Mpantta 8
Yoolakela Ya Muluku Eneetta Erowaka Waakhwanihereya
1, 2. Moota xeeni Muluku onipaka awe malokiheryo wira omalihe ohaawa?
OLAMULELA w’atthu ni axetwani yaawo amurukunuwenle Muluku, onnihonona mukhalelo wa apinaatamu mu iseekulu sinceene. Masi, Muluku khohin’ye ocalela ohaawa wahu. Ohiya vo, mu iseekulu sotheene iya sinivira, owo onnipaka marehereryo wira owoopole apinaatamu mu otakhala ni ohaawa.
2 Okathi waarukunuweliwe awe wEedeni, Muluku aahipacerya wooniherya yoolakela awe ya opaka ekuvernu, yeeyo yaarowa wiiriha elapo ya vathi okhala eparayiisu wira akhaleke atthu. (Maphattuwelo 3:15) Nuuvira okathi, namuhupi muulupale a Muluku, eyo piiyo, Yesu, aahipaka orwa wa ekuvernu ya Muluku okhala mwaha muulupale mmuteko awe woolaleerya. Owo aahihimya wira omwene owo paahi tori yoolipelela ya apinaatamu.—Daniyeli 2:44; Matheyo 6:9, 10; 12:21.
3. Moota xeeni Yesu aitthanne awe omwene onrowa olamulelaka elapo ya vathi, ni nthowa xeeni?
3 Yesu aahiihana ekuvernu eyo ya Muluku yaarwa, okhala “omwene wa wirimu”, nthowa noowi yaarowa olamulelaka okhuma wiirimu. (Matheyo 4:17) Nave-tho owo aahiihana okhala “omwene wa Muluku”, mwaha woowi Muluku tori Mwaneene. (Luka 17:20) Mu iseekulu sinceene, Muluku aahiwuupuxerya alipa-oolepa wira alepe iprofesia saalavula sa ale yaarowa wiirela mpantta, ni ele omwene owo enrowa aya waakhwaniherya.
Mwene Musya a Valaponi
4, 5. Moota xeeni Muluku oonihenrye awe wira Yesu aari Mwene aamuthanlale awe?
4 Etthu yowiiraka iyaakha ikonto piili ottuli, Yesu ohaakhwaniherya iprofesia sinceene saamuhimya ole aarowa okhala Mwene a Omwene wa Muluku. Owo aahooniherya wira tothanliwe ni Muluku wira okhale Mwene a omwene wa wiirimu onrowa waalamulelaka apinaatamu. Ni nuumala okhwa, Muluku aahimuhihimuxa Yesu wira akhaleke wiirimu ntoko nlaikha noowerya, ni nihinikhwa. Yaahikhala anamoona anceene okathi aahihimuxiwe awe.—Miteko s’Arummwa 4:10; 9:1-9; aRoma 1:1-4; 1 aKorinto 15:3-8.
5 Nto Yesu “òkilathi mono wolopwana wa Muluku”. (aHéberi 10:12) Oryeene wiirimu, owo aahilipelela mpakha okathi Muluku aarowa awe onvaha okhulupale wira okhale Mwene a Omwene wa wiirimu wa Muluku. Ela yahaakhwaniherya eprofesia elempwale mu Esalimo 110:1, memmo Muluku onimuleela awe Yesu oriki: “Mukilathi mono aka wolopwana: kinimwakuxa awanan’inyu ekhalé ipottha sanyu”.
6. Moota xeeni Yesu oonihenrye awe wira aari oophwanelela okhala Mwene a Omwene wa Muluku?
6 Okathi aary’awe valaponi, Yesu aahooniherya wira aari oophwanelela okhala Mwene a Omwene wa Muluku. Nnaamwi aalupatthiwa, owo aahithanla ovikaniha okhala oororomeleya wa Muluku. Mwaha woopaka eyo, owo ohooniherya wira Satana aamootha vaavo aahimya awe wira khuuvo mutthu aarowa okhala oororomeleya wa Muluku okathi oneehereriwa awe. Yesu, yoowo aari mutthu oohittheka, eyo piiyo, ‘Adamu a nenli’, ohooniherya wira Muluku khovonnye mwaha woowi ohaapattuxa apinaatamu oohittheka.—1 aKorinto 15:22, 45; Matheyo 4:1-11.
7, 8. Itthu xeeni sooreera Yesu aapanke awe okathi aary’awe valaponi, ni exeeni oonihenry’awe?
7 Namalamulela xeeni otonko opaka itthu sinceene sooreera ntoko sipanke awe Yesu mu iyaakha vakhaani sa orummwa awe? Okhaliheriwaka ni munepa wootteela wa Muluku, Yesu aahaavoniha aretta, alipa-oorakala, alipa-oohoona, alipa-oohiiwa, ni oohilavula. Nave-tho aahaahihimuxa alipa-ookhwa! Owo ohooniherya vakhaani ele onrowa awe waapakela apinaatamu mmukhalelo muulupale, okathi onrwa awe mu owerya wa Omwene.—Matheyo 15:30, 31; Luka 7:11-16.
8 Yesu aahipaka itthu sinceene sooreera okathi aary’awe valaponi, mpakha naxikola awe Yohani ohimya wira: “Nlelo sihavo itthu sinjene sìralyawe Yesu. Itthu iya salempwaka emosá-emosa, kinona wira hatá olumwenku wothene khisàphiyerya-mo ilívuru satthuna olempwa”.—Yohani 21:25.a
9. Nthowa xeeni atthu a murima saana yaamutthara aya Yesu?
9 Yesu aari mutthu ooreera murima ni oomoriwa ikharari ni aanaaphenta atthu vanceene. Owo aahaakhaliherya alipa-oohaawa ni ale yaahaaxiwa, masi khaathanya ale yaari athaaciri aahiiso yaarina okhulupale. Atthu a murima saana annaakhulela nlattulo noophenta na Yesu nni: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”. (Matheyo 11:28-30) Atthu animoova Muluku yaanimutthara Yesu ni yaanilipelela olamulelo awe.—Yohani 12:19.
Anamalamulela Vamosa ni Yesu
10, 11. Tani anrowa olamulelaka elapo ya vathi vamosa ni Yesu?
10 Ntoko siiso mamwene a mulaponi arina aya ale anaakhaliherya olamulela, siiso-tho onniiraneya ni Omwene wa wiirimu wa Muluku. Atthu akina, ohiya Yesu, anrowa olamulelaka valaponi vamosa ni Yesu, okhala wira Yesu aahaahimeerya apatthani awe wira awo yaarowa olamulelaka n’uwo, ntoko mamwene.—Yohani 14:2, 3; Wisupulula 5:10; 20:6.
11 Nto, vamosa ni Yesu, nummuru naamukhaani na apinaatamu annihihimuxiwa wira yakhaleke wiirimu. Awo aniirela mpantta wa Omwene wa Muluku, yoowo onrowa oruuha mareeliho oohimala wa apinaatamu. (2 aKorinto 4:14; Wisupulula 14:1-3) Mu iseekulu sinceene, Yehova onneemexa mathipelo a olamulela onrowa oruuha mireerelo soohimala wa apinaatamu otheene.
Wiilamulela Onoomala
12, 13. Omwene wa Muluku ori woolikanela vano wira opake exeeni?
12 Mu eseekulu evinre, Muluku oopacerya weettiherya myaha sa valaponi. Ntoko Mpantta 9 wa ebroxura ela onrowa aya othokorerya, iprofesia sa Biibiliya sinooniherya wira Omwene wa Muluku onihooleliwa ni Kristu, wootikitheriwa mwaakha wa 1914, ni vano ori woolikana wira opwetexe mukhalelo wa itthu wotheene wa Satana. Omwene owo woolikana wira ‘wawerye awanani [a Kristu] ni waruma’.—Esalimo 110:2.
13 Tivonto, eprofesia eri mu Daniyeli 2:44 enihimya aya so: “Mahiku òmwene owo [omwene wa mulaponi onilamulela vano], Muluku a wirimu onokumiherya omwene [wiirimu] ohinrowa omala, nnákhala oweriwa n’umwene mukina [olamulelo wa apinaatamu khonrowa-tho weemereriwa]. Omwene owo [wa Muluku] onohonona n’upwetexa omwene wothene wa mulaponi, numalá onrowa okhalaka wa mahiku othene”.
14. Mareeliho xeeni anrowa okhumelela mwaha wa omalihiwa olamulelo wa apinaatamu?
14 Nuumala opwetexiwa olamulelo wotheene ohinihooleliwa ni Muluku, Omwene wa Muluku onrowa olamulelaka moomalela elapo ya vathi. Nto okhala wira Omwene onrowa olamulelaka okhuma wiirimu, khonikhala-khala ohononiwaka ni apinaatamu. Olamulela onrowa okhala weiwo waari aya wanipacerya, eyo piiyo, wiirimu, ni Muluku. Ni okhala wira Muluku onrowa olamulelaka elapo yotheene ya vathi, khaavo-tho onrowa ohapuxiwa ni itiini soowoka aahiiso soohimmwa soowoka s’apinaatamu ni ipoliitika. Itthu iyo khisinrowa weemereriwa okhala.—Matheyo 7:15-23; Wisupulula, ikapiitulu 17 mpakha 19.
[Inoota]
a Mwaphavela osuwela soohimmwa sotheene voohimya sa okumi wa Yesu, nwehe eliivuru O Maior Homem Que Já Viveu, elaleiwe mwaakha wa 1991 ni Anamoona a Yehova.
[Elatarato eri epaaxina 18]
Okathi aari awe valaponi, Yesu aahaavoniha aretta, aahaahihimuxa alipa-ookhwa wira ooniherye ele enrowa awe opaka mu elapo esya
[Elatarato eri epaaxina 19]
Omwene wa wiirimu wa Muluku onrowa opwetexa mikhalelo sotheene sa olamulelo sihinihooleliwa n’uwo