MWAHA WA VAKAAPANI | NIIREKE NINNIVIKANIHA OKHALA AKUMI NUUMALA OKHWA?

Munrowa Ororomela Sai Nlipelelo wa ale Akhwiiye?

Akina anuupuwela wira ti vootthekeya okupali wira alipa-ookhwa anookhala-tho akumi. Murummwa Paulo khuupuwela siiso. Owo aalempe so: “Hiyo namuroromelaru Kristu w’ekum’ila pahi, nòtepa otakhaliwa wavikana atthu othene! Nto vekekhai Kristu òhihimuwa, ni ti mulipu w’ohihimuwa w’alipa-òkhwa”. (1 aKorinto 15:19, 20) Paulo aanikupali wira tthiri onookhala ohihimuwa. Etthu yaamukupaliha waari ohihimuwa wa Yesu.a (Miteko 17:31) Ti nthowa naya Paulo omuhimmye awe Yesu okhala “mulipu” eyo piiyo, ole opacenrye ohihimuxiwa wira aphwanye ekumi ehinimala. Akhala wira Yesu aari oopacerya eyo enooniherya wira yaamukhala akina.

Nthowa nikina ninnikupaliha wira onookhala ohihimuwa, mwaha woowi ‘Muluku khonotha’. (Tito 1:2) Yehova khotonko wootha, ni khonikhala-khala oothaka. Niireke owo onoowerya oleiherya waahihimuxa alipa-ookhwa, masi-tho ohaakhwaniherye yooleiherya eyo? Tthiri nnaari.

Ophenta wa Yehova woomwiiriha oleiherya waahihimuxa alipa-ookhwa. Yobi aakonhe so: “Mutthu okhwiye onowerya okhala-tho mukumi? . . . Vano nyuwo mwamukìhana, miyo kiwakhuleni: mwamusiveliwa [“mwaamunkheliwa”, NM] ni miyo, kipattuxiwe ni nyuwo”. (Yobi 14:14, 15) Yobi aanikupali wira Tiithi awe oophenta a wiirimu aamunkheliwa ni yena wira omuhihimuxe. Niireke Muluku ooturukeya? Biibiliya onaakhula so: “Miyo k’Apwiya [“Yehova”, NM]: nkinirukunuwa”. (Malakhiya 3:6) Tthiri Muluku onniphavela waahihimuxa ale akhwiiye, wira ephwanye ohakalala. Eyo ti etthu khula tiithi oophenta oniphavela awe nuumala okhweliwa mwanawe. Masi, Muluku ookhalana owerya ni onniphavela opaka eyo.​—Esalimo 135:6.

Yehova ononvaha owerya Mwanawe wira aaphwanyihe ohakalala ohinimala ale aninla mwaha wookhweliwa. Yesu onoonela sai mwaha owo? Ahinatthi omuhihimuxa Laazaro, “Yesu ahinla” vaavo aawenhe awe arokora awe Laazaro ni apatthani, eriipiwe ene murima. (Yohani 11:35) Nihiku nikina, Yesu aahikumana ni naamukhweli a oNayini, okhweliwe ene mwanawe mmoseene. Yesu “ahimonela othunku, khumuhimerya wira: ‘Muhinlé!’” Moohipisa Yesu aahimuhihimuxa. (Luka 7:13) Tthiri Yesu onniriipiwa murima vaalupale mwaha wa naakhwa. Nto Yesu onoohakalala vanceene vaavo onirowa awe opaka etthu enirowa waahakalaliha otheene yaale ariipiwe murima!

Niireke mootoko okhweliwa? Nyuwo pooti wuupuwelaka wira okhwa khonimala. Masi Muluku onoomaliha muxankiho owo; nto oomuruma Mwanawe wira opake eyo. Nto Muluku oniphavela wira muttottele mureerelo. Owo oniphavela wira mwawaakheleke amusi anyu akhwiiye. Nkuupuwelani mumpakaka palano hoothe mwa mahiku oohimala muhilipelelaka-tho oleihana ni ale akhwiiye!

Lionel, oromoliwe wanipacerya, ohimmye so: “Wanipacerya nkaamukupali mutthu aakileela sa ohihimuxiwa. Masi kaahiixutta mBiibiliyani wira eyo ekeekhai! Nto kinnilipelela waaweha-tho ataata akhwiiye”.

Niireke munniphavela osuwela itthu sikina? Anamoona a Yehova anoosiveliwa owooniheryani mBiibiliyani mwanyu ele enaakupaliha wira muhoolo onookhala ohihimuxiwa wa alipa ookhwa.b

[Inoota]