Mpantta 4
Muluku Onninleela Soolakela Sawe
1, 2. Ninsuwela sai wira Muluku onniwaakhula ale animukoha mwekeekhai?
TTHIRI Muluku oophenta onnaaleela soolakela sawe atthu yaale animphavela mwekeekhai. Mwekeekhai, owo onniwaakhula apinaatamu anikoha nthowa naya Muluku onaahiya awe apinaatamu ahaawaka.
2 Biibiliya onihimya oriki: “Mwàphavelaka Apwiya, awo animorwa okumana ni nyuwo”. “Masi òkhala Muluku wirimu onsuweliha isiri”. “Apwiya Muluku khanìra etthu, ehipajenrye owùpululela esiri aya maprofeta, arumeyi aya”.—1 Wahala 28:9; Daniyeli 2:28; Amosi 3:7.
Ninrowa Ophwanya Woowi Waakhuliwa wa Makoho Awo?
3. Ninrowa ophwanya woowi waakhuliwa wa nikoho noowi: Nthowa xeeni Muluku oneemererya awe wira atthu ahaaweke?
3 Eliivuru emosa, yeeyo elempwe wira hiyo nttotteleke mureerelo, ennaakhula makoho ntoko ala: Nthowa xeeni Muluku oneemererya awe wira atthu ahaaweke, ni etthu xeeni enrowa awe opaka. Eliivuru eyo ti Nuulumo na Muluku, eyo piiyo, Biibiliya Oowaarya. “Solempwa sothene supuxeriwé ni Muluku, khukhalihiwa wira sixuttiheke ekekhai, savanyiheke ale anvonya, sattaruxeke ale anttheka, siwettiheke atthu ephiro ya xariya. Siso, mutthu a Muluku onolikanyihiwa murohoni mwawe, onolipiheriwa ovara miteko sothene sorera”.—2 Timótheyo 3:16, 17.
4, 5. Exeeni enimwiiriha Biibiliya okhala eliivuru yoovirikana ni iliivuru sikina?
4 Tthiri Biibiliya eliivuru ehinlikana ni ekina. Owo ookhalana soohimmwa sa ekeekhai voohimya sa atthu ni soohimmwa sikina sa okathi wa khalai ahinatthi opattuxiwa apinaatamu. Iprofesia sa Biibiliya sinnivareleya muteko vano, okhala wira itthu sihimmy’aya sinniiraneya olelo va, nave-tho sikina sinrowa wiiraneya muhoolo moohipisa.
5 Khiivo eliivuru ekina erina soohimmwa sinooniherya wira eliivuru eyo ti yekeekhai. Mwa ntakiheryo, olelo va siniphwanyaneya vakhaani soolempwa ni matata sa khalai. Masi soolempwa ni matata sinceene, iye soohimalela ni iye soomalela sa Biibiliya, sookhala olelo va: etthu yowiiraka 6.000 sa Soolempwa sa eHeeberi (iliivuru 39 sa “Wataana wa Khalai”) ni etthu yowiiraka 13.000 sa Soolempwa sa eKriki sa eKristau (iliivuru 27 sa “Wataana wa Naanano”).
6. Ninkupali sai wira masu ari mBiibiliyani a vano tthiri ti yaale Muluku uupuxenrye awe wanipacerya?
6 Muluku oowerya sotheene, yoowo ori mwaneene Biibiliya, aahitthuna wira ekeekhai eri mBiibiliyani esukiwe oratteene mu soolempwa iya ni matata. Nto olelo va, Biibiliya ahu onoolikana oratteenexa ni soolempwa ni matata soopacerya, seiye suupuxeriwe ni Muluku. Etthu ekina ennikhaliherya okupali, mwaha woowi ikoopiya sikina sa Soolempwa sa eKriki sa eKristau, silempwe nuuvira iyaakha 100 nuumala olempwa soolempwa ni matata soopacerya. Ikoopiya vakhaani sa soolempwa ni matata sa alipa oolepa a khalai a mulaponi, seiyo sikhanle vano, khasinaattamela okathi waakhala alipa apacerinhe olepa.
Yoovaha ya Muluku
7. Atthu akavi aniwerya okhalana Biibiliya mu elapo yotheene?
7 Biibiliya eri eliivuru emosa paahi yootepa okaiwa mulaponi motheene. Aapakiwa aBiibiliya oovikana ibilyau xexe. Khiivo eliivuru ekina enaattamela nummuru nno. Biibiliya otheene aahiiso ipantta sawe sikina ootaphuleliwa mmattaava oovikana 2.250. Nto, ovikana 90 pursento sa atthu elapo yotheene anoowerya okhalana Biibiliya.
8-10. Mathowa xeeni animwiiriha Biibiliya okhala oophwanelela omuthokorerya?
8 Mwekeekhai, eliivuru yeeyo enihimya wira enikhuma wa Muluku ni erina onamoona wotheene onikhuma mBiibiliyani ni onamoona wa atthu akina voohimya sa ororomeleya waya, ti yoophwanelela wira nthokorerye.a Biibiliya onnihimya yoolakela ya okumi, yootaphulela ya mikhalelo iya sa olumwenku, ni ele enrowa wiiraneya muhoolo. Khiivo eliivuru ekina eniwerya opaka eyo.
9 Aayo, Biibiliya ti eliivuru Muluku enirumeela awe wira olavule ni apinaatamu. Orumeelaka ikuru sawe soowerya aahiiso munepa awe wootteela, Muluku aahiwuupuxerya atthu 40 wira alepe masu awe. Tivonto Muluku onnilavula ni hiyo orumeelaka Nuulumo nawe, Biibiliya Oowaarya. Murummwa Paulo alempe so: “Valaleĩyaka eriyari anyu Ehapari Yorera ya Muluku, nyuwo muhìwa, muhàmini. Vano, khamwakhenle Ehapar’iyo ntoko molumo a mutthu, nto mwakhenlé muhanyiheryaka wira masú a Muluku”.—1 aTesalonika 2:13.
10 Abraham Lincoln, yoowo aari presidente a namuloko neethanu namosa a Estados Unidos, aahimwiitthana Biibiliya okhala “yoovaha yootepa oreera Muluku aavanhe awe atthu . . . Masi ahaakhanle Biibiliya khinaarowa osuwela ohiyaniha etthu yooreera ni yoonanara”. Nto, exeeni yoovaha ela yootepa oreera ennileela aya voohimya sa moota ohaawa opacenrye aya, nthowa naya Muluku vanaahiya awe atthu ahaawaka, ni ele enrowa awe opaka muhoolo?
[Inoota]
a Mwaphavela soohimmwa sikina voohimya sa ororomeleya wa Biibiliya, nwehe eliivuru A Bíblia—Palavra de Deus ou de Homem?, elaleiwe mwaakha wa 1989 ni Anamoona a Yehova.
[Elatarato eri epaaxina 10]
Biibiliya, yoowo uupuxeriwe ni Muluku, ti eliivuru Muluku enirumeela awe wira olavule ni apinaatamu