BIIBILIYA ONNIRUKUNUXA MIRIMA SA ATTHU
Miyo Kaaphavela Mureerelo aka Paahi
Elavuliwe ni Christof Bauer
MWAAKHA OYARIWE AWE: 1951
ELAPO OYARIWE AWE: WALEMANHA
MWAHA ENE: AARI MUTTHU OOWIIXINNUUHA NI OOWIIROROMELA
MWEETTELO AKA WA KHALAI: Iyaakha soopacerya sa okumi aka, hiyo naakhala waattamela epooma ya Leipzig, mpantta onikhuma nsuwa wAlemanha, vakhiviru ni ifronteera sa oRepública Tcheca ni oPolônia. Kirina ene iyaakha 6, mwaha wa muteko wa apaapa naahithaamela oBrasil, nuumala-vo wEquador.
Kirina ene iyaakha 14, kaahiroihiwa wAlemanha ocentro internato weiwo kaasoma aka. Okhala wira anamuyari aka yaakhala wAmerica do Sul, miyo kaahaana wiikhapelela mmensaka. Nto kaahikhala mutthu oowiiroromela paahi. Nave nkaavaha ephoole moota sowiira saka saaxankiha aya akina.
Kirina ene iyaakha 17, anamuyari aka yaahitthikela wAlemanha. Wanipacerya, kaakhala naawo. Masi, mwaha wa mukhalelo aka wowiixinnuuha, nkaawenrye ovikaniha okhala naawo. Nto kirina ene iyaakha 18 kaahikhuma owaani.
Miyo kaari mutthu ooxankiheya, nave kaanaavya yoolakela ya okumi. Nuumala otokosa makhuuru oovirikana, kaahikupali wira enamuna yooloka ya orumeela okumi aka, waari wiixutta sa eplaneta ahu ehinatthi ohononiwa ni atthu.
Kaahikhuma wAlemanha, nto kimuthuma moota mwaamukhaani, ni kithaamela wAfrika. Masi mohipisa, kaahitthikela wEuropa wira kamulokihe moota aka. Nihiku nikina, miyo kaari ophareya wa oPortugal. Nto nihiku nenlo, kaahithanla omuhiya moota aka wira kipacerye weetta ni ekalawa.
Kaahikela egrupu ya amiravo yaaphavela weetta ni ekalawa arowaka Ephareya ya Atlántico. Eriyari ya egrupu eyo, kaahimusuwela muthiyana aarowa okhala mwaaraka, Laurie. Wanipacerya, naahirowa isisiro sa oCaribe. Nuumala-vo oPorto Rico okathi vakhaani, muhoolo mwaya naahitthikela wEuropa. Naanilipelela omphwanya barku yoowo naarowa ahu omurumeelaka okathi wootthekula. Nuumala omwaavya barku owo mwa myeeri 3, palano ahu aahimala mowaakuveya. Miyo kaahivariwa ni atoropa a wAlemanha.
Kaahiviriha myeeri 15 kiri ene toropa eetta ni anavio wAlemanha. Okathi owo, kaahimuthela Laurie nto naahiilokiherya wira ninvikanihe palano ahu oweetteetta. Kihinatthi orowa otoropani, kaahimuthuma barku oniitthaniwa barco salva-vidas. Nto kiri ene otoropani naahimurukunuxa barku ole khukhala barku ootthekulana. Nave naahimpaka palano woomurumeela barku ole ntoko enupa ahu wira nivikanihe osuwela eplaneta. Kimalihakaru muteko wa etoropa, kaahixukuriwa ni Anamoona a Yehova, nto kipacerya omusoma Biibiliya.
MOOTA BIIBILIYA ORUKUNXE AWE OKUMI AKA: Wanipacerya, kuupuwela wira miyo nkaatthuneya orukunuxa okumi aka. Maana miyo kaahimuthela muthiyana yoowo khaakhalana aka, nave kaahihiya ompaha soona. (aÉfeso 5:5) Okhala wira naanuupuwela orowa ilapo sinci, kuupuwela wira orumeela ikumi sahu wira nisuwele itthu sipattuxiwe ni Muluku, yaari etthu yooreera.
Masi veekeekhai, kaahaana opaka marukunuxo. Mwaha wookhala mutthu oowiixinnuuha ni oowiiroromela, miyo kaacalela paahi osuwela waka ni itthu kaaweryaka opaka. Miyo kaaphavela mureerelo aka paahi.
Nihiku nimosa, kaahisoma Mwaha waalavuliwe ni Yesu vamwaako. (Matheyo, miru 5-7) Wanipacerya, kaahitikiniwa voohimya sa ohakalala waalavuliwe ni Yesu. Mwa ntakiheryo, aahilavula wira ale avoliwe etala ni arina ntthona anoophwanya ohakalala. (Matheyo 5:6) Miyo kaaniikoha wira: Moota xeeni mutthu oovoliwa etala onikhala awe oohakalala? Nto okathi kaavikaniha aka omusoma Biibiliya, kaahiixutta wira otheene ahu nihaana osiveliwaka yoolya ya omunepani, eyo piiyo, osoma Moolumo a Muluku. Masi nihaana wiiyevihaka okathi oniphavela ahu itthu somunepani. Yesu aahimyale so: ‘Ale anisuwela sootthuneya saya somunepani anrowa ohakalala’.—Matheyo 5:3, Tradução do Novo Mundo.
Nuumala opacerya omusoma Biibiliya wAlemanha, hiyo naahithaamela oFrança, nuumala-vo, wItalia. Khula opuro naarowa ahu, naanaaphwanya Anamoona. Miyo kaanitikinihiwa mwaha wa ophentana waya wekeekhai ni wuuraana. Kaahoona wira Anamoona yaari anna tthiri. (Yohani 13:34, 35) Muhoolo, miyo ni mwaaraka naahibatiziwa nto khukhala Anamoona a Yehova.
Nuumala obatiziwa, kaahivikaniha opaka marukunuxo. Miyo ni Laurie naahuupuwela olapuwa costa africana ni Ephareya ya Atlántico wira nirowe wEstados Unidos. Nto niryeene mbarkuni mwahu eriyari ya ephareya, kaahoona wira miyo nkihiyo etthu kailikanyiha ni Mpattuxa ahu oowerya. Okhala wira kaahikhalana okathi munceene mphareya mme, kaahimusoma Biibiliya oratteene. Kaahitikinihiwa vanci ni okumi wa Yesu valaponi. Owo aari mutthu oomalela aarina owerya woopaka khula etthu yaaphavela awe, masi khaaphavela mureerelo awe. Owo khaaphavela wiivuwiha, masi onvuwiha Tiithi awe a wiirimu.
Wuupuwelela ntakiheryo na Yesu waahikikhaliherya woona wira kaahaana opweha Omwene wa Muluku opuro woopacerya, ohiya waavya itthu saaphavela aka paahi. (Matheyo 6:33) Nto okathi naaphiyale ahu wEstados Unidos, naahithanla okhala elapo yeele wira nimulompeke Muluku ahu saana.
MOOTA OTTOTTENLE AKA MUREERELO: Khalai, okathi kairoromelaka, ikwaha sinceene nkaasuwela moota woopaka soothanla sooloka. Masi vano, koophwanya eliivuru enivaha miruku soororomeleya. (Yesaya 48:17, 18) Nave, kihiixutta wira Muluku oonipattuxa wira nimukokhoreleke ni waakhaliherya akina wira yiixutte sa yena.
Weettela malakiheryo a Biibiliya, woolipiha ekasamento ahu. Nave, noophwanya mareeliho mwaha woomuyara mwaana mwaamuthiyana, yoowo vano onimusuwela ni omphenta Yehova.
Ekeekhai wira okathi mukina ninnikumana mixankiho. Masi, okhala wira Yehova onninikhaliherya, hiyo noolakela omurumeela ni omuroromela mahiku otheene.—Miruku 3:5, 6.
[Eponto yuulupale epaaxina 15]
Kaahoona wira kaahaana opweha Omwene wa Muluku opuro woopacerya mookumini mwaka