Nwiixuttihe Aniinyu Wira Akhale Arumeyi a Muluku
1. Exeeni Esalimo 148:12, 13 enaatumererya aya opaka anamuyari eeKristau?
1 Amiravo annilattuliwa wira anvuwiheke Yehova. (Esal. 148:12, 13) Tivonto, anamuyari eeKristau, annaalakiherya anaaya itthu sinci, ohiya paahi owiixuttiha weettela ikeekhai sa Biibiliya ni malamulo a mweettelo wooloka. Awo anniwiixuttiha anaaya okhala anamalaleerya a ihapari sooreera. Nto, vaniweryaneya sai opaka eyo moohihiyererya?
2. Moota xeeni ntakiheryo nooreera na anamuyari nnaakhaliherya aya anaaya?
2 Nvaheke Ntakiheryo Nooloka: Mukhulupale Gedeyoni aahaahimeerya anakhotto awe 300 wira: “Mwireke ntoko sinìraka miyo”. (Makh. 7:17) Okhala wene, anamwane anipaka ele eniwoona aya anamuyari aya yiiraka. Tiithi mmosa onivara muteko ohiyu, vaavo vanirwa awe owaani eSaabadu voosisu, ohinatthi orowa orupa onnaakuxa anaawe ni khiyarowa olaleerya nnaamwi otemmwe ene. Nto moohilavula etthu, owo onniwiixuttiha anaawe wira olaleerya ti muteko wootthuneya. (Math. 6:33) Niireke aniinyu annoona wira nyuwo munniluttuweliwa miteko sa Muluku, ntoko ovekela, omusoma Biibiliya, okomentari ni olaleerya? Ekeekhai wira khamuniwerya okhala ntakiheryo noomalela mwa itthu sotheene. Masi, wiimananiha wanyu onoowiiriha aniinyu otthara ntakiheryo nanyu, akhala wira animoona oluttuweliwa wanyu omulompa Yehova.—Otum. 6:6, 7; aRom. 2:21, 22.
3. Soolukama xeeni somunepani anamuyari anitthuneya aya waakhaliherya anaaya wira akhalane?
3 Mwaakhaliherye Okhalana Soolukama Somunepani: Moohikhulumuwa anamuyari anniwiixuttiha anaaya weetta, olavula, owara, ni opaka itthu sikina. Vaavo anamwane vaninnuwa aya, sinnikhumelela soolukama sikina. Anamuyari ari maKristau, annaakhaliherya anaaya ophwanya soolukama somunepani moovarihana ni munnuwelo ni owerya waya. (1 aKor. 9:26) Niireke munniwiixuttiha aniinyu ovaha ikomentaario arumeelaka masu aya, ni oreherya myaha sivahiwa aya sa Exikola ya Orummwa wa Muluku? (Esal. 35:18) Munniwiixuttiha inamuna soovirikana sa muteko woolaleerya? Niireke munnaakhaliherya wira abatiziwe ni okela orummwa wa okathi wotheene? Munnaakhaliherya aniinyu opatthana ni anamalaleya yaale anisiveliwa olaleerya wira aniinyu alipeke momunepani?—Mir. 13:20.
4. Mureerelo xeeni onikhumelela akhala wira anamuyari anniwiixuttiha anaaya olaleerya okhuma enamwane aya?
4 Nasaalimo aahimmye so: “Muluku aka, nyuwo mokixuttiha okhuma omiravo aka: mpakha olelo kolaleya sotikiniha sanyu”. (Esal. 71:17) Tivonto, nwiixuttiheke aniinyu okhuma enamwane aya wira akhale anamalaleerya. Tthiri, owiixuttiha wanyu itthu somunepani ti etthu enirowa waakhaliherya yannuwa vale!—Mir. 22:6.