Yoosoma 3
Yesu Kristu Tani?
Xeeni Yesu vanihimmw’awe okhala Mwaana ‘opajerya’ a Muluku? (1)
Nthowa xeeni vanihimmw’awe okhala “Nsu”? (1)
Exeeni yaamwiirinhe Yesu orwa valaponi ntoko pinaatamu? (2-4)
Exeeni yaamwiirinhe opaka miiriirya? (5)
Yesu onrowa opaka exeeni muhoolo moohipisa? (6)
1. Ohinatthi orwa valaponi, Yesu aakhala wiirimu ntoko mutthu oomunepani. Owo yoopattuxiwa yoopacerya ya Muluku ni tivo vanihimmwa awe okhala Mwaana ‘opajerya’ a Muluku. (aKolosi 1:15; Wisupulula 3:14) Yesu ti Mwaana mmoseene yoowo Muluku ompattunx’awe mmensawe. Yehova aahimuruma Yesu ohinatthi okhala pinaatamu wira ‘ovare miteko’ sa opattuxa itthu sotheene siri wiirimu ni vathi. (Miruku 8:22-31; aKolosi 1:16, 17) Ohiya vo, Muluku aahinvarihela muteko Yesu ntoko mulipa ookuxa masu. Ti maana aya Yesu vanihimmwa awe okhala “Nsu”.—Yohani 1:1-3; Wisupulula 19:13.
2. Muluku aahimurumiha Mwanawe orwa valaponi. Aahipaka eyo othaamihaka okumi wa mwanawe ni oroiha mmirimani mwa Maria. Mmukhalelo owo, Yesu khaarina tiithi oomutthu. Ti maana aya Yesu aayariwa awe ohirina yoottheka wala etthu yoohiloka. Muluku aahimurumiha Yesu orwa valaponi mwaha wa mathowa mararu: (1) Wira oniixuttihe ekeekhai voohimya sa Muluku (Yohani 18:37), (2) wira ooniherye ororomeleya woomalela, onivahaka ntakiheryo wira nitthareke (1 Pedru 2:21), ni (3) wira ovahe okumi awe ntoko mukuttho, moophavela onoopola yoottheka ni okhwa. Nthowa xeeni vaary’aya vootthuneya?—Matheyo 20:28.
3. Mwaha woohimwiiwelela Muluku, Adamu, pinaatamu oopacerya, aahipaka ele Biibiliya enihimya awe okhala “etampi”. Tivonto, Muluku aahimuhimeerya Adamu wira aarowa okhwa. (Maphattuwelo 3:17-19) Adamu khaawerya-tho waakhwaniherya saana sooruma sa Muluku, nto okhuma okathi yoole owo aari oottheka ene. Vakhaani-vakhaani owo aahuuluvala ni wookiseryani waya aahikhwa. Adamu yahaaraviha yoottheka anaaya otheene. Ti maana aya hiyo-tho vanuuluvala ahu, owereiwa ni okhwa. Masi apinaatamu yaarowa woopoliwa sai?—aRoma 3:23; 5:12.
4. Yesu aari mutthu oohittheka ntoko saari awe Adamu ohinatthi ottheka. Masi, moovirikana ni Adamu, Yesu aahimwiiwelela Muluku moomalela, hata eehereriwe mmukhalelo muulupalexa. Ti maana aya aawenrya awe ovaha mukuttho okumi awe ntoko mutthu oohittheka wira oliverye etampi ya Adamu. Eyo tiiyo Biibiliya enihimya awe okhala ‘yowopola’. Nto anamwane a Adamu yanwerya woopoliwa mwa olamuliwa waya okhwa. Otheene yaale animwaamini Yesu anoowerya oleveleliwa itampi saya ni waakhela ekumi ehinimala.—1 Timótheyo 2:5, 6; Yohani 3:16; aRoma 5:18, 19.
5. Okathi aarya awe valaponi, Yesu aahaavoniha aretta, ahaavaha yoolya ale yaavoliwe etala, ni ahimaaliha ipheyo suulupale. Nave-tho ahaahihimuxa alipa-ookhwa. Exeeni yaamwiirinhe opaka miiriirya? (1) Aawoonela othunku atthu yahaawa, nto khiyaphavela waakhaliherya. (2) Miiriirya sawe sahooniherya wira owo aari Mwaana a Muluku. (3) Iyo-tho sahooniherya ele enrowa awe opaka wa apinaatamu oowiiwelela vaavo vanrowa awe olamulelaka ntoko Mwene a elapo yotheene.—Matheyo 14:14; Marko 2:10-12; Yohani 5:28, 29.
6. Yesu aahikhwa ni aahihihimuxiwa ni Muluku ntoko yoopattuxiwa yomunepani, ni otthikela wiirimu. (1 Pedru 3:18) Okhuma okathi yoole, Muluku oomukhaliha Mwene. Moohipisa, Yesu onoomaliha mulaponi otakhala wotheene ni ohaawa okhanle.—Esalimo 37:9-11; Miruku 2:21, 22.
[Efootu ya epaaxina 7]
Muteko wa Yesu waahihela muhina wiixuttiha, opaka miiriirya, ni ovaha okumi awe mwaha wa hiyo