Yoowootha 3: Muluku Tootakhala — Watchtower EBIBLIOTEKA ONLAINE

MWAHA WOOPACERYA | ITTHU SOWOOTHIWA SINIWIIRIHA ATTHU OHIMPHENTA MULUKU

Yoowootha 3: Muluku Tootakhala

ELE ANAMUNCEENE ANIKUPALI AYA: “Vaavo anikhwa aya atthu arina yoottheka yuulupale, irooho saya sinnirowa omooroni, weiwo sinihaaxiwa aya ‘omooroni iwo mahiku otheene’”. (Catechism of the Catholic Church) Ahooleli akina a etiini anihimya wira ale ari omooroni kharina opatthani ni Muluku.

ELE BIIBILIYA ONIIXUTTIHA AWE: “Ole otthenke ti yole ontthuna okhwa”. (Ezekiyeli 18:20) Alipa okhwa “khansuwela-tho etthu”. (Musuweli 9:5) Akhala wira ole okhwiiye khonsuwela etthu, nto khivaniweryaneya ohaaxiwa “omooroni mahiku otheene”, wala ohikhalana opatthani ni Muluku.

MBiibiliyani, moolumo a eHeeberi ni eGriki ataphuleliwe omooroni, anihimya mapuro anivithiwa atthu otheene wala omahiye. Mwa ntakiheryo, vaavo Yobi aawereiwa awe eretta yuulupale, aahinvekela Muluku oriki: “Kaphavela wira nyuwo mukivithe mmahiye”. (Yobi 14:13) ABiibiliya akina annirumeela nuulumo noowi ‘omooroni’ ahimyaka mahiye. [Douay-Rheims Version, Holy Bible—Easy-to-Read Version] Yobi, aaphavela wira omumule omahiye, ohiya ohaaxiwa ni Muluku.

XEENI ORYAYA VOOTTHUNEYA: Yowiixuttiha yoowi Muluku onaahaaxa anamattheka omooroni, khenniiriha wataana ni yena. Rocío yoowo onikhala oMexico, onihimya so: “Okhuma enamwane aka kaahiixuttihiwa wira atthu ootakhala annipahiwa omooroni. Miyo kaahixankiheya ni yowiixuttiha eyo, kuupuwelaka wira Muluku khaarina mikhalelo sooreera. Kuupuwela wira owo tootakhala ni oohilevelela”.

Ekeekhai ya Biibiliya voohimya sa maphukelo a Muluku ni mukhalelo wa alipa ookhwa yaahituruka moonelo wa Rocío. Owo onihimya so: “Miyo kaahiphwanya otaphuwa mwaha woowi muupuwelo wa ohaaxiwa omooroni waanikoopiha. Nto, kaahipacerya ororomela wira Muluku oniphavela mureerelo ahu, onniniphenta, ni kinoowerya omphenta. Owo onlikanasa ni tiithi onvarela ntata na anaawe ni omphavela mureerelo aya”.—Yesaya 41:13.

Anamunceene anniimananiha weettela etiini mwaha wa woova omooroni. Masi Muluku khoniphavela wira nyuwo mmurumeeleke mwaha wa woova opahiwa. Yesu aahimyale so: “Mwaphenteke Apwiya Muluku anyu”. (Marko 12:29, 30) Nto osuwela wira Muluku khonipaka itthu mootakhala, onniniiriha ororomela maphukelo awe a muhoolo. Moolikanasa ni Elihu mpatthani awe Yobi, nnoowerya ohimya moororomela nriki: “Muluku khivo yotakhala enìrawe: Nanwerya sothene khanttheka”.—Yobi 34:10.

[Elatarato epaaxina 6]

[Masu a elatarato]