Mwaha 23

Sooloha Sa Farawoo

SOOVIRA iyaakha piili, nto Yosefe nlelo orii mukhatteya. Namavahererya soowurya khaamuupuwelenle. Nuumala vo ohiyu omosaa Farawoo aahiloha ikwaha piili mwa vameekh’aya vanceene, nto aahiphavela osuwela yootaphulela aya. Nyuwo munnimoona owo onrupa vo? Mmeeloni mwaya voosiisu Farawoo onniwiitthana atthu awe a miruku ni onnaaleela awosa itthu seiyo owo silohenrya awe. Masi awo khanwerya omuleela owo yootaphulela ya sooloha sawe.

Vano wanikisa waya namavahererya soowurya onnimuupuwela Yosefe. Owo onnihimya wa Farawoo: ‘Vaavo kaaryaaka mukhatteya aahikhala mulopwana yoowo aawerya otaphulela sooloha.’ Okathi ene yoowo Farawoo onnirumiha okumihiwa Yosefe mukhatteya.

Farawoo onnimuleela Yosefe sooloha sawe: ‘Kaahoona inyompe soothiyana thanuu ni piili sooneneva ni sooreera. Nuumala vo kaahoona inyompe soothiyana thanuu ni piili sowoottexa ni soohiirya. Nto sowootta iyo saahikhuura inyompe soothiyana sooneneva.

‘Mu oloha waka wa nenli kaahoona makala a etiriku mathanuu ni manli oosareya ni oottokottha yiimaleene vamutathini vaya. Nuumala vo kaahoona makala a etiriku mathanuu ni manli oophepuwa ni oowuuma. Nto makala a etiriku oophepuwa yaahipacerya omiryakasa makala a etiriku mathanuu ni manli ooloka.’

Yosefe onnihimya wa Farawoo: ‘Oloha wanyu nno vanli ontaphulela etthu emosaa. Inyompe sooneneva thanuu ni piili soothiyana ni makala a etiriku oosareya mathanuu ni manli anitaphulela iyaakha thanuu ni piili, nto inyompe soothiyana sowootta thanuu ni piili ni makala a etiriku oophepuwa mathanuu ni manli anitaphulela iyaakha sikina thanuu ni piili. Sinrowa okhala iyaakha thanuu ni piili vaavo yoolya yinceene vanrowa aya oruweriwa wEjiitu. Nuumala vo sinrowa okhala iyaakha thanuu ni piili vaavo vanrowa aya oruweriwa yoolya vakhaanixa.’

Siiso Yosefe onimuleela Farawoo: ‘Mmuthanle mulopwana mmosaa a miruku ni mmuhele okhala muhooleli oothukumanya soolya eriyari ya iyaakha thanuu ni piili sooloka. Nuumala vo atthu khanrowa ovoliwa etala eriyari ya iyaakha thanuu ni piili soonanara sinrowa ottharelana vaavo vanrowa aya oruweriwa yoolya vakhaanixa.’

Farawoo onnisiveliwa ni mupuwelelo owo. Nto onnimuthanla Yosefe wira othukumanyerye yoolya ni osuka. Mu nipuro na nenli na Farawoo, Yosefe onnikhala mutthu ootthuneyexa a wEjiitu.

Nuumala iyaakha thanuu ni tthaaru, eriyari ya etala, Yosefe onniwoona alopwana akina arwaaka. Nyuwo munnaasuwela tanii awo? Aahee, awo ari axuulupale awe 10! Yakobe tiithi aya ohaaruma awosa orowa wEjiitu okhala wira khiyaarina yoolya owannyeya oKanani. Yosefe onnaasuwela annawe, masi awo khanimusuwela. Nyuwo munnisuwela nthowa naya? Okhala wira Yosefe ohinnuwa vanceene ni owo owanre ikuwo sa muthinto mukina.

Yosefe onnuupuwela wira vaavo vaarya awe mmiravo owo aahiloha annawe arwaaka omuuramela. Nyuwo munnuupuwela wira moosoma sa eyo? Siiso Yosefe onoona wira Muluku tomuruminhe okhuruwela wEjiitu ni nthowa nooloka. Nyuwo munuupuwela wi Yosefe oniiranii? Nrowee niwehee.

Maphattuwelo 41:1-57; 42:1-8; 50:20.