Munnuupuwela?

Niireke moosoma saana irevista sa naanano sa Owehaweha? Nanso moone akhala wira munoowerya waakhula makoho anittharelana:

Aahitiwe okathi xeeni mwaapwittipwitthi a Paasikha a 14 a Nisani?

Alipa oomutaphulela Biibiliya akina anihimya wira ahaana ohitiwa “nsuwa nikenle masi vahinatthi oriipa”, nlelo vooneyaka waarya wa nsuwa. (Okhu. 12:6)​—15/12, ipaaxina 18-19.

Malakiheryo xeeni mararu akhanle owaakhaliherya amiravo opaka soothanla sooloka?

Malakiheryo awo mararu taala (1)  Mpaceryeke ophavela Omwene wa Muluku ni wiwelela otthuna wawe. (Math. 6:19-21, 24-26, 31-34.) (2)  Mwaakhaliheryeke akina wira mphwanye ohakalala. (Mit. 20:20, 21, 24, 35.) (3)  Muhakalaleke okathi onimurumeela anyu Yehova muryeene mmiravo. (Mus. 12:1.)​—15/1, ipaaxina 19-20.

Ikhavalo xeeni xexe sipacenrye weetta mwaakha wa 1914?

Yesu Kristu, toneettiha ekhavalo yootteela, muteko woopacerya ovanre awe ti omoomola wiirimu Satana ni axetwani awe. Mulipa-oneettiha ekhavalo yooxeerya ntoko mooro, ookhalana owerya wookumiha murettele mulaponi, tthiri ikhotto sinimakela waahaaxa apinaatamu. Mulipa-oneettiha ekhavalo yooriipa, onithoonyerya etala. Mulipa-oneettiha ekhavalo ehinooneya saana, onniwiiva atthu orumeelaka iretta sootakhala. Nummuru na atthu akhwiiye khininsuweliwa. (Wis. 6:2-8)​—1/2, ipaaxina 6-7.

Niira na othela wa mwapwittipwitthi nilokiheriwe wira niireye liini?

“Niira na othela wa mwapwittipwitthi” nniireya nuumala Mwene Yesu Kristu owara ekatana ni orowa waaxintta awanani awe, eyo enirowa wiiraneya nuumala ompwetexa Babilooniya Muulupale ni nuumala owaniwa ekhotto ya Harmagedoni.​—15/2, epaaxina 10.

Exeeni yaawiiriha aYuda eseekulu yoopacerya ‘omulipelela’ Mesiya? (Luka 3:15)

Khannisuwelexa vakhala wira aYuda a eseekulu yoopacerya yaaniwexexa eprofesia ya Daniyeli enilavula sa orwa wa Yesu. (Daniyeli 9:24-27) Hata vari siiso owehasa wene awo yaahiiwa masu a nlaikha nle naalavunle ni amakampusi naaleelaka oyariwa wa Yesu ni masu a profeta muthiyana Anna yoowo aahimmye wira aahimoona Yesu ori mwaana mpaani mwa Muluku. Nave asuweli yaahirwa omoona “mwené àYuda oyariwe nanano”. (Math. 2:1, 2) Muhoolo mwaya Yohani Mbatiza aahihimya wira moohipisa aamukhumelela Kristu.​—15/2, ipaaxina 26-27.

Moota xeeni ninrowa ahu osyaka wira masu ahu oowi Aayo ahikhale Nnaari? (2 aKor. 1:18)

Okathi mukina sinnikhumelela itthu sinnooceliha waakhwaniherya ele elaihenrye ahu. Masi vakhala wira ninnileiherya etthu nihaana opaka sotheene siniwerya ahu wira naakhwaniherye.​—15/3, epaaxina 32.

Ninrowa osyaka sai yooweeha ya woona epornografia?

Mavalo mararu akhanle oonikhaliherya taala: (1) Mukhapelele Maitho Anyu, oweha ilatarato sinitumererya orupihana, maana eyo pooti oniiriha opaka itthu soohiloka. (2) Muxintte miyuupuwelo soohiloka, muupuwelelaka itthu “sikhanle s’ekekhai ni sottittimiheya, mpakeke mavekelo. (3) Nikhapelele mweettelo ahu nisyakaka ifilme ni Web site sinikumiherya epornografia.​—1/4, ipaaxina 10-12.

Mixankiho xeeni sinikhumela itthoko seiye namuyari mmosa onithaama awe orowaka ovara muteko elapo ekina wira ophwanye musurukhu munceene?

Vaavo anamuyari anivaalaana aya ni emusi ya anamwane annipahuwa mmupuweleloni ni mmweetteloni mwaya. Anamwane awo pooti opacerya waakhupanya anamuyari aya. kNto anamathelana anikhala oovalaana mukina ni mukhwaawe ennaaphwanya yooweeha ya oraruwelana.​—15/4, ipaaxina 19-20.

Vaavo atakhali yaiviwa aya, xeeni yantiwa aya metto saya?

Atthu a oRoma yaaniwiiva atakhali yaakhomelaka vamwirini. Ayuda yaahivekela wira metto sa alavilavi ale yaakhomeliwe vakhiviru ni Yesu sintakasiwe. Eyo yanwiiriha atthu ale ohimumula saana ni waakuva okhwa. Nto khiyaarowa oviriha ohiyu wotheene ari vamwirini. (Otum. 21:22, 23)​—1/5, epaaxina 11.

Makoho xeeni maxexe akhanle ahu owuupuwelaka okathi onilavula ahu ni atthu anaalaleerya ahu?

Atthu xeeni anrowaka waalaleerya? Nipuro xeeni kinrowa aka waaphwanya? Okathi xeeni wooreerela waaxukurya? Enamuna xeeni kikhanle aka oolavulana?​—15/5, ipaaxina 12-15.

Atthu akavi anikhwa khula mwaakha mwaha wa soona?

Eseekulu 20 oowiiva atthu oowiiraka 100.000.000. Khula mwaakha onniwiiva atthu oowiiraka 6.000.000.​—1/6, epaaxina 3