NYUWO MWAANISUWELA?

Xeeni Yosefe aamentthe awe ereru ohinatthi orowa wa Farawo?

Eliivuru ya Maphattuwelo, enihimya wira okathi Farawo aaxankale awe mwaha wa oloha wawe, aahirumiha oroweliwa muHeeberi Yosefe mukhatteya, wira ataphulele oloha iwo. Yosefe iira ovirinhe ene iyaakha sinceene mukhatteya. Nnaamwi yooruma ya Farawo yaari yowaakuveya, Yosefe aahuupuwela omettha ereru toko ohinatthi orowa. (Maphattuwelo 39:20-23; 41:1, 14) Mwaha woowi mulipa-oolepa eliivuru ela ooromola sa omettha ereru, eyo enooniherya wira owo aanisuwela saana soolema sa atthu a wEjiitu.

Ohimetta ereru, yaari yoolema ya maloko manceene a khalai, waahela muhina aHeeberi. Masi, Enciclopédia de Literatura Bíblica, Teológica e Eclesiástica, ya McClintock ni Strong, enihimya wira “atthu a wEjiitu a khalai paahi ti naari nloko na epantte enikhuma nsuwa yaamettha ereru”.

Niireke atthu awo yaamettha ereru paahi? Erevista Biblical Archaeology Review, enihimya so: “Moovarihana ni soolema sikina sa wEjiitu, atthu yahaana wiilokiherya ahinatthi orowa wa Farawo ntoko siira aya okathi yaakela ya mutemplo”. Nto Yosefe aahaana omettha ikharari sotheene ni manri a erutthu.

Eliivuru ya Miteko enihimya wira apapawe Timootheyo yaari muGriki. Niireke eyo entaphulela wira awo yaayariwe elapo ya oGresia?

Nnaari. Okathi murummwa Paulo aalepa awe moolumo oowuupuxeriwa ni Muluku, aanooniherya wira waahikhala ovirikana eriyari ya aYuda ni aGriki. Owo aanirumeela nuulumo noowi aGriki aahimyaka atthu otheene yahaakhanle aYuda. (aRoma 1:16; 10:12) Paulo aanipaka eyo okhala wira nttaava ni soolema sa aGriki saanirumeeliwa mapuro yaale aalaleerya awe.

Okathi wa khalai, tani ooniwa okhala muGriki? Eseekulu 4 AEC, Isocrates, mulipa oolavula myaha a wAthena, olavulaka sa Soolema sa aGriki, aahitthokiherya mowiittottopa moota soolema iyo suulanne aya molumwenkuni. Owo aahimyale so: “Aniitthaniwa okhala aGriki taale anttottela mureerelo sowiixuttiha sahu ohiya ale ayariwe oGresia paahi”. Woonasa wene, apapawe Timootheyo ni atthu akina Paulo aahimya awe okhala aGriki, yeettela soolema sa eGriki; masi khahiyo yaayariwe oGresia.​—Miteko 16:1.