Mwaha 7

Mulopwana Oolipa Murima

VAAVO nuumuru na atthu naapacenrya aya wuncerereya valaponi, anamunceene a yaawo yaavara itthu sootakhala ntoko Kayini. Masi mulopwana mmosaa aari oovirikana. Owo mulopwana ola iihaniwa Henoki. Henoki aari mulopwana oolipa murima. Atthu otheene yaamurukurenrye yaavara itthu sootepa otakhala, masi Henoki nlelo aahivikaniha omurumeela Muluku.

Nyuwo munnisuwela nthowa naya atthu a okathi ole yaavara aya itthu sinceenexa sootakhala? Saana, nkaapuwelelani, Tanii aawiirinhe Adamu ni Eva ohimwiiwelela Muluku ni olya muhokorokho yoowo Muluku aahimmya awe wira khiyaatthuneya olya? Aayo, naari nlaikha nootakhala. Biibiliya oniitthana okhala Satana. Nto owo onneererya omwiiriha ori otheene okhala ootakhala.

Nihiku nimosaa, Yehova Muluku aahimuhimeerya Henoki waaleela atthu etthu yeele awo yahaaphavela aya wiiwa. Yaari ela: ‘Nihiku nikina Muluku onrowa waapwetexa atthu otheene ootakhala.’ Waaniheryasa atthu awo yaahinanariwa vanceene wiiwa ela. Awo pooti wi yaaheererya-tho omwiiva Henoki. Siiso Henoki aatthuneya okhala oolipexa murima mu waaleela atthu voohimya sa yeele Muluku yaarowa awe opaka.

Muluku kheemerenrye wira Henoki okhalee okathi munceene eriyari ya atthu ale ootakhala. Henoki aahikhala mukumi paahi iyaakha 365. Nthowa xeeni wiiraka “paahi iyaakha 365”? Nthowa noowi atthu mmahiku ale yaari aikuruu vanceene ovikana vano ni yaanikhala okathi munceene. Aayo, Metuxela mwaana a Henoki aahikhala mukumi iyaakha 969!

Saana, nuumala Henoki okhwa, atthu yaamutepeleleya okhala ootakhala. Biibiliya onihimya wira ‘etthu eri yotheene yeeyo yuupuwela aya yaari yootakhala okathi wotheene,’ nto ‘elapo ya vathii yaahisareya ohaaxa.’

Nyuwo munnisuwela nimosaa na mathowa aya vaakhanle aya muxankiho muulupalexa mulaponi mahiku ale? Nthowa noowi Satana aahikhalana ephiro esyaa yoowiiriha atthu opaka itthu sootakhala. Hiyo ninrowa wiixutta voohimya sa ela moottharelana.

Maphattuwelo 5:21-24, 27; 6:5; aHeberi 11:5; Yuda 14, 15.