“Iyaakha 100 Nilaleyaka Omwene!”—Mwaha ola onikhuma eliivuru Testemunhas de Jeová—Proclamadores do Reino de Deus
Ipaaxina 259-260
Alipa Oomusoma Biibiliya khiyaathukumanne opuro ole yuupuwelaka sa ovariwa muteko woolaleerya valaponi iyaakha sa muhoolo. Mwekeekhai, yaanihimya wira ole waari muthukumano wookiserya ehinatthi okuxiwa ekerexa . . . wira eroohiwe wiirimu moovarihana ni yootthuna ya omwene wa Muluku, wira yakhale ohoolo wa Pwiya ahu ni ohoolo wa Muluku ahu”. Masi, nnaamwi okathi waari vakhaani, opaka yootthuna ya Muluku yaari yoolukama aya. Nto yuupuwelaka eyo, Namathanu 8 a Setembro, munna Rutherford aahilavula mwaha ohiniliyaleya waarina muru waahimya so: “Omwene”.
Ohinatthi opacerya muthukumano, saahikhala ipaphelo suulupale saapwehiwe ipantte sovirikana sa opuro ole. Ipaphelo iyo saahikhalana ileetera suulupale saahimya so: ADV. Okathi wa mwaha, ileetera iye saahipacerya okhalana yootaphulela aya vaavo mulipa oolavula mwaha aahimyale awe so: “Mukhale anamoona owaamini ni eekeekhai a Pwiya. Nvikanihe owana mpakha omala-mala itthu sotheene sa etiini yoowoka. Mulaleye ihapari mittetthe sotheene. Olumwenku ohaana osuwela wira Yehova ti Muluku, nave Yesu Kristu ti Mwene a mamwene ni Pwiya a mapwiya. Nla nihiku nuulupale. Mooneke, Mwene onnilamulela! Nyuwo ti munrowa omulaleya. Nto, mmulaleye, mmulaleye, mmulaleye, Mwene ni omwene awe”. Mwa okathi yoowo, eroolu yuulupale ya imeeturu 11 yaahitaphuliwa ohoolo wa atthu. Eyo yaahikhalana muru muulupale woovara murima yoowo waahimya so: “Mmulaleye Mwene ni Omwene [Englexi: Advertise, wala ADV]”. Owo waari okathi woohakalaliha. Atthu otheene yaahimana makuphi moohakalala. Munna oowuuluvala yoowo aitthaniwa Pfannebecker yoowo aamoopa orkestra a asembeleya, aahipaka ethoonyeryo vasulu va muru omurumeelaka viola awe, nto khilavula ni nsu nowiiwanyeya ni elavulelo awe ya wAlemanha oriki: “Ach, Ya! Und now ve do it, no (Aayo! Nto vano nihaana olaleya omwene tthiri, kiira)?” Nto awo yaahilaleya Omwene tthiri.
Nuuvira mahiku 4, nlelo muthukumano ole ohimanle, munna Rutherford aahirowa ni anna akina muteko woolaleya Omwene empa ni empa, muttetthe wowiiraka ikiloomo 72. Masi muteko owo khiwaamalenle vaavale paahi. Olaleiwa wa Omwene waarowa wooneya olumwenku wotheene. Mwaakha wa 1922, anamalaleerya ooluttuweliwa yaavikana 17.000, a ilapo 58, yaahiirela mpantta muteko woolaleerya. Munna George Gangas, yoole aaronwe muthukumano ole ni muhoolo mwaya khiirela mpantta Nikhuuru Noolamulela, aahilavula sa eprograma ele ya eCedar Point oriki: “Moolumo ale yaari etthu ehinittipha yeeyo elempwale mmuupuweloni ni mmurimani mwaka. Nto nkinliyala muthukumano ole mahiku otheene kiryaaka mukumi”.
[Ipaaxina soohikhala etthu 4,6]