Nwiixuttihe Aniinyu Wira Akhale Anamalaleerya
1. Exeeni Esalimo 148:12, 13 enaatumererya aya opaka anamuyari eeKristau?
1 Yehova onnaalattula amiravo wira anvuwiheke owo. (Esal. 148:12, 13) Siiso, anamuyari eeKristau, annaalakiherya anaaya itthu sinceene ohiya paahi owiixuttiha weettela ikeekhai sa Biibiliya ni malamulo a mweettelo wooloka. Tivonto, anniwiixuttiha anaaya okhala anamalaleerya a ihapari sooreera. Nto, vaniweryaneya sai opaka eyo moorowa vahoolo?
2. Moota xeeni ntakiheryo nooreera na anamuyari nnaakhaliherya aya anaaya aya?
2 Ntakiheryo Nooloka: Namaphuka Gedeyoni aahaahimeerya atthu awe 300 wira: “Mukiwehe, mwireke ntoko sinìraka miyo”. (Makh. 7:17) Okhala wene, anamwane anipaka ele eniwoona aya anamuyari aya yiiraka. Tiithi mmosa yoowo onivara muteko ohiyu, vaavo vanirwa awe owaani eSaabadu voosiisu, ohinatthi orowa orupa owo onnaakuxa anaawe ni khiyarowa olaleerya nnaamwi otemmwe ene. Etthu eyo enipaka awe enniwiixuttiha anaawe wira olaleerya ti muteko wootthuneya. (Math. 6:33) Niireke wira aniinyu annoona ohakalala wanyu okathi onivekela anyu, onimusoma anyu Biibiliya, okomentari ni olaleerya? Ekeekhai wira khamuniwerya okhala ntakiheryo noomalela mwa itthu sotheene. Masi, opaka eyo pooti owiiriha aniinyu otthara ntakiheryo nanyu, akhala wira animoona wiimananiha wanyu mmuteko wa Yehova.—Otum. 6:6, 7; aRom. 2:21, 22.
3. Soolukama xeeni somunepani sinireerela aya anamuyari waakhaliherya anaaya ophwanya?
3 Soolukama Sinooniherya Orowa Vahoolo: Moohikhulumuwa anamuyari anniwiixuttiha anaaya weetta, olavula, owara, ni itthu sikina. Vaavo anamwane vaninnuwa aya, sinnikhumelela soolukama sikina. Anamuyari ari maKristau, annaakhaliherya anaaya ophwanya soolukama somunepani moovarihana ni munnuwelo ni owerya waya. (1 aKor. 9:26) Niireke wira munniwiixuttiha aniinyu ovaha ikomentaario arumeelaka masu aya, ni oreherya myaha sivahiwa aya sa Exikola ya Orummwa wa Muluku? (Esal. 35:18) Nto, munniwiixuttiha aniinyu inamuna sotheene sa muteko woolaleerya? Niireke wira munnaakhaliherya wira abatiziwe ni okela orummwa wa okathi wotheene? Munnaakhaliherya aniinyu opatthana ni anamalaleya yaale anisiveliwa olaleerya wira aniinyu alipeke momunepani?—Mir. 13:20.
4. Mureerelo xeeni onikhumelela akhala wira anamuyari anniwiixuttiha anaaya olaleerya okhuma enamwane aya?
4 Nasaalimo aahimmye so: “Muluku aka, nyuwo mokixuttiha okhuma omiravo aka: mpakha olelo kolaleya sotikiniha sanyu”. (Esal. 71:17) Tivonto, nwiixuttiheke aniinyu okhuma enamwane aya wira akhale anamalaleerya. Tthiri, owiixuttiha wanyu aniinyu itthu somunepani ti etthu enirowa waakhaliherya yannuwa vale!—Mir. 22:6.