BIIBILIYA ONNIRUKUNUXA MIRIMA SA ATTHU

“Mweettelo Aka Waari Wootakhala”

Elavuliwe ni Esa Leinonen

MWAAKHA OYARIWE AWE: 1960

ELAPO ONIKHUMA AWE: OFINLÂNDIA

MWAHA ENE: IIPA MUUSIKA A HEAVY-METAL

MWEETTELO AKA WA KHALAI: Kihuuwale eriyari ya ekrupu ya atthu yaari anakrime, muttetthe mmosa wa oTurku waattamela oporto. Apaapa yaari kampiau a iboxi, nto miyo ni muhima aka, naanirowa owana oboxini. Oxikola, ikwaha sinceene waanikisivela owana, nkoova etthu. Okathi wa omiravo aka, kahiirela mpantta ekrupu ya anasusukhi, nto eyo yaahikitepiha otakhala. Nto kaahiphavela orowa wiixutta muusika Heavy-metal, nto kinaphavela okhala mutthu oovuwa onimwiipa rock.

Kaahithuma malapa aka, kipaka ekrupu aka ya wiipa. Moohipisa kikhala mukhulupale a ekrupu ele ya wiipa. Kaahipacerya okhalana mweettelo wootepa otakhala. Okhala wira ekrupu ahu wiipa waya waari wootepa olavilavi, ni naarina mweettelo wooxinama, naahipacerya olaleiwa. Nto nipacerya wiipa eriyari ya atthu anceene. Naahigaravari isipo vakhaani nto nsipo nookiserya nahaasivela atthu. Iyaakha sa 1980, naahirowa wEstados Unidos orowa olaleya ekrupu ahu. Naahiipa ikwaha piili oNova York ni oLos Angeles, nto nihinatthi otthikela oFinlândia, nahivaanela ni atthu anitumiha isipo.

Nnaamwi waakisivela wiirela mpantta ekrupu ele ya wiipa, etthu yaatepa aka ophavela waari okumi woohakalaliha. Etthu yaakinana waari oweha owana-wana wa ale anitumiha isipo. Vaanikinyoonya-tho woona wira okumi aka waari weethiru. Kuupuwela wira kaari mutthu ohiloka, tivonto kanoova orowa opahiwa omooroni. Kaaheererya waavya waakhuliwa wa makoho aka vaavo kaasoma aka iliivuru sa ikerexa. Nave kaninvekela Muluku wira akikhaliherye, masi nkuupuwela wira kanwerya omuhakalaliha.

MOOTA BIIBILIYA ORUKUNUNXE AWE OKUMI AKA: Wira kiphwanye yowiikhaliherya, kaavara muteko okorreio. Nihiku nimosa, kaahisuwela wira mpatthani aavaranaka muteko aari Namoona a Yehova. Nto kaahimukoha itthu sinceenexa. Waakhula wawe wooloka arumeelaka Soolempwa waahikitikiniha, eyo yaahikiiriha weemya omusoma Biibiliya nuuwo. Okathi kaamusoma aka Biibiliya nuuvira isumana vakhaani, ekrupu ahu yoowiipa yaahivahiwa eparakha ya ogaravari masipo wEstados Unidos. Nto kuupuwela wira ele yaari eparakha ya okhalana okumi wooloka.

Kaahimuleela Namoona ole wira kaaphavela ogaravari isipo sa edisku emosa pahai, nuumala-vo kimananiheke saana weettela sooruma sa Biibiliya. Owo khaahimyale etthu yuupuwela awe; owo aakivekenle osoma masu a Yesu ari mMatheyo 6:24. Eveersu eyo eni: ‘Khavo onwerya warumela mamwene manli’. Kaahitikinihiwa oweha ele masu a Yesu yaataphulela aya. Masi nuuvira mahiku vakhaani munna aakisomiha Biibiliya taatikinihiwe! Kaahimuleela wira mwaha woophavela omutthara Yesu, miyo koohiya ekrupu ele ya wiipa masipo!

Biibiliya aari ntoko exipeelyo yooniherya mikhalelo saka. (Yakobo 1:22-25) Kaahiweha wira malavulelo ni mikhalelo saka saari soowali: kaari mutthu owiixunnuha, nrima, ni ophavela mihakhu. Elavulelo aka khiyaaloka, waanikisivela owana, ompaha sigaro, ni owurya vanceene. Okathi kaawenhe aka wira mweettelo aka khiwaavarihana ni sooruma sa Biibiliya, kaakhala wira kaari muhina mwa muuri wa itixolo. Nnaamwi vari siiso, kaahiilokiherya wira kirukunuxe makhalelo aka.​—aEfeso 4:22-24.

Vanceenexa wanipacerya, kaahixankiheya vanceene ni mweettelo aka woohiloka wa khalai. Masi Namoona aakisomiha Biibiliya aahikikhaliherya vanceene. Owo aahikooniherya mBiibiliyani yoolepa ya Yesaya 1:18 eni: ‘Sottheka sanyu sinakhalaru sophilivila ntoko ekottokhwa, miyo kinoreriha mpakha olikana n’otthú’. Eveersu ela ni ekina, yahikikupaliha wira Tiithi ahu a wiirimu, toomoriwa ikharari, ni oniphavela wira apenuxe makhwatta a atthu owiittaruxa.

Okathi kaamusuwenle aka saana Yehova ni wira owo ookhala tthiri, kaahiphavela ovahererya okumi aka wa owo. (Esalmo 40:9) Kaahibatiziwa 1992 okongresuni wa Anamoona a Yehova a ilapo sotheene iiriwe St. Petersburg, oRussia.

MOOTA KITTOTTENLE AKA MUREERELO: Kihaapaka apatthani anceene wa atthu animukokhorela Yehova. Nto vano, ninnihakalala vamosa wiipa myuusika ni isipo sooloka okhala wira eyo yoovaha ya Muluku. (Yakobo 1:17) Mareeliho makina maalupale ori omuthela mwaaraka onimphenta aka oniihaniwa Kristina. Nto ninniviriha vamosa ni amwaaraka, okathi woohakalaliha ni okathi wa mixankiho sikina sa mookumini, vamosa ni itthu suulupale sinuupuwela aka.

Vahaakhanle wira miyo khahiyo Namoona a Yehova, miyo saano kikhwiiye. Khalai, ikwaha sinceene kaamakela okhalana mixankiho, ni ohooxeya. Masi vano, kookhalana yoolakela ya mookumini, nto kinnoona wira vano khula etthu yookhalana opuro aya.

[Elatarato epaaxina 8]

[Elatarato epaaxina 8]

© Kaj Ewart

[Eponto yuulupale ya epaaxina 9]

“Tiithi ahu a wiirimu toomoriwa ikharari, nave owo oniphavela openuxa makhwatta a atthu yaale attharunwe soovonya saya”

[Elatarato epaaxina 9]