MURUU WA NAMULOKO NA MMOSA
“Mpajeryeke Ophavela Omwene wa Muluku”
1. (a) Nthowa xeeni Yesu aatumerenrye awe ale yanwiriyana wira apaceryeke ophavela Omwene? (b) Etthu xeeni naatthuneya ahu wiikoha?
IYAAKHA 1.900 sivinre, olavulaka mwaha oGalileya, Yesu aahaatumererya ale yanwiriyana wira: “Mpajeryeke ophavela omwene wa Muluku ni wiwelela otthuna wawe”. Masi nthowa xeeni Yesu aatumerenrya awe otthuneya wa ophavela omwene moohipisa? Niireke wira khisaahala iyaakha sinceene wira ophiyee okathi wa Kristu waakhela owerya wa Omwene? Aayo, masi Yehova aarowa orumeela Omwene wa oMesiya wira ovuwihe olamulelo awe muulupale ni waakhwaniherya yoolakela awe yuulupale voohimya sa elapo. Khuta mutthu yoole tthiri oniiwexexa otthuneya wa itthu iyo onrowa opaceryaka ophavela Omwene mookumini mwawe. Akhala wira ophavela Omwene yaari etthu yootthuneya eseekulu yoopacerya, ti vootepa otthuneya olelo va, mwaha woowi Kristu oottikhiwa ntoko Mwene! Nto nikoho ti nna: Kiireke wira moota oneettiha aka okumi aka onnooniherya wira kinnipacerya ophavela Omwene wa Muluku?—Matheyo 6:33.
2. Itthu xeeni atthu aniphavela aya mooluttuweliwa?
2 Tthiri, atthu imilyau sene elapo yotheene olelo va, annipacerya ophavelasa Omwene. Awo annooniherya okhaliherya waya olamulela wa Omwene apakaka yootthuna ya Yehova ni murima aya wotheene, ni ahiivahererya wa owo. Moovirikana ni vo, apinaatamu anceene aniphavela itthu sa mulaponi. Atthu anniluttuweliwa ophavela musurukhu ni mihakhu ni soohakalaliha seiyo musurukhu siniwerya aya okumiherya. Aahiiso awo annirumeela ikuruu saya sotheene aphavelaka wuncererya osuwela waya wira yaakheleke musurukhu munceene. Mweettelo aya wa okumi onooniherya ophavela itthu sinaareerela paahi, ophavelasa itthu sa werutthuni, ni soohakalaliha. Awo annimukuha Muluku nipuro na nenli, vakhala wira annimukupali tthiri.—Matheyo 6:31, 32.
3. (a) Muthinto xeeni wa muhakhu Yesu aalipihenrya awe atthareli awe wira aphaveleke, ni nthowa xeeni? (b) Nthowa xeeni vahintthuneya aya oxankela vanceene itthu sa werutthuni?
3 Masi, Yesu aahivaha miruku iya wa awiixutti awe: “Muhìthukumanyeryé mihakhu vathí-va”, mwaha woowi itthu sotheene iyo sinnimala. Ohiya vo, owo aahimmye wira, “mwìthukumanyeryeke mihakhu wirimu” orweela mwa omurumeela Yehova. Yesu aahaatumererya atthareli awe wira avikaniheke okhalana maitho “òrera” orweela mwa ovaha ephoole ni orumeela ikuruu saya wira apakeke yootthuna ya Muluku. Yesu aahaahimeerya-tho wira: “Khamunwerya omurumela Muluku vamosá ni muhakhu”. Masi nilavule exeeni voohimya sa sootthuneya sa werutthuni, eyo piiyo, yoolya, yoowara, ni opuro wookhala? Yesu aahivaha miruku iya: “Murima ohovaveni”. Owo aahaathoonyerya axipalame ophavelaka owooniherya wira Muluku onnaavaha yoolya. Yesu aahaalipiherya atthareli awe wira awehe ifilori ni wiixutta etthu owooniheryaka wira Muluku onniwariha. Niireke wira Yehova khonrowa nto waakhapelela arumeyi awe arina ankhili ovikana ifilori iya? Yesu aahimmye wira: “Mpajeryeke ophavela omwene wa Muluku ni wiwelela otthuna wawe. Vano sikina sothene [sootthuneya] Muluku onimophwanyihani ni wunjererya”. (Matheyo 6:19-34) Niireke wira soovara sanyu sinnooniherya wira nyuwo munnikupali eyo?
Muhihiyee Ekeekhai ya Omwene Evuvuriwaka
4. Akhala wira mutthu onnixankela vanceene itthu sa werutthuni, etthu xeeni eniweryaneya okhumelela?
4 Khahiyo etthu yootthekeya ophavela itthu sootthuneya sa mutthu mwaneene ni sa etthoko awe. Masi, akhala wira mutthu onnixankela itthu sa werutthuni mootepana, sookhumelela saya pooti okhala sootakhala. Pooti mutthu ohimyaka wira onnikupali Omwene, masi akhala wira onikuha opuro woopacerya vamurimani vawe itthu sikina, ekeekhai ya Omwene enrowa ovuvuriwa. (Matheyo 13:18-22) Mwa ntakiheryo, okathi omosaa mmiravo namalamulela aari thaaciri aahimukoha Yesu wira: “Kìreke exeni wira kiphwanyé ekumi yohimala?” Mmiravo owo aahikhalana mweettelo wooloka wa okumi ni aanaathokorerya saana atthu akina, masi aahivareya vanceene ni mihakhu sawe. Tivonto khaawerya ohiya mihakhu sawe wira omutthare Kristu. Siiso, owo aahiyeleela eparakha yeeyo yaarowa omwiiriha okhala vamosaa ni Kristu Momweneni wa wirimu. Okathi ole Yesu aahimmye wira: “Vekekhai, orikarika thajiri okela momweneni wa Muluku”.—Marko 10:17-23.
5. (a) Itthu xeeni Paulo saamulipihenrye awe Timootheyo wira ohakalalaneke, ni nthowa xeeni? (b) Satana onirumeela sai “ophenta musurukhu” ntoko muraakho oniiva?
5 Sivinre ene iyaakha sinceene, murummwa Paulo aahimulepela Timootheyo, yoowo aakhala wEefeso, muttetthe wooraala wa nakoso. Paulo aahimuupuxerya Timootheyo wira: “Tthiri, nrwaka molumwenkuni-mu khinarina etthu; siso-tho, nakhumaka-mu, khaninwerya okuxa etthu. Tivó, nakhalanaka yolya ni sowara, nihakalaleke ni seiyo”. Ti vookhalela ovara muteko niphavelaka “yolya ni sowara” wa hiyo ni wa ale a etthoko ahu. Masi Paulo aahilopola wira: “Vano ale antthuna wunjererya muhakhu aya annimorela vantaphani na Satana, yehereriwaka ni sowupuwela sinjene s’ololo ni sotakhala: itthu sene seiyo sinnasamiha atthu mopweteyani ni mokhwani”. Satana mulavilavi. Wanipacerya owo pooti weererya onwoka mutthu orumeelaka itthu saamukhaani. Moottharelana owo pooti okumiherya soweeha suulupale, waaniheryasa eparakha ya owelihiwa vamutekoni, aahiiso ophwanya muteko wooloka yoowo onaakheliwa musurukhu munceene masi onikuxa okathi yoowo khalai waarumeeliwa itthu somunepani. Nahiikasoope vale, “ophenta musurukhu” onoowerya ovuvurya miyaha suulupale sa Omwene. Paulo aatthokihenrye so: “Atthu akina yaphavelenxe musurukhu, ahàpuwela ottaiwene ni wamini, khwihaxa mmansaya ni masoso malupale”.—1 Timótheyo 6:7-10.
6. (a) Wira nisyakee ohomphwa ni ophavela muhakhu, nintthuneya opaka exeeni? (b) Moohicikha etthu sa mukhalelo wa muhakhu moolumwenkuni olelo va, nroromeleke exeeni?
6 Mwaha wa omphenta wawe mwekeekhai munnawe eeKristau, Paulo aahimutumererya Timootheyo wira: “Mutthyaweke itthu iya” ni “Nwaneleke wamini ekhotto yorera”. (1 Timótheyo 6:11, 12) Ti vootthuneya wiimananiha wekeekhai wira nisyakee okuxiwa ni mweettelo woophavela muhakhu wa elapo enrukurenrye. Masi akhala wira ninniimananiha okhala moovarihana ni nroromelo nahu, Yehova khonkhala-khala oninyanyalaka. Nnaamwi itthu siwelaka esisapo ni othowa muteko wuulaanale ene, Yehova onrowa ottittimiherya wira niphwanye ele tthiri enitthuneya wa hiyo. Paulo aalempe so: “Murim’anyu ohettihiweké ni milili: muhakalaleke n’itthu sirinanyu, okhala wira Muluku mwanene òhimya wira: ‘Miyo nkinonyanyalani-tho: kinimojalani mahiku othene’. Tivó nihimyeke ni nroromelo wira: ‘Apwiya t’anikikhaliherya, tivó vahinòvaka etthu. Atthu anwerya okìriha exeni?’”. (aHéberi 13:5, 6) Nto Mwene Davidi aalempe wira: “Okhuma omiravo aka mpakha vano kùluvanlyaka, nkinamone naxariya onyanyaliwe ni Muluku, nkinawone amusi awe elolaka yolya”.—Esalimo 37:25.
Awiixutti Oopacerya Annivaha Ntakiheryo
7. Malakiheryo xeeni voohimya sa olaleerya Yesu aavanhe awe awiixutti awe, ni nthowa xeeni yaary’aya oophwanelela?
7 Nuumala Yesu owiixuttiha arummwa awe moomalela, owo aahaaruma wIsarayeli wira yalaleerye ihapari sooreera ni ohimya wi: “Omwene wa wirimu ori vakhiviru!”. Tthiri owo waari muhupi woohakalaliha! Yesu Kristu, Mwene a oMesiya, aari eriyari aya. Okhala wira arummwa yaahiivahererya mmuteko wa Muluku, Yesu aahaatumererya wira aroromeleke wi Muluku aarowa waakhapelela. Siiso owo aahimenrye wira: “Mukwah’anyu, muhikuxé etthu: nari ekopo, nnákhala murupa, walá yolya hatá musurukhu. Muhikuxé malaya manli. Mwavahiwaka opuro, mukhaleke ntthoko nenlo, mpakha ovenya elapo eyo”. (Matheyo 10:5-10; Luka 9:1-6) Yehova aarowa ottittimiherya wira sootthuneya saya saakhwaniheriwe ni anaIsarayeli akhw’aya, mwaha woowi eriyari ya anaIsarayeli yaari etthu yoolema owaakhela aletto.
8. (a) Okathi vakhaani ohinatthi okhwa, nthowa xeeni Yesu aavanha awe malakiheryo masyaa a muteko woolaleerya? (b) Nlelo etthu xeeni yaatthuneya okhala nipuro noopacerya mookumi wa atthareli a Yesu?
8 Okathi vakhaani ohinatthi okhwa, Yesu aahaalopola arummwa awe mwaha woowi muhoolo awo yaarowa ovaraka muteko mmikhalelo soovirikana. Okhala wira makhulupale a elapo yaarowa olupatthaka muteko aya, awo khiyaarowa waakheliwaka wIsarayeli ntoko wanipacerya. Nave-tho, moohipisa awo yahaana oroiha mitthaka sa Omwene mmittetthe sa Amalapo. Vano, awo yaahaana okuxa “murupa” ni yoolya. Hataa vaari siiso, awo yahaana ovikaniha opacerya ophavela Omwene wa Yehova ni exariya awe, aroromelaka wira Muluku aarowa oreeliha wiimananiha waya woophavela yoolya ni yowiikhuneela.—Luka 22:35-37.
9. Moota xeeni Paulo saakunha awe Omwene opuro woopacerya mookumini mwawe vaavo vaakhapelela awe sootthuneya sawe sa werutthuni, ni miruku xeeni saavanha awe mmwaha ola?
9 Murummwa Paulo aari ntakiheryo noolokexa na mutthu yoole aavarihenle muteko miruku sa Yesu. Paulo aahipaka muteko wa orummwa okhala etthu yoopacerya mookumini mwawe. (Miteko s’Arummwa 20:24, 25) Vaavo vaarowa awe mmuttettheni olaleerya, owo aanikhapelela sootthuneya sawe sa werutthuni, mpakha ovara muteko woopaka iheema. Owo khaawehererya wira atthu akina akhapeleleke sootthuneya sawe sa werutthuni. (Miteko s’Arummwa 18:1-4; 1 aTesalonika 2:9) Masi, owo aanixukhurela waakheliwa wawe ntoko muletto ni vaavo atthu akina yooniherya aya omphenta waya anvahaka etthu. (Miteko s’Arummwa 16:15, 34; aFilipi 4:15-17) Paulo aahaatumererya maKristau wira ahooloweleke miritti saya vatthokoni mwaha woolaleerya, masi wira yeereryaniheke miritti saya soovirikana. Owo aahaatumererya ovara muteko, ophenta itthoko saya, ni waakhaliherya atthu akina. (aÉfeso 4:28; 2 aTesalonika 3:7-12) Paulo aahaalipiherya omuroromela Muluku, ohiya ororomela mihakhu, ni wira yeettiheke ikumi saya mmukhalelo wooniherya wira yaanisuwela tthiri itthu saari sootepa otthuneya. Moovarihana ni sowiixuttiha sa Yesu, eyo yaataphulela opacerya ophavela Omwene wa Muluku ni exariya awe.—aFilipi 1:9-11.
Mpaceryeke Ophavela Omwene Mookumini Mwanyu
10. Enitaphulela exeeni opacerya ophavela Omwene?
10 Okhaleke wowiira sai wiimananiha wahu waaleela atthu akina ihapari sooreera sa Omwene? Mpantta mukina, eyo enlipa ni mikhalelo sahu, ni oxukhurela wahu ni murima wotheene. Muupuweleke wi Yesu khaahimmye wira: ‘Mphaveleke Omwene mwaahikhalane etthu ekina yoovara’. Osuwelaka otthuneya wa Omwene, owo aahihimya yootthuna ya Tiithi awe, oriki: “Mpajeryeke ophavela omwene wa Muluku” moohihiyererya. (Luka 12:31) Hataa anamunceene a hiyo nitthuneyaka ovara muteko wira nikhapelele sootthuneya sahu ni sa itthoko sahu, akhala wira nookhalana nroromelo, okumi ahu wotheene onrowa ovaraka muteko wa Omwene yoowo Muluku onivanha awe. Okathi omosaru, hiyo ninrowa okhapelelaka miritti sa etthoko ahu.—1 Timótheyo 5:8.
11. (a) Moota xeeni Yesu saalikanyihenrye awe wira atthu otheene khiyaarowa okhalana mwaattelo woolikana mu olaleerya mitthaka sa Omwene? (b) Mikhalelo xeeni sinrowa wooniherya ele mutthu eniwerya awe opaka?
11 Akina a hiyo aakhalana owerya wa oviriha okathi munceene alaleeryaka ihapari sooreera sa Omwene waavikana atthu akina. Masi mu nlikanyiho nawe voohimya sa mithinto soovirikana sa etthaya, Yesu ahooniherya wira otheene yaale mirima saya siri ntoko etthaya yooloka, sinrowa wiima mihokorokho. Mwaattelo aya waarowa okhala sai? Khuta mutthu ori ni mikhalelo sawe. Iyaakha, ekumi, ni miritti sa vatthokoni sirii itthu sikina siniheliwa muhina. Masi vaavo vanixukhuru ahu ni murima wotheene, nnoowerya waakhwaniherya itthu sinceene.—Matheyo 13:23.
12. Yoolukama xeeni yooloka yomunepani amiravo anitumereriwa aya vanceene wira athokorerye?
12 Ti vooloka okhalana soolukama seiyo sinrowa onikhaliherya wuncererya muteko ahu wa olaleerya Omwene. Amiravo yaahaana wuupuwelela oratteene ntakiheryo nooloka na Timootheyo, yoowo aari mmiravo ni muKristau a nthiti. (aFilipi 2:19-22) Exeeni yaarowa otepa okhala yooloka wa amiravo ovikana okela muteko wa orummwa wa okathi wotheene, vaavo vanimaliha aya osoma oxikola? Nave-tho ale oowunnuwela anrowa ottottela mureerelo akhala wira anookhalana soolukama sooloka somunepani.
13. (a) Tanii onihimya ele hiyo aneene eniwerya ahu ovara mmuteko wa Omwene? (b) Akhala wira ninnipaceriha ophavela Omwene, exeeni enooniherya ahu?
13 Mmapuro mwa oxankiheya ni ale anoona ahu wira yaahaana opaka sinceene, nroromelo nahu nahaana oniirihaka wiimananiha wira nlokiherye mukhalelo ahu wira nimurumeele Muluku oratteene moovarihana ni mikhalelo sahu. (aRoma 14:10-12; aGalasia 6:4, 5) Ntoko sooniheriwa aya mmwaha wa Yobi, Satana onivaanyiha oriki enniiriha omurumeelaka Muluku mwaha wa nrima nahu na ophavela ophwanya mihakhu, opuha wahu, ni okhala wahu saana. Masi akhala wira tthiri ninnipacerya ophavela Omwene, hiyo ninnikhaliherya wooniherya wira Diabo nawoothe muulupale. Hiyo ninnooniherya wira ele enrwa nipuro noopacerya mookumini mwahu ti muteko wa Muluku. Orweela mwa ele enihimya ahu ni enivara ahu, hiyo ninnooniherya omphenta wahu Yehova vanceene, okhaliherya wahu moororomeleya olamulelo awe muulupale, ni waaphenta wahu apinaatamu akhw’ihu.—Yobi 1:9-11; 2:4, 5; Miruku 27:11.
14. (a) Nthowa xeeni okhalana eprograma ya olaleerya enikumiherya aya mureerelo? (b) Etthu xeeni enipaka aya Anamoona anceene wira yinnuuherye muteko aya wa olaleerya?
14 Okhalana eprograma enoowerya onikhaliherya opaka itthu sinceene sihaarowa ahu opaka mmikhalelo sikina. Mwaneene Yehova ookhalana “okathi othanliwe” wira aakhwaniherye yoolakela awe. (Okhuma 9:5; aÉfeso 1:10) Vaaweryaneyaka vale, ti vooloka othanla nihiku nimosaa aahiiso manli vasumanani wira nalaleerye. Mulaponi motheene, Anamoona a Yehova imiya ikonto sinceene aakela muteko wa opioneero wookhaliherya, amalihaka iwoora piili vanihikuni mmuteko woolaleerya ihapari sooreera. Imiya ikonto sinceene sa akina anirumeela ntoko pioneero ookilaatheya, amalihaka iwoora sowiiraka piili nnimeya vanihikuni alaleyaka mitthaka sa Omwene. Mapioneero a vameekh’aya ni mamissionaario annimaliha okathi munceenexa mmuteko wa Omwene. Nave-tho, hiyo nnoowerya ohaayasa okathi wooreerela wira moohiilokiherya nivahee onamoona wa yoolipelela ya Omwene wa khuta mutthu onrowa owiriyana. (Yohani 4:7-15) Yoophavela ahu yaahaana okhala wiirela mpantta ni murima wotheene muteko owo moovarihana ni mikhalelo sahu, ntoko Yesu saahimmye awe vahinatthi oriki: “Nave Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”.—Matheyo 24:14; aÉfeso 5:15-17.
15. Moovarihana ni orummwa ahu, nthowa xeeni vanoona anyu wira miruku siri mu 1 aKorinto 15:58 ti soovareleya muteko?
15 Moohicikha etthu sa elapo enikhala aya, Anamoona a Yehova mu elapo yotheene anniirela mpantta eparakha ela ya muteko mowiiraana. Awo annivarihela muteko miruku sowuupuxeriwa sa Biibiliya soowi: “Mutepeke okelela oholo mmutekoni mw’Apwiya vohihiyererya, musuwelaka wira wilipiherya wanyu khahiyó w’ethiru vamaithoni v’Apwiya”.z—1 aKorinto 15:58.
Makoho Oowuuluula
• Vaavo Yesu vaahimmye awe wira nvikaniheke ‘opajerya ophavela omwene wa Muluku’, etthu xeeni yoonihenrya awe wira yaahaana okuhiwa nipuro na nenli?
• Tuuvi waatthuneya okhalaka moonelo ahu voohimya sa okhapelela sootthuneya sahu sa werutthuni ni sa itthoko sahu? Muluku onrowa onivaha nikhaliheryo xeeni?
• Mikhalelo xeeni sa muteko wa Omwene siniwerya ahu ovara?
[Elatarato eri epaaxina 107]
Khuta elapo, Anamoona a Yehova olelo va annilaleerya ihapari sooreera, wanikisa ohinatthi ophiya