MPANTTA 2

Epula ya Mutaaseke Mpakha Otaphuliwa wEjiitu

Paahi atthu athanuu ni araruu yaahivuluwa mu Epula ya Mutaaseke, masi moovira wa okathi, awo yaahincerereya nuumuru naya ikonto sinceene. Nto, iyaakha 352 vattuli va Epula ya Mutaaseke, aahiyariwa Abrahamu. Hiyo ninniixutta moota Muluku aamwaakhwanihenrya awe natiri awe onvahaka Abrahamu mwaana iihaniwa Isakhi. Nuumala vo, wa anamwane anli aaxilopwana a Isakhi, Yakobe aahithanliwa ni Muluku.

Yakobe aahikhalana emusi yuulupale ya anamwane aaxilopwana 12 ni akina aaxithiyana. Anamwane aaxilopwana 10 a Yakobe yaahimunyokha muhima aya Yosefe ni yaahimutumiha wiipotthani wEjiitu. Valokenle ene, Yosefe aahikhala namalamulela ootthuneya a wEjiitu. Vaavo etala yootakhala yaakhumelenlya aya, Yosefe aahiweehererya annawe wira oone akhala wi yaahirukunuxa murima. Wanikisa waya, emusi yotheene ya Yakobe, anaIsarayeli, yaahithaama arowaka wEjiitu. Ela yaahiiraneya iyaakha 290 nuumala oyariwa Abrahamu.

Mu iyaakha 215 saattharelanne anaIsarayeli yaahikhala wEjiitu. Nuumala Yosefe okhwa, iwee yaahikhala ipottha. Moovira wa okathi, aahiyariwa Moise, nto Muluku aahinvarihela muteko wira aataphule anaIsarayeli wEjiitu. Mwa sotheene, Mpantta wa NENLI onihela muhina iyaakha 857 sa sowiiraneya.