Yoosoma 8

Okumi wa Vatthokoni Onimusivela Muluku

Mulopwana oothela orina muritti xeeni vatthokoni? (1)

Mulopwana omuthokoreryeke sai mwaar’awe? (2)

Miritti xeeni sirina tiithi? (3)

Muthiyana ootheliwa orina muritti xeeni vatthokoni? (4)

Muluku omphavela exeeni wa anamuyari ni wa anamwane? (5)

Biibiliya onihimya exeeni sa ovalaana ni omwalana? (6, 7)

1. Biibiliya onihimya wira mulopwana tori muru aahiiso muhooleli a etthoko. (1 aKorinto 11:3) Mulopwana ohaana omuthela muthiyana mmosa paahi. Awo ahaana othelana moottharihela nlamulo.​—1 Timótheyo 3:2; Tito 3:1.

2. Mulopwana ohaana omphentaka mwaar’awe ntoko siniphenta awe erutthu awe. Owo ohaana omuthokoreryaka mwaar’awe ntoko siisaale Yesu saathokorerya awe atthareli awe. (aÉfeso 5:25, 28, 29) Mulopwana ohimmaneke mwaar’awe nnakhala omuhaaxa. Masi, ohaana onvaha nlemeliho ni omuttittimiha mwaar’awe.​—aKolosi 3:19; 1 Pedru 3:7.

3. Tiithi ohaana wiimananiha vanceene ovara muteko wira othokorerye sootthuneya sa etthoko awe. Owo ohaana oruuhaka yoolya ni ikuwo wira aavaheke amwaar’awe ni anaawe, ni ohaana okhalana empa. Nave-tho, tiithi ohaana othokoreryaka sootthuneya somunepani sa etthoko awe. (1 Timótheyo 5:8) Owo tonihoolela okhaliherya etthoko awe wiixutta voohimya sa Muluku ni soolakela Sawe.​—Otumererya 6:4-9; aÉfeso 6:4.

4. Muthiyana otheliwe ohaana okhala namakhaliherya ooloka a iyawe. (Maphattuwelo 2:18) Owo ohaana omukhaliheryaka iyawe owiixuttiha ni waalakiherya anamwane. (Miruku 1:8) Yehova omphavela wira muthiyana ootheliwa othokoreryeke etthoko awe moophenta. (Miruku 31:10, 15, 26, 27; Tito 2:4, 5) Owo ohaana omuttittimihaka saana iyawe.​—aÉfeso 5:22, 23, 33.

5. Muluku omphavela wira anamwane awiiweleleke anamuyari aya. (aÉfeso 6:1-3) Muluku oniphavela wira alipa-ooyara awiixuttiheke ni waalaka anaaya. Anamuyari ahaana oviriha okathi munceene aryeene ni anaaya ni omusoma Biibiliya hoothe, athokoreryaka sootthuneya saya somunepani ni waaphenta. (Otumererya 11:18, 19; Miruku 22:6, 15) Alipa-ooyara ahaalakeke anaaya mmukhalelo wootepexa ni wootakhala.​—aKolosi 3:21.

6. Vaavo anamathelana vahinkhalihana aya saana, awo ahaana weererya ovarihela muteko malakiheryo a Biibiliya. Biibiliya onintumererya wooniherya ophenta vamosa ni olevelela. (aKolosi 3:12-14) Nuulumo na Muluku khinintumererya ovalaana okhala ephiro ya omala-maliha mixankiho saamukhaani. Masi muthiyana pooti othanla omuhiya iyawe akhala wira (1) iyawe onnithipelela okhootta othokorerya sootthuneya sa etthoko, (2) akhala wira owali wa iyawe onnooniherya wira pooti omphwanyiha owereya aahiiso omwiiva muthiyana owo, aahiiso (3) akhala wira ovaanyiha wa iyawe onnimwiiriha muthiyana owo ohiwerya omukokhorela Yehova.​—1 aKorinto 7:12, 13.

7. Ale athelanne ahaana okhala oororomeleya wa ole othelanne aya. Oraruwa etampi yuulupale wa Muluku ni wa ole othelanne awe. (aHéberi 13:4) Etthu emosa paahi eneemererya Biibiliya okhala mathipelo a omwalana ni othelana ni mutthu mukina ti orupana mutthu ohithelanne awe. (Matheyo 19:6-9; aRoma 7:2,  3) Yehova onninyokha owoona atthu amwalanaka ni othelana ni mutthu mukina voohikhala mathowa aneemereriwa ni Biibiliya.​—Malakhiya 2:14-16.

[Efootu ya epaaxina 17]

Muluku oniphavela wira alipa-ooyara awiixuttiheke ni waalaka anaaya

[Efootu ya epaaxina 17]

Tiithi oophenta onnithokorerya sootthuneya sa werutthuni ni somunepani sa etthoko awe