MWAHA WOOPACERYA | NIIREKE OKUMI AHU ONLIPA NI MULUKU?

Exeeni Eniiriha Okhumela Nikoho Nlo?

Egrupu emosa ya atthu ahinimukupali Muluku, yaahilepa ekartaz emosa yaahimya so: “Atthu anceene annikhala saana hata ahimulompaka Muluku”. Anamunceene anuupuwela wira okumi aya khonlipa ni Muluku.

Nave-tho, anamunceene yaawo anikupali wira Muluku ohaavo annipaka itthu ntoko wira owo khokhanle. Mwa ntakiheryo, arcebispo a ekerexa Katoolika, Salvatore Fisichella aahilavula sa atthu a etiini awe oriki: “Vaavo atthu akina anniweha aya, khanikupali wira hiyo na maKristau mwaha woowi mweettelo ahu onilikana ni atthu ahineetta okerexa”.

Akina annixankiheya ni miteko saya nto ahinamuupuwela Muluku. Awo anuupuwela wira Muluku ori otteiwenexa ni khoniwerya waakhaliherya. Atthu awo annimwaavya Muluku paahi okathi anikumana aya mixankiho wala aniphavela aya etthu. Nto Muluku onikhala ntoko murumeyi onaakhaliherya paahi okathi anixanka aya.

Atthu akina khaneettela sowiixuttiha sa etiini aya, mwaha woowi anoona wira iyo khahiyo soovareleya muteko. Mwa ntakiheryo, 76 porcento ya atthu aneettela ekerexa Katoolika wAlemanha, anikupali wira khahiyo vootthekeya mulopwana ni muthiyana okhalasa hoothe ahithelanne. Moonelo owo khonivarihana ni sowiixuttiha sa ekerexa aya ni Biibiliya. (1 aKorinto 6:18; aHéberi 13:4) Veekeekhai, khahiyo makatoolika paahi anoona wira mweettelo aya khonivarihana ni etiini eneetta aya. Makhulupale a itiini sinceene anniikhupanyerya mwaha woowi atthu a itiini saya, mweettelo aya onilikana ni atthu “ahinimwaamini Muluku”.

Matakiheryo awo anniniiriha wiikoha so: ‘Niireke okumi ahu onlipa ni Muluku tthiri?’ Mwaha owo khahiyo ti wa niinano. Owo onniphwanyaneya ipaaxina soopacerya sa Biibiliya. Wira niphwanye waakhuliwa wa nikoho nlo, nrowe nivahe ephoole myaha soovirikana siniphwanyaneya eliivuru ya Biibiliya ya Maphattuwelo.

[Elatarato epaaxina 3]