MYAHA SA ARKIVO AHU

Mwene Aahihakalala

MWAAKHA ENE WAARI 1936, mweeri wa Akosto. Opuro ene waari Opalaasio wa Mwene a oSuwazilandia. Okathi owo, aahiphiya Rober ni George Nisbet yaawo yoopa miyuusika ni myaha soogaravariwa sa munna J. F. Rutherford. Nto Mwene Sobhuza II aahihakalala. Munna George onnilavula etthu emosa ariki: “Etthu emosa yaanuuliihe muru yaari yoovekela ya Mwene ole; owo aaphavela wira nimutumiherye maakina ni ikuluna saarumiha idisku sa Ihapari sa Omwene!”

Robert aahimuleela mooreerela mwene ole wira ikaruma iye khisaatumihiwa. Mwene aahikoha wira xeeni sihintumihiwa aya? Robert aahaakhula wira: Mwaha woowi maakina ala ta mwaneene. Nto Mwene owo aaphavela omusuwela mwaneene.

Robert aahaakhula wira, “Maakina ala ta Mwene mukina”. Nto Sobhuza aahikoha wira Mwene owo taani? Roberto aahaakhula ariki: “Yesu Kristo, Mwene a Omwene wa Muluku”.

Sobhuza aahimukupali ni nttittimiho ariki: “Ooh, owo Mwene muulupale. Nkiniphavela okuxa itthu siri sa Yesu”.

Robert aahilepa oriki: ‘Miyo kaahitikiniheya vanceene ni Okhulupale wa Mwene Sobhuza. Owo aanilavula saana Enkelexi moohiixunnuuha, masi aalavula moophwanelela ni aari oopatthaneya. Miyo kaahivaanela nuuwo etthu yowiiraka minutu 45 oskritooriyo wawe, okathi George aarumiha awe miyuusika vate.

Roberto onnivikaniha olavula ariki: ‘Nuuvira okathi nihiku nle’, Naahimwiihana orwa Oskola Yuulupale ya Suazi weiwo naavaanenle ahu itthu soohakalaliha. Naahinvaha onamoona mukhulupale a exikola ele nto owo aahiniwiriyana saana. Nto okathi anna ale yaalavunle aya wira yaarowa orumiha idisku iye wira anaxikola othene ewiriyane, mwene ole aahitepa otteeliwa murima. Nto naahileeliwa wira exikola ele yaapakiwe ni apiipi awe Mwene ole Oottittimiheya’.a

Wanipacerya wa eyaakha ya 1933, Mwene Sobhuza aahaawiriyana moohakalala mapioneero yaaronwe oxukurya Opalaasio wa Mwene. Ekwaha emosa aahaathukumanya maguarda awe 100 wira ewiriyane ihapari sa Omwene saakaravariwe. Owo aahivekela wira aakheleke khula mweeri irevista sahu, ni iliivuru. Nto moohipisa, Mwene ole aahipaka ebiblioteka ya iliivuru sa Muluku! Nto owo aahikhapelela saana iliivuru iyo nnaamwi saakhoottihiwa ni eguvernu ya kolono ya oBritaniko okathi wa ekhotto ya nenli ya olumwenku wotheene.

Mwene Sobhuza II aahivikaniha owaakhelela Anamoona wira eroweke oPalaasio wawe oLobamba, mpakha waalattula ahooleli a itiini wira arowe owiriyana myaha saalavuliwa ni Anamoona. Vaavo Namoona aakhala mapuro awo iihaniwa Helvie Mashazi aamutthokiherya awe Matheyo ekapiitulu 23, ekrupu emosa ya ahooleli a itiini yaahimutuphela enamukhanyererya okilaathi. Masi Mwene ole aahaahiiha atthu ale anvekela munna Mashazi ovikaniha olavula. Ohiya-vo, Mwene ole aahaaleela atthu yaawiriyana wira elepeke soolepa sa mBiibiliyani sotheene saalavuliwe!

Nuumala owiriyana mwaha waalavuliwe ni pioneero okathi mukina, akhulupale axexe a itiini, yaahirula mikuhu yaawanre aya muxikoni elavula eriki: “Hiyo noohiya okhulupale wa itiini sahu, nimphavela okhala Anamoona a Yehova’. Awosa yaahimukoha akhala wira pioneero ole aahikhalana eliivuru anvanhe awe Mwene ole.

Okhuma iyaakha sa 1930 mpakha okhwa wawe 1982, Mwene ole aanaattittimiha Anamoona a Yehova, nave khaaphavela weemererya olupatthiwa anna mwaha wa ohiirela mpantta wa soolema sa oSuwazilandia. Nto, Anamoona ale yaanimuxukhurela vanceene, nave yaahiikhupanyerya okhwa wawe.

Wanipacerya wa 2013, oSuwazilandia yaahikhala anamalaleerya a oMwene oowiiraka 3.000. Atthu oowiiraka 1 milyau anikhala elapo ele, nto namalaleerya mmosa onaalaleerya atthu 384. Mapioneero 260 yaanivara miloko soowiiraka 90, nave atthu oowiiraka 7.496 yaahirowa Wuupuwelela Okhwa wa Yesu 2012. Tthiri elapo ele enrowa ovikaniha wuncerereya anamalaleerya. Tthiri wunnuwa nno, opacenrye ni oxekurya weiwe woopacerya oSuwazilandia iyaakha sa 1930.​—Myaha sa Arkivo Ahu, wAfrica do Sul.

[Enoota]

[Elatarato epaaxina 31]

[Masu a elatarato]

Efootu ekumihiwe ni Robert Nisbet ya Mwene Sobhuza II mwaakha wa 1936 ni khuhiyeriwa Watch Tower Society

[Elatarato epaaxina 32]

(Vasulu) Anaxikola a Universidade yaawiriyana mwaha waalavuliwa ni anna mwaakha wa 1936, oSuwazilandia

[Elatarato epaaxina 32]

(Moono woolopwana) George Nisbet ni ekaaro awe ya musika ni myaha soogaravariwa