Soohimmwa

◼ Iliivuru sinrowa okaiwaka, Janero 2012: Biibiliya Oniixuttiha Exeeni Tthiri? Mwiimananihe opaceriha soosoma sa Biibiliya mukwaha woopacerya oxukurya. Akhala wira atthu a vatthokoni aakhalana eliivuru eyo, masi khaniphavela omusoma Biibiliya, pooti ovaha erevista ya khalai wala ebroxura enimusivela mutthu owo. Feverero: Anamalaleerya pooti okawaka iliivuru iya: A Biblia a—Palavra de Deus ou de Homem?, Esiiri ya Etthoko Yoohakalala, Existe Um Criador Que Se Importa com Você?

◼ Okhuma Feverero, axitokweene a isirkwitu anoolavulaka mwaha musya wa atthu otheene oni: “Nyuwo Munnimuroromela Yehova”

◼ Erevista A Sentinela ya Atthu Otheene opacerya 1.° de Feverero 2012, enoruuhaka mwaha oni: “Minhas Lições da Bíblia”. Mwaha ola onilepeliwa axitiithi wira arumeeleke moophavela waakhaliherya anaaya arina iyaakha 3 wala ahiniphiya. Mwaha ola, onoovirikanihiwaka ni myaha sini: “Ensine Seus Filhos” ni “Para os Jovens”.

◼ Nlamulo na oMoçambique na Muteko wa Etoropa, ninvekela wira atthu otheene animaleliha iyaakha 18 arowe olempwa Nipuro Ninthanliwa Atthu Anrowa Etoropa (Centro de Recrutamento Militar). Khuta mwaakha okathi wa olempwa iwo onipacerya 1 a Janero mpakha 28 a Feverero. Axitokweene pooti owuupuxerya anamalaleerya yaale anaattamela iyaakha 18.

◼ Ti voohakalaliha ohimya wira eLar misionaario ya Wamphula enrowa opakiwa okhala Nipuro na Otaphuleliwa Nttaava na Emakhuwa. Vano anipakiwa marehereryo wira anamataphulela yakhalane opuro wooreerela ovara muteko ni orupa. Ninnikupali wira othaamela wa anamataphulela ala epooma ya Wamphula, onookhaliherya vanceene muteko aya ni miloko sinrowa aya orumeelaka.