Yoosoma 11

Sookupali ni Soolema Sihimmusivela Muluku

Tisivi siri sookupali ni soolema soohiloka? (1)

Niireke wira maKristau ahaana okupaliki wira Muluku ti Oraru? (2)

Xeeni maKristau eekeekhai ahimmwiira aya Natali, Paasikha ni otthapela nihiku nooyariwa? (3, 4)

Niireke wira alipa-ookhwa anniwerya waahaaxa atthu akumi? (5)

Niire wira Yesu aakhwiiye va mwiikimanyoni? (6)

Xeeni varya aya vootthuneyexa omusiveliha Muluku? (7)

1. Khahiyo wira sookupali ni soolema sotheene ti soohiloka. Masi Muluku khoneemererya sookupali ni soolema, akhala wira sinikhuma mu etiini yoowoka aahiiso akhala wira sinnivaanyiha ele Biibiliya eniixuttiha awe.​—Matheyo 15:6.

2. Oraru: Niireke wira Yehova ti Oraru, eyo piiyo, atthu araru mwa Muluku mmosa? Nnaari! Yehova ti Muluku mmosa paahi eekeekhai. (Yohani 17:3; Marko 12:29) Yesu, Mwaana oopacerya a Muluku, ni onihooleliwa ni Muluku. (1 aKorinto 11:3) Tiithi ti muulupale onvikana Mwaana. (Yohani 14:28) Munepa wootteela khahiyo mutthu; ti ikuru sa Muluku.​—Maphattuwelo 1:2; Miteko s’Arummwa 2:18, NM.

3. Natali ni Paasikha: Yesu khaayariwe nihiku na 25 na mweeri wa Dezembro. Owo aayariwe okathi wowiiraka 1 a Outubro mahiku yaale amakampusi yaviriha aya ohiyu mmathalani erupelelaka inama saya. (Luka 2:8-12) Yesu khonaarume maKristau wira atthapeleke nihiku naayariwa awe. Mmapuro mwa eyo, owo ahaahimeerya awiixutti awe wira yuupuweleleke okhwa wawe. (Luka 22:19, 20) Natali ni soolema sawe sikhumme mu itiini soowoka sa okathi wa khalai. Etthu emosaru eyo enniiraneya ni Paasikha, itthu ntoko orumeeliwa wa mooce ni namarokolo. MaKristau oopacerya khiyaamwiira Natali, aahiiso Paasikha, tivonto maKristau eekeekhai a mahiku ala vahinimwiira aya.

4. Otthapela nihiku nooyariwa: Biibiliya onihimya ifesta piili paahi sa otthapela nihiku nooyariwa, seiyo saapakiwe ni atthu yahaamukokhorela Yehova. (Maphattuwelo 40:20-22, NM; Marko 6:21, 22, 24-27) MaKristau oopacerya khiyaapaka ifesta sa otthapela nihiku nooyariwa. Yoolema ya otthapela nihiku nooyariwa ekumiheriwe ni itiini soowoka sa okathi wa khalai. MaKristau eekeekhai annivahanana itthu ni opaka ifesta okathi ori wotheene anoon’aya okhala wooreerela.

5. Owoova Alipa-ookhwa: Alipa-ookhwa khaniwerya opaka etthu ni khansuwela-tho etthu. Khivanweryaneya waakhaliherya, ni awo khanwerya oniruuhela maxakha. (Esalimo 146:4; Musuweli 9:5, 10) Khiivo etthu enivikaniha okhalana okumi nuumala mutthu okhwa. Masi ikwaha sikina malaikha ootakhala, eyo piiyo, axetwani, anoothererya okhala minepa sa alipa-ookhwa. Nto yoolema yotheene enivarihana ni owoova aahiiso waalapela alipa-ookhwa ti yoohiloka.​—Otumererya 18:10-12.

6. Mwiikimanyo: Yesu khaakhwiiye va mwiikimanyoni. Owo okhwiiye vamwirini, aahiiso nripu. Nuulumo na ekriki nitaphuleliwe okhala “mwiikimanyo”, mu aBiibiliya anceene ninhimya mwiri mmosa paahi ori ntoko nripu. Ethoonyeryo ya mwiikimanyo enikhuma mu itiini soowoka sa okathi wa khalai. MaKristau oopacerya khiyarumeela hata okokhorela mwiikimanyo. Nto nyuwo munoona wira ti vookhalela orumeela mwiikimanyo wira mmukokhorele Muluku?​—Otumererya 7:26; 1 aKorinto 10:14.

7. Pooti okhala vooxankiha ophavela ohiya sookupali ni soolema iya. Amusi ni apatthani pooti weererya wookupalihani wira muhihiye sookupali iyo. Masi, omusiveliha Muluku teri etthu yootepexa otthuneya ovikana omusiveliha pinaatamu.​—Miruku 29:25; Matheyo 10:36, 37.

[Efootu ya epaaxina 22]

Muluku khahiyo Oraru

[Efootu ya epaaxina 23]

Natali ni Paasikha onikhuma mu itiini soowoka sa okathi wa khalai

[Efootu ya epaaxina 23]

Khivakhanle nthowa na owoova aahiiso waalapela alipa-ookhwa