Yoosoma 15

Mwaakhaliherye Akina Opaka Yootthuna ya Muluku

Xeeni vari aya vootthuneya waahimeerya akina ele enisoma anyu? (1)

Tani anitthuneya anyu waahimeeryaka ihapari sooreera? (2)

Mweettelo anyu wooloka onrowa waakhaliherya sai akina? (2)

Munrowa opacerya silini olaleeryaka ni muloko? (3)

1. Vano, nyuwo muhiixutta itthu sinceene sooloka sinikhuma mBiibiliyani. Osuwela orina anyu wohaana owiirihani okhalana omutthu wa eKristau. (aÉfeso 4:22-24) Osuwela iwo ti wootthuneya wira mphwanye ekumi yoohimala. (Yohani 17:3) Masi atthu akina ahaana-tho wiiwa ihapari iyo sooreera wira yoopowe. MaKristau otheene eekeekhai ahaana waaleelaka atthu akina ihapari sooreera. Eyo yooruma ya Muluku.​—aRoma 10:10; 1 aKorinto 9:16; 1 Timótheyo 4:16.

2. Nyuwo pooti olavula ni ale anikhala vakhivuru ni nyuwo wira mwaleele itthu sooreera siniixutta anyu. Mwahimeeryeke ihapari iyo amusi anyu, apatthan’inyu, apatthani ooxikola, ni ale anivarana anyu muteko. Muhaana olavulaka moopatthaneya ni moopixa murima. (2 Timótheyo 2:24, 25) Muupuweleke wira ikwaha sinceene atthu aniweha mweettelo a mutthu ole, ovikana ele enihimya awe. Tivonto, mweettelo anyu wooloka pooti owiiriha akina owiriyana ihapari sinilaleya anyu.​—Matheyo 5:16; 1 Pedru 3:1, 2, 16.

3. Nuuvira okathi, nyuwo pooti okhala oophwanelela opacerya olaleerya vamosa ni muloko wa Anamoona a Yehova mapuro anikhala’nyu. Nna nivalo nootepexa otthuneya nnooniherya orowa wanyu vahoolo. (Matheyo 24:14) Moota vanrowa aya okhala voohakalaliha akhala wira munoowerya omukhaliherya mutthu mukina okhala murumeyi a Yehova ni ophwanya okumi woohimala!​—1 aTesalonika 2:19, 20.