Mwaha 39

Ekopo Ya Aroni Eniphuwa Ithutuu

NWEHEKE ithutuu ni amendowa oottokottha vakoponi-va, aahiiso vattoottoni. Ela ekopo ya Aroni. Ithutuu iya ni muhokorokho oottokottha siphuwenle ohiyu omosaa paahi vakoponi ya Aroni! Nrowee noone nthowa naya.

Vano anaIsarayeli aheetta puree mothakoni okathi vakhaani. Atthu akina a yaawo khanuupuwela wira Moise ohaana okhala muhooleli aya, aahiiso wi Aroni ohaana okhala muulupale aanamukuttho. Koree orii mmosaa a yaawo anuupuwela siiso, vamosaa ni Datani, Abirami ni ahooleli aatthu oophiyeryaka 250. Ala otheene annoorwa ni anahimya wa Moise: ‘Xeeni nyuwo wiikuhaka vasuluu va hiyo otheene?’

Moise onimuleela Koree ni atthareli awe wira: ‘Meelo voosiisu mukuxee mumpaheriwa erupani ni muhele erupani. Nuumala vo murwee mu etabernaakulu ya Yehova. Ninrowa woona yoowo onrowa othanliwa ni Yehova.’

Mmeeloni mwaya Koree ni atthareli awe 250 annoorwa otabernaakulu. Akina anceene annoorwa wira yaakhaliherye alopwana ala. Yehova oonanariwa vanceene. ‘Mukhumee mu iheema sa atthu awo ootakhala,’ onnihimya Moise. ‘Muhivare etthu eri yotheene yawaya.’ Atthu awo annimwiiwelela ni annikhuma mu iheema sa Koree, Datani ni Abirami.

Nuumala vo Moise onii: ‘Mwa ela munrowa omusuwela yoowo othanliwe ni Yehova. Etthaya enrowa ohuleya ni waamirya atthu ala ootakhala.’

Moise omalakaru olavula, etthaya ennihuleya. Eheema ya Koree ni itthu sawe ni sa Datani ni Abirami ni yaale yaari n’awo annimorela mmo, nto etthaya enniwaleya osuluu waya. Vaavo atthu vaniiwa aya wunla wa otheene yaamorenle vathii, awo annikhuwela yiiraka: ‘Nrowee ntthyawe! Etthaya pooti onimirya-tho.’

Koree ni atthareli awe 250 arii nlelo vakhiviru va etabernaakulu. Siiso Yehova onirumiha mooro, nto otheene aya annoovya. Nuumala vo Yehova onimuleela Eleyazari mwanawe Aroni wira okuxe yoopaherya-mo erupani ya alopwana ale akhwiiye wira opakee ilaamina soopeepheya sonwarihela altari. Altari ola owariheliwe onrowa orumeela ntoko yoolopola wa anaIsarayeli wira khuuvo mutthu mukina vahikhanle Aroni ni an’awe ahaana ovaraka ntoko anamukuttho a Yehova.

Masi Yehova omphavela wooniherya saana wira Aroni ni an’awe aaxilopwana paahi ti yaawo yaathanlalya awe okhala anamukuttho. Siiso onnimuleela Moise wira: ‘Mmuleele muhooleli a khuta nihimo wira oruuhe ekopo awe. Wa nihimo na Levi, Aroni oruuhe ekopo awe. Nuumala vo, mukuhe khuta ekopo mutabernaakulu, ohoolo wa ekaaxa ya wataana. Ekopo ya mulopwana yoowo kimuthanlalya aka ntoko namukuttho enrowa ophuwela ithutuu.’

Vaavo mmeeloni mwaya voosiisu Moise vaniweha awe, vootikiniha vo, ekopo ya Aroni yoophuwela ithutuu ni amendowa oottokottha! Nto nyuwo munnisuwela nthowa xeeni vano Yehova ophuwelinha awe ithutuu vakoponi ya Aroni?

Mothakoni 16:1-49; 17:17-26; 26:10.