Mwaha 65

Okawanyeya Wa Omwene

NYUWO munnisuwela nthowa naya mulopwana ola vanikhera awe nlaya nawe? Yehova aahimuhimeerya opaka ela. Mulopwana ola Ahiya orii mprofeta a Muluku. Nyuwo munnimusuwela mprofeta tanii? Orii mutthu yoole Muluku onimuleela awe vahinatthi yeele enrowa wiiraneya muhoolo.

Va, Ahiya onilavula ni Yerobowamu. Yerobowamu orii mutthu yoole Salomoni aamuhiyenrya awe oweherya miteko sawe sikina sa oteka. Vaavo Ahiya vanikumana awe mphironi ni Yerobowamu, Ahiya onipaka etthu yoohilimaleleya. Owo onirula nlaya nawe nisyaa nenno niwanrya awe ni onikhera mipantta 12. Owo onimuleela Yerobowamu wira: ‘Nyuwo mukuxee mipantta 10.’ Nyuwo munnisuwela nthowa naya Ahiya vaninvaha awe Yerobowamu mipantta 10?

Ahiya onitthokiherya wira Yehova onrowa okumiha omwene wa Salomoni. Owo onihimya wira Yehova onrowa onvaha Yerobowamu mahimo 10. Ela enitaphulela wira paahi mahimo manli anrowa ohiyeriwa Robowamu mwaana a Salomoni wira olamuleleke.

Vaavo Salomoni vaniiwa awe yeele Ahiya yaamuhimenrya awe Yerobowamu, owo onninanariwa vanceene. Owo onneererya omwiiva Yerobowamu. Masi Yerobowamu onitthyawela wEjiitu. Nuuvira okathi vakhaani Salomoni onnookhwa. Owo aahikhala mwene iyaakha 40, masi vano mwanawe Robowamu onipakiwa mwene. Oryeene wEjiitu Yerobowamu onniiwa wira Salomoni ohookhwa, siiso owo onnihokolowela wIsarayeli.

Robowamu khahiyo mwene ooloka. Owo orii-tho ootakhala wa atthu onvikana tiithi awe Salomoni. Yerobowamu ni atthu akina ootthuneya anirowa wa Mwene Robowamu ni onvekela wira okhalee ooreerexa murima wa atthu. Masi Robowamu khoniwiriyana. Mwekeekhai, owo onikhala ootepa otakhala ovikana khalai. Siiso atthu animpaka Yerobowamu okhala mwene a mahimo 10, masi mahimo manli a Beniyamini ni Yuda anikhalana Robowamu ntoko mwene aya.

Yerobowamu khoniphavela wira atthu awe arowee oYerusalemu wira yakokhorele mu empa ya Yehova. Siiso owo onaapaka axinyompe anli a eweero ni owiiriha atthu a omwene a mahimo 10 wira yaakokhoreleke. Niinanoru elapo enisareya otakhala ni ohaaxana.

Vaakhala-tho muxankiho moomweneni wa mahimo manli. Moohiphiyerya iyaakha thanuu vattuli va Robowamu okhala mwene, mwene a wEjiitu onnoorwa owana ni Yerusalemu. Owo onnikuxa mihakhu sinceene mu empa ya Yehova. Siiso waari okathi wa vakhaani paahi empa ya Muluku yaavikaninha aya okhala ntoko saatekiwa aya.

1 Mamwene 11:26-43; 12:1-33; 14:21-31.