Owiiwelela anamuyari anyu onoolikana ni oliva musurukhu okomphe anyu obanko. Khula ekwaha muniliva anyu, munootepaka ororomeliwa
AMIRAVO
10 Okhala Mutthu Oororomeleya
ELE ENTAPHULELA AYA
Mutthu oororomeleya onnittottopeliwa ni anamuyari awe, apatthani awe ni mapatarau awe. Mutthu owo onniiwelela malamulo, onnivara onileiherya awe, ni onnilavula ekeekhai okathi wotheene.
XEENI VANIREERELA AYA?
Ikwaha sinceene mutthu onniroromeliwa opaka etthu mekhawe, mwaha woowi mutthu owo onnooniherya ororomeleya okhuma khalai.
“Enamuna yookhalela wira muroromeliweke ni anamuyari anyu, ori okhala mutthu ankhili ni a miruku, ohiya paahi okathi munikhala anyu naawo, nave-tho okathi munikhala anyu mekhinyu”.—Sarahi.
ELE BIIBILIYA ONIHIMYA AWE: “Mwettelo anyu okhaleke worera”.—1 Pedru 2:12.
ETTHU YOOPAKA
Inamuna iya sinittharelana sinimookhaliheryani okhala mutthu oororomeleya.
Mulavuleke ekeekhai. Atthu anoohiya woororomelani, mwakhala nawoothe. Masi, akhala wira mwa mutthu oororomeleya, vanceenexa okathi munittheka anyu, atthu akina animoororomelani.
“Okhweya okhala oororomeleya itthu saaneettelaka saana. Masi olavula ekeekhai hata etthu eyo erowaka owuulihihani muru, onoowiiriha atthu woororomelakani vanceene”.—Caiman.
ELE BIIBILIYA ONIHIMYA AWE: “Nimphavela wetta n’ixariya mwa sothene”.—aHéberi 13:18.
Muroromeleyeke. WEstados Unidos, atthu anceene anivara miteko sa recursos humanos anihimya wira etthu emosa yootepa otthuneya aniweha aya ahinatthi onvaha muteko mutthu, ori ororomeleya. Nto muroromeleyeke vano, maana eyo enimookhaliheryani mwannuwa.
“Anamuyari aka anniweha okathi kinivara aka miteko saka moororomeleya kihiwehereryaka okuupuxerya. Okathi kinipaka aka eyo, awo annitepa okiroromela”.—Sarah.
ELE BIIBILIYA ONIHIMYA AWE: “Kiholepelani kikupaliki wira munokìwelela: kosuwela wira hatá munovikana eyo evekenlyaka”.—Filémoni 21.
Mpixeke murima. Moovirikana ni wunnuwa mmukhalelo wa werutthuni, wunnuwa mmuupuweloni onnikuxa okathi wira atthu aweryeke oweha.
“Khahiyo etthu emosa paahi ekhanle owiiriha anamuyari anyu ni atthu akina woororomelani. Masi awo pooti opaka eyo akhala wira munniroromeleya khula okathi”.—Brandon.
ELE BIIBILIYA ONIHIMYA AWE: “Mukuxe murima . . . wovilela”.—aKolosi 3:12.