Etthu Yaathanlale Aka Kiryeene Mwaana

Kaarina iyaakha muloko paahi, okathi kawoonale aka anamwane yaakhuma oKamboxa khuphiya oxikola waka oKolumbus, Ohio, EUA, mwaakha wa 1985. Mwammiravo mmosa aasuwela vakhaani olavula Enkelexi. Orumeelaka ilatarato, owo aanikileela itthu sootakhala soonale awe siiriwaka; atthu yookotthiwa, ohukhummwa, ni atthu yaatthyawa. Okathi kuupuwelaka itthu iyo ohiyu kaaninla. Kaaniphavela waatthokiherya yoolipelela ya eParayiisu ni ohihimuxiwa wa ale akhwiiye, masi awosa khiyaawerya wiiwa nttaava naka. Nnaamwi kaari mwammiravo, kaahilakela wiixutta elavulelo ya oKamboxa wira kiweryeke waaleela voohimya sa Yehova ale yeettanaka oxikola. Okathi ole nkaasuwela wira ele yaathanlale aka yaarowa okiphwanyiha eparakha yuulupale.

Khivaakhweya oxutta nttaava na eKamboxa. Khuuvo aakiixuttiha moota sinilavuliwa aya. Kahuupuwela wooceela ikwaha piili, masi Yehova ahaarumeela anamuyari aka wira akilipihe. Muhoolo mwaya, maprusoore, ale yaasomanaka oxikola, yaanikitumererya waavya enamuna yoophwanya muteko onikumiherya musurukhu munceene. Masi miyo kaaphavela okhala pioneero, tivonto kahithanla omwiira kursu wa universidade aarowa okiphwanyihaka okathi woovara muteko ni okhala pioneero. Ikwaha sinceene nuumala osoma kaanirowa olaleerya ni mapioneero. Kaahiivahererya-tho waasomiha Enkelexi anaxikola yaaphavela wiixutta Enkelexi, eyo yaahikiphwanyiha mureerelo muulupale.

Kirineene iyaakha 16, kahiiwa sa ekrupu ya nttaava na oKamboxa yaari muttetthe wowaattamela ephareya, oKalifornia, EUA. Kaahirowa waari ekrupu eyo nto kahiixutta osoma eKamboxa. Kimalihakaru osoma oxikola, kahipacerya muteko wa opioneero nto kaalaleerya atthu yaakhuma oKamboxa anakhala vakhiviru ni hiyo. Masi okathi waarina aka iyaakha 18, kahuupuwela othaamela oKamboxa. Nlelo oKamboxa wanoopiha, masi kaanisuwela wira atthu oowiiraka imilyau muloko yaakhala oKamboxa, vakhaani paahi ti yaiwale ihapari sooreera sa Omwene. Mahiku ale, waari muloko mmosa ni anamalaleerya 13 paahi elapo ele yotheene. Mukhwaha woopacerya osuwela karonwe kirineene iyaakha 19. Nuuvira iyaakha piili kahithaamela oKamboxa. Muteko waavara aka wa osomiha ni otaphulela Enkelexi waanikipwanyiha okathi munceene wa olaleerya. Nuuvira okathi kahimuthela mwaraka onikikhaliherya. Miyo ni mwaaraka nihaakhaliherya atthu anci oKamboxa ovahererya okumi aya wa Yehova.

Tthiri Yehova ‘ookivaha saphaveleka’. (Esal. 37:4) Muteko wowaapaka owiixutti ti wootepa ohakalaliha. Mwa iyaakha 16 sivinre kikhalaka oKamboxa, ekrupu ele ya arumeyi a Yehova oowiiraka 13, ehinnuwa mpakha okhala miloko 12 ni ikrupu 4 soorakamela miloko!​—Ntoko sihimmwale aya ni Jason Blackwell.