Mpantta 9
Moota Ninsuwela Ahu Wira Nnikhala “Okathi Wokiserya”
1, 2. Ninsuwela sai wira ninkhala mahiku ookiserya?
NINSUWELA sai wira ninkhala okathi yoole Omwene wa Muluku onrowa aya opwetexa mukhalelo ola onilamuleliwa ni apinaatamu? Ninsuwela sai wira hiyo nihaattamelexa okathi yoole Muluku onrowa awe omaliha otakhala ni ohaawa wotheene?
2 Awiixutti a Yesu Kristu yaaniphavela osuwela itthu iyo. Awo yaahimukoha Yesu wira tiivi yaarowa okhala “ethonyeryo” ya orwa wawe Momweneni mwawe, ni “y’omala olumwenku”. (Matheyo 24:3) Yesu aahaakhula ohimyaka itthu kamosa-kamosa sootakhala saarowa wiiraneya molumwenkuni, ni mikhalelo saarowa wooniherya wira apinaatamu aaphiya “okathi wokiserya”, wa mukhalelo ola wa itthu. (Daniyeli 11:40; 2 Timótheyo 3:1) Niireke wira mu eseekulu ela hiyo ninniweha ethoonyeryo eyo? Aayo, hiyo ninniweha ithoonyeryo sinceene!
Ikhotto sa Olumwenku Wotheene
3, 4. Moota xeeni ikhotto sa eseekulu ela sinaakhwaniherya aya eprofesia ya Yesu?
3 Yesu aahihimya vahinatthi wira ‘maloko makina yarowa owanaka ni maloko makhw’aya, elapo [emosa] yarowa otuphela elapo ekina’. (Matheyo 24:7) Mwaakha wa 1914, olumwenku waahipacerya ekhotto, yeeyo ilapo ni mamwene manceene yaathukumanne aya wira awane, mmukhalelo woohilikana ni ikhotto siiranen’ye khalai. Alipa-oolepa soohimmwa sa mulaponi a okathi ole, annikupali etthu eyo, ni yaahiihana ekhotto eyo okhala Ekhotto Yuulupale. Ela yaari ekhotto yoopacerya yaarina mukhalelo owo, eyo piiyo, ekhotto yoopacerya ya olumwenku wotheene. Atoropa ni atthu pure oowiiraka 20.000.000 ahookhwa, nummuru nna ti nowaattexa ovikana atthu akhwiiye mu ikhotto sikina ottuli.
4 Ekhotto Yoopacerya ya Olumwenku Wotheene yaari ethoonyeryo ya opacerya wa mahiku ookiserya. Yesu aahihimya wira ekhotto ela ni sowiiraneya sikina saarowa okhala “ohawa wopajerya”. (Matheyo 24:8) Eyo yaahoonihereya okhala ekeekhai, okhala wira Ekhotto ya Nenli ya Olumwenku Wotheene, yoowiiva atoropa ni atthu pure oowiiraka 50.000.000. Mu eseekulu 20 evinre, atthu oowiiraka 100.000.000 ahookhwa mukhottoni, etthu yowiiraka ikwaha xexe waatta waya, ovikana ikhotto siiranen’ye mu iyaakha 400 ottuli, satakaahiwa vamosa! Tthiri iwo ophukeliwa wuulupale wa olamulelo wa apinaatamu!
Ithoonyeryo Sikina
5-7. Ithoonyeryo xeeni sikina sinooniherya wira nnikhala mahiku ookiserya?
5 Yesu aahihimya-tho itthu sikina saarowa wiiraneya mmahiku ookiserya, oriki: “Sinokhumela itetere sulupale; mapuro manjene anorwela iretta n’itala”. (Luka 21:11) Eyo ennilikanela oratteene ni itthu siniiraneya okhuma mwaakha wa 1914, okhala wira ohaawa onnincerereya mwaha wa iretta ni othowa yoolya.
6 Itetere suulupale sinniiraneya okathi ti okathi, ni sinniwiiva atthu anceene. Moottharelana Ekhotto Yoopacerya ya Olumwenku Wotheene, ekwerere eniitthaniwa kamasi Espanyola, yoowiiva atthu oowiiraka 20.000.000. Atthu akina anihimya wira ahookhwa 30.000.000 aahiiso ovikana vo. SIDA oowiiva atthu imiya ikonto sene, ni onoowiiva-tho muhoolo atthu imilyau sene. Khuta mwaakha atthu imilyau sene annookhwa mwaha wa iretta sa murima, câncer ni ikwerere sikina. Atthu akina imilyau sene, annookhwa vakhaani-vakhaani mwaha wa etala. Mwekeekhai, ‘anakhavalo’ anihimmwa mu eliivuru ya Wisupulula, ni ikhotto saya, etala, ni ikwerere, anniwiiva atthu anceene okhuma mwaakha wa 1914.—Wisupulula 6:3-8.
7 Yesu aahilavula-tho sa wuncerereya wa ekrime, yeeyo eniiraneya mu ilapo sotheene. Owo aahimmye so: “Sotakhala sinomwarela mulaponi: siso-tho, ophentana w’atthu anjene onovukuwa”.—Matheyo 24:12.
8. Moota xeeni eprofesia ya 2 Timótheyo ekapiitulu 3 enaakhwanihereya aya mahiku ahu ala?
8 Moowuncererya, eprofesia ya Biibiliya yaahihimya vahinatthi sa ohononeya wa mweettelo wooloka oniiraneya mahiku ala mulaponi motheene: “Musuweleke wira okathi wokiserya, anophiya mahiku òxanka. Atthu anrowa wisupuwelaka mmansaya pahi, anrowa okhala anamilili, anrowa wittottopaka ni wisona. Awo anonveha Muluku, anokhala òhiwìwelela anamuyari aya, òhixukhuru, òhittittimiha itthu sowarya, òhiphenta, òhimoriwa ikharari, òwòtherya akhw’aya, òhisumaliha, òwali, òvirikanya sorera sothene, anamalupattha, òwakuva onanariwa, òsareya wisona, òphavela sopuha, òmuhiya Muluku; antthuna woneyaka ntoko atthu òwamini, nto anokhotta ikuru so wamini weiwo . . . Masi atthu òtakhala murima ni òwòtha anovira etepaka”. (2 Timótheyo 3:1-13) Hiyo ninniweha ni maitho ahu wira itthu iyo sotheene sinniiraneya tthiri.
Nthowa Nikina
9. Etthu xeeni yiiranen’ye wiirimu okathi wa opacerya wa mahiku ookiserya valaponi?
9 Nookhala nthowa nikina nniiriha wuncerereya ohaawa mu eseekulu ela. Okathi waapacenrye aya mahiku ookiserya mwaakha wa 1914, yaahiiraneya etthu emosa, yeeyo yaarowa waahela apinaatamu mmukhalelo mmosa wootepa oxankiha. Ntoko eprofesia ya eliivuru yookiserya ya Biibiliya enihimya aya, okathi ole yaahiiraneya etthu emosa: “Numalá, yahikhumelela ekhotto wirimu. Nlaikha Mikhayeli [Kristu momweneni wa wiirimu] ni makhw’aya nahiwana n’inow’eyo [Satana]: vano enowa yakhaliheriwa ni malaikh’aya [axetwani]. Enowa yahiweriwa: tivó khiyàwenrye-tho ophwanya opuro wirimu, khuriheliwa ota. Enow’eyo yulupalexa t’inowa yele ya khalai, enìhaniwa Nwanani walá Satana, yeyo eniwototha atthu othene. Eyo yahiriheliwa elapo ya vathí: malaikh’aya yahiriheliwa-tho mulaponi vamosá ni yeyo”.—Wisupulula 12:7-9.
10, 11. Apinaatamu yaahapuweliwe sai okathi Satana ni axetwani awe yaariheliwe aya elapo ya vathi?
10 Tiivi saari sookhumelela wa apinaatamu? Eprofesia ennivikaniha ehimyaka: “Nto nyuwo, elapo n’iphareya, motakhaliwa, mana Satana òkhuruwela wa nyuwo ananariwene vanjene, okhala wira òsuwela wira orina okathi vakhani pahi”. Aayo, Satana oosuwela wira mukhalelo awe ola onnaattamela omala, tivonto oniimananiha awe wira apinaatamu amurukunuwele Muluku, vahinatthi owo ni olumwenku awe ola omalihiwa. (Wisupulula 12:12; 20:1-3) Tthiri malaikha awo tootakhala vanceene, mwaha wa orumeela moohiloka yoovaha ya othanla mootaphuwa! Nave-tho mikhalelo sinnitepa onanara valaponi va, okhuma mwaakha wa 1914, mwaha wa malaikha awo ootakhala!
11 Ti mulattu aya nihintikinihiwa ahu ni masu a Yesu aalavunle awe vahinatthi, voohimya sa okathi ahu ola oriki: “Sinokhumelela itetere sulupale; mapuro manjene anorwela iretta n’itala. Sinokhumelela-tho osulú itthu sowopiha n’ithonyeryo sulupale”.—Luka 21:11.
Olamulelo wa Apinaatamu ni Axetwani Ohanle Vakhaani Omala
12. Eprofesia xeeni ehanle nlelo wira yaakhwaniheriwe ohinatthi omala mukhalelo ola wa itthu?
12 Iprofesia sikavi sa Biibiliya sihanle wira saakhwaniheriwe ohinatthi nlelo Muluku opwetexa mukhalelo ola wa itthu? Sihanle vakhaanixa! Emosa sa iprofesia iyo sookiserya, ti ele elempwale mu 1 aTesalonika 5:3, yeeyo eni: “Vano, atthu yahimya wira: ‘Nokhalana murettele n’ikumi!’, vavo t’unìraya warwele opweteya nananoru”. Ela enooniherya wira omala wa mukhalelo ola onrowa opacerya nlelo ‘ahimyaka’ wira nookhalana murettele. Ohiwehiwaka ni olumwenku, opwetexa onimoorwa ewoora vahinlipeleliwa aya, okathi yoowo apinaatamu anrowa aya olipelelaka murettele ni ovareleleya anihimya aya.
13, 14. Okathi xeeni wa mixankiho Yesu aahimmy’awe vahinatthi, ni moota xeeni onrowa aya omala?
13 Okathi wa olumwenku ola onilamuleliwa ni Satana onnimala. Moohipisa, olumwenku ola onoomala mu okathi wa mixankiho suulupale seiyo Yesu ohimmy’awe oriki: “Tthiri, okathi yowo, anokhala maxakha malupale, ehinakhumelele okhuma wopajeryani w’olumwenku mpakha vano, nnákhala ahinrowa-tho okhumelela”.—Matheyo 24:21.
14 Wanikisa wa “maxakha malupale” onrowa okhala ekhotto ya Muluku eniitthaniwa Harmagedoni. Ola ti okathi yoole profeta Daniyeli aahimmy’awe wira Muluku “onohonona n’upwetexa omwene wothene wa mulaponi”. Eyo enrowa otaphulela omala wa olamulelo wotheene wa apinaatamu ahinihooleliwa ni Muluku. Omwene awe yoowo ori wiirimu, onrowa weettihaka myaha sotheene sa apinaatamu. Daniyeli aahihimya wira olamulelo khonrowa ovahiwa-tho atthu akina.—Daniyeli 2:44; Wisupulula 16:14-16.
15. Exeeni enrowa wiiraneya ni ohapuwela wa Satana ni axetwani awe?
15 Nave-tho, okathi owo, onoomala ohapuwela wotheene wa Satana ni axetwani awe. Malaikha awo oohiiwelela anrowa omala-malihiwa wira “ahiwotothé-tho atthu”. (Wisupulula 12:9; 20:1-3) Awo aalamuliwa okhwa ni anlipelela opwetexiwa. Tthiri onrowa okhala woohakalaliha apinaatamu otaphuwa mu ohapuwela waya woohiloka!
Tani Anrowa Woopowa? Tani Ahinrowa Woopowa?
16-18. Tani anrowa woopowa okathi mukhalelo ola wa itthu onrowa aya omalihiwa, ni tani ahinrowa woopowa?
16 Tani anrowa woopowa okathi Muluku onrowa awe ophukela olumwenku ola? Ni tani ahinrowa woopowa? Biibiliya onooniherya wira ale aniphavela olamulelo wa Muluku, anrowa okhapeleliwa ni animoopowa. Ale ahiniphavela olamulelo wa Muluku khanrowa okhapeleliwa, masi anrowa opwetexiwa vamosa ni olumwenku ola wa Satana.
17 Eliivuru ya Miruku 2:21, 22 enihimya so: “Mutthu òloka [ale aniiwelela olamulelo wa Muluku] onophwanya elapo y’okhala: mutthu àxariya onokhala mulaponi-memmo. Vano atthu òtakhala murima [ale ahiniiwelela olamulelo wa Muluku] anopwetexiwa: alipa-òttheka anopheliwa mulaponi-mu”.
18 Nave-tho, Esalimo 37:10, 11 enihimya eriki: “Atakhali anorimela nananoru . . . Vano atthu òmàla anoreriwa vathí-va: anokhala-mu ni murettele womalela”. Eversiikulu 29 enincererya eriki: “Anaxariya animwakhela elapo yohiyeriw’aya: anrowa okhalaka-mo mahiku othene”.
19. Muruku xeeni nintthuneya ahu ohela vamurimani?
19 Hiyo nohaana ohela vamurimani muruku wa Esalimo 37:34, yoowo onihimya wira: “Mwaroromeleke Apwiya, mwiweleleke soruma saya: awo animovahani ikuru so wettiha elapo: munowona alipa-òtakhala epweteyaka”. Iversiikulu 37 ni 38 sinihimya so: “Nkanweheni naxariya, nkamoneni mutthu òloka: ale aniphavela wiwanana anokhalana osùlu munjene. Masi alipa-òttheka othene anopwetexiwa vamosá: etthoko y’atakhali enomalihiwa”.
20. Nthowa xeeni vaniwerya ahu ohimya wira okathi onikhala ahu ti wootepa ohakalaliha?
20 Nto ti voolipiha, aayo, ti wookuxa murima osuwela wira Muluku onninikhapelela tthiri, ni wira moohipisa, owo onrowa omaliha otakhala ni ohaawa! Tthiri ti voohakalaliha vanceene osuwela wira ohanle okathi vakhaanixa wira saakhwanele iprofesia iyo suulupale!
[Elatarato eri epaaxina 20]
Biibiliya aahihimya vahinatthi itthu saarowa wiiraneya, seiyo saarowa okhala “ethonyeryo” ya mahiku ookiserya
[Elatarato eri epaaxina 22]
Moohipisa, mu Harmagedoni, ale ahiniiwelela olamulelo wa Muluku anrowa opwetexiwa. Ale aniiwelela anrowa woopowa wira yakhaleke mu elapo esya ya xariya