Nilokiherye Inamuna Sahu Soolaleerya—Niwiixuttihaka Ale Anaasomiha Ahu Biibiliya Osuwela Opaka Yoosoma Yooloka
Otthuneya Waya: Wira ale anaasomiha ahu Biibiliya arowe vahoolo omunepani, anitthuneya ohela mmuruni mwaya itthu sinceene ohiya paahi sowiixuttiha soopacerya sa Nuulumo na Muluku. (aHéb. 5:12-6:1) Vanitthuneya wiimananiha wira mutthu opake yoosoma awe. Eyo enihela muhina ovaraaniha ele mutthu enisuwela awe ni ele eniixutta awe, nto khiyuupuwelela moota woovarihela muteko itthu iyo. (Mir. 2:1-6) Tthiri omwiixuttiha ole onimusomiha anyu onoomukhaliherya osuwela ophavelasa waakhuliwa wa nikoho orumeelaka iliivuru sahu sa eKristau. Wiimananiha onipaka aya wira attharihele ele eniixutta aya onrowa waakhaliherya oxintta mixankiho sinrowa waakhumelelaka muhoolo yakhala Kristau.—Luka 6:47, 48.
Moota Woopaka Eyo:
• Mmulakiherye otthuneya waya ovekela nikhaliheryo na Yehova ohinatthi opacerya opaka khula yoosoma.—Yoh. 14:26; 1 aKor. 2:10.
• Okhuma wanipacerya, mmutumereryeke ole onimusomiha anyu wira iilokiheryeke muhinatthi opaka yoosoma ya Biibiliya. Mmooniherye eliivuru anyu, nto mmuthoonyerye moota wookhwenyenya nipuro nnaakhuliwa aya nikoho, nuulumo nootthuneya wala efrase.
• Mmulipiherye ole onimusomiha anyu wira aakhuleke makoho awo orumeelaka masu awe. Musyake opaka yoosoma ya makoho ni waakhuliwa wala waakhuliwa onisommwa muliivuruni paahi.
• Mmutumererye ole onimusomiha anyu wira omusomeke Biibiliya khula nihiku. Mmooniherye eprograma ya omusoma Biibiliya eri va jw.org, yeeyo etthokihiwe mwa enamuna yoovareleya muteko. Wala elista eri erevista A Sentinela 1 a Agosto 2009, ipaax. 15-18. Eyo enoomukhaliherya okhalana eprograma yooloka ya omusoma Biibiliya khula nihiku, nnaamwi eyo evekelaka wiimananiha, ennikumiherya mireerelo.—Esal. 1:2, 3.
• Mmooniherye ole onimusomiha anyu Biibiliya moota woophwanya waakhuliwa wa makoho a mBiibiliyani omurumeelaka Watchtower Library BIBLIOTECA ON-LINE DA TORRE DE VIGIA wala Guia de Pesquisa. Mmukhaliherye osuwela isimbolu sa iliivuru sahu sinirumeelaxa ahu mmuthukumanoni.
Mweererye Ela Mweeri Yoola:
• Nuumala othokorerya khula mwaha wala muru wa eliivuru enisoma anyu, munvekeleke ole onimusomiha anyu wira uuluule orumeelaka masu vakhaani ele yiixuntte awe. Vakhala wira khamurina mutthu onimusomiha anyu, mweererye wiixutta otthokiherya masu a mBiibiliyani wala a ettima emosa ya Owehaweha, murumeelaka masu vakhaani, nto eyo enimookhaliheryani olokiherya inamuna sanyu sa wiiwexexa ele enisoma anyu.