Mootoko Okhala Pioneero Ookilaatheya?
1. Eparakha xeeni maKristau manceene aniphwanya aya, masi etthu xeeni eniiraneya wa akina?
1 Khula mwaakha, maKristau ikonto sinceene anniphwanya eparakha ya “owixuttiha atthu” ihapari sooreera akelaka opioneero. (Mit. 5:42) Masi, akina annihiya opioneero mwaha wa mathowa oovirikana. Nto, akhala wira nyuwo mootoko okhala pioneero, xeeni ohivareryaka makhalelo anyu a vano wira nwehe vaaweryaneyaka otthikela opioneero?
2. Xeeni vanitthuneya aya ovarerya makhalelo aya a vano ale khalai yaari mapioneero?
2 Makhalelo Oovirikana: Eyo enniiraneya akhala wira etthu yaawiirinheni ohiya opioneero, vano yoomala. Mwa ntakiheryo, akhala wira mwaahihiya opioneero mwaha wa ohiwerya ovaha iwoora 90 khuta mweeri, xeeni ohitthikelaka opioneero maana vano sinivekeliwa iwoora 70? Okhuma vaavale muhiiye anyu opioneero mpakha va, miritti saarina anyu vatthokoni wala omutekoni, khisivukunwe? Murokora mmosa yoowo aahiiye opioneero mwaha wa owereyasiwa, aahitthikela opioneero orineene iyaakha 89. Mwaha woowi khaakhala oxipiritali mwaakha wotheene, owo aahoona wira ekumi awe yaanimweemererya otthikela opioneero.
3. Atthu a vatthokoni anirowa wiiraana sai wira akhaliheryane okela opioneero?
3 Waaniheryasa, khimutonko okhala pioneero, masi pooti wira mutthu mukina a etthoko anyu oohiya opioneero maana onimukhapelela mmusi a vatthokoni oowuuluvala. (1 Tim. 5:4, 8) Niireke wira nyuwo wala akina a vatthokoni-vo animwiimananiha omukhaliherya ole ohiiye opioneero? Sai ohivaanelaka ni atthu a vatthokoni-vo? (Mir. 15:22) Akhala wira atthu a vatthokoni anniiraana, vanooweryaneya wira mmosa okele opioneero, nto akina a vatthokoni-vo animoonaka wira annikhaliherya oratteene olaleerya.
4. Mpakeke exeeni akhala wira khimunwerya otthikela opioneero?
4 Muhikhulumuwe akhala wira makhalelo anyu khaniweemereryani otthikela opioneero. Tthiri, ophavela wanyu okela opioneero onnimuhakalaliha Yehova. (2 aKor. 8:12) Nto, mmuteko anyu woolaleerya wa vano, murumeele osuwela ophwannye anyu okathi waari anyu pioneero. Nave-tho, munvekeleke Yehova, ni mphaveleke inamuna sikina sa moota woorukunuxa makhalelo anyu. (1 Yoh. 5:14) Tthiri, Yehova onimoophwanyihani ‘murerelo mulupale onikhweiherya olaleya’ wira nyuwo mphwanye ohakalala mwaha wa okela opioneero!—1 aKor. 16:9.