Nyuwo Mwaanisuwela?
Xeeni Yehova aaweemererya awe aisarayeli onvaha masiya ni ipompa?
NLAMULO na Moise, naaniweemererya aisarayeli onvaha Yehova ipompa, ni masiya ntoko mukuttho. Ikwaha sinceene, okathi ninlavuliwa aya nlamulo na ovaha mukuttho, ipalame iye piili sinromoliwa hoothe. Nave emosa yaniranttelihiwa ni ekhwaaya. (Onam. 1:14; 12:8; 14:30) Xeeni mareheryo awo yaaphwanyiha aya mureerelo? Nthowa nimosa, okhala wira ikwaha sikina vaanixankiha ophwanya masiya. Mwaha wa xeeni?
Nsiya
Okhala wene, masiya waakuva othaama, ni anniphwanyaneya mittetthe sootheene sa wIsarayeli miyeeri sooviha. Khula eyaakha, mweeri wa Outubro vaavo ompacerya aya oriirya, annithaamela ilapo sooviha sa osuuli. Ni anihokolowela wIsarayeli okathi miri sinaaleya aya ni malaxi aniphuwa aya. (Nsip. 2:11, 12; Yer. 8:7) Eyo enooniherya wira khalai, aisarayeli vaanaaxankiha ovaha nsiya ntoko mukuttho eyiita.
Rock pigeon
Okhala wene ipompa khasinthaama. Nto vanniweryaneya ophwanya wIsarayeli miyeeri sootheene. Ohiya-vo, ipompa saamuhuuwa. (Mulikanyihe ni Yohani 2:14, 16.) Eliivuru Plantas e Animais da Bíblia, enihimya so: “Mittetthe sootheene ni isidade sa oPalestina, saanihuuwa ipompa. Khula etthoko, enupa aya yaanikhalana mwiithe aahiiso nikhuku saakhala aya ipalame. Nave yaanikhala ehili aahiiso mukula wa ipomba”.—Mulikanyihe ni Yesaya 60:8.
Epompa eri ene mmukulani
Mwaha wa Yehova oweemererya aisarayeli ovaha ipalame iye piili, onooniherya ophenta ni oreera wawe murima.