yakobo 4:6) Owo khanaasuweliha ekeekhai ‘asuweli’ a elapo ari alipa owiixunuuha ahiniphavela okhaliheriwa nuuwo. (1 aKorinto 1:19-21) Masi owo ohaasuweliha ekeekhai ‘axikhani, eyo piiyo, yaale arina mirima sooloka, wiiyeviha waya onilikana ni anamwane. (Matheyo 18:1-4; 1 aKorinto 1:26-28) Yesu mwaana a Muluku, ahoona makhalelo ala a apinaatamu. Atthu anceene oowixinnuwiha, asomi ni amahoolela a itiini, yanivaanyiha sowiixuttiha sa Yesu; masi atthu oowiiyeviha yaale yaari alipa ototha ihopa yahaakhulela. (Matheyo 4:18-22; 23:1-5; Miteko 4:13) Masi okathi omosaru owo, athaaciri ni atthu oosoma yaale yaari oowiiyeviha tthiri yaahikhala atthareli a Yesu.​—Luka 19:1, 2, 8; Miteko 22:1-3.

Vano ninnihokolowela nikoho noopacerya nni: Munniphavela osuwela ekeekhai voohimya sa Muluku? Akhala wira ti siiso, munoowerya ophwanya olipa mwaha woosuwela wira Muluku khanimphenta mutthu mwaha wa okhala musuweli wala thaaciri. Masi onnisiveliwa ni ale aniiyeviha nnaamwi atthu oosuwela a mulaponi ehiwoonelaka vatthu. Akhala wira munrowa osomaka Nuulumo na Muluku mphavelaka tthiri ekeekhai ni murima anyu wotheene, nto munrowa okhala atthu yaale Yehova onaavaha awe eparakha yuulupale ya wiiwexexa ikeekhai sa Muluku. Wiiwexexa saana ikeekhai iyo, onoosarihela ohakalala okumi anyu vano ni muhoolo okumi weekeekhai, eyo piiyo, ‘okumi woohimala’ onirwa moohipisa, Muluku aalaihenrye awe anaxariya.a​—1 Timótheyo 6:12, 19; 2 Pedru 3:13.

Malakiheryo a omusoma Biibiliya, Janero

Matheyo 1-21

[Enoota]