Elapo Esyaa Moovarihana ni Natiri a Muluku
BIIBILIYA, Masuu oolempwa a Muluku, anninivaha nlipelelo vaavo vanihimya aya wira: “Vano hiyo ninniwehererya erimu esyá n’ilapo esyá, eryaya-mo exariya, ntoko sihimyalyawe Muluku”.—2 Pedru 3:13.
“Erimu esyá” exeeni? Biibiliya onivaraanyiha erimu ni olamulelo. (Miteko 7:49) “Erimu esyá” erii ekuvernu esyaa yeeyo enrowa olamulelaka elapo ya vathii. Ela eniihaniwa okhala esyaa mwaha woowi enrowa orantteliha mukhalelo wa olamulelo wa vano; nave-tho nrii nivalo nsyaa na omwaakhwaniherya natiri a Muluku. Orii Omwene yoole Yesu iixuttinha awe wira nivekeleke. (Matheyo 6:10) Okhala wira Muluku tokhanle Mpattuxa ni onikhala wirimu, ekuvernu eyo eniihaniwa okhala ‘omwene wa wirimu’.—Matheyo 7:21.
‘Elapo esyá’ exeeni? Khahiyo eplaneta esyaa ya Elapo ya Vathii, mwaha woowi Biibiliya onniiwanyeiha wira elapo ya vathii enrowa okhaliwaka moohimala. ‘Elapo esyá’ orii mukhalelo musyaa wa atthu. Ela enrowa okhala esyaa mwaha woowi atthu ootakhala murima anrowa opwetexiwa. (Miruku 2:21, 22) Nto atthu otheene akumi anrowa omuttittimiha ni omwiiwelela Mpattuxa ni anrowa okhalaka moovarihana ni soovekela sawe. (Esalimo 22:28) Vano atthu a maloko otheene annilattuliwa wira yiixutte soovekela iyo ni wataaniha ikumi saya moovarihana ni soovekela iyo. Nyuwo munnipaka eyo?
Mu elapo esyaa ya Muluku, ori otheene onrowa ottittimihaka olamulelo wa Muluku. Niireke wira omphenta wanyu Muluku onniwiirihani omwiiwelela owo? (1 Yohani 5:3) Vatee vanyu vannooniherya wiiwelela soovekela sa Muluku? Hataa omutekoni aahiiso oxikola? Ni moota oneettiha anyu okumi anyu?
Mu elapo eyo esyaa, atthu anrowa wataana mu omukokhorela Muluku eekeekhai. Nyuwo munnimukokhorela oPattunxe erimu ni elapo ya vathii? Okokhorela wanyu onniwaataanihani ni anamakokhorela akhw’inyu a ilapo sotheene, maloko otheene, ni ilavulelo sotheene?—Esalimo 86:9, 10; Yesaya 2:2-4; Sofoniya 3:9.
[Ekaaxa/eri epaaxina 17]
Muluku Yoowo Oleihenrye Itthu Iya
Muluku oleihenrye itthu iya orii Mpattuxa a irimu sowooneya ni eplaneta ya Elapo ya Vathii. Ti yoowo aahimmwale ni Yesu Kristu okhala “Muluku mmosáru èkekhai”.—Yohani 17:3.
Apinaatamu anceene anaattittimiha amuluku yaapanke aya mmensaya. Atthu imilyau sene anuuramela ohoolo wa ilatarato sihirina okumi. Akina anivuwiha malokiheryo aapinaatamu, muupuwelo woosiveliwa itthu sa werutthuni, aahiiso soophavela sa awo aneene. Hataa yaale anihimya wira annimweettela Biibiliya khahiyo wira otheene annittittimiha nsina na yoole Biibiliya onimuhimya awe okhala “Muluku mmosáru èkekhai”.—Yohani 17:3.
Mpattuxa mwaneene onihimya so: “Miyo ti Yehova. Nna nsina naka”. (Yesaya 42:5, 8, NM) Nsina na Muluku naaniphwanyaneya mBiibiliya ikwaha soowiiraka 7.000 mu ilavulelo saarumeeliwa okathi waalempwa Biibiliya. Yesu Kristu aahiwiixuttiha atthareli awe wira avekeleke so: “Tith’ihu, muri wirimu! Nsina nanyu nivuwihiwe”.—Matheyo 6:9.
Tiivi mikhalelo sa Muluku eekeekhai? Owo onnihimya mmensawe okhala ntoko “òmoriwa ikharari ni òvilela, òpisa onanariwa, òrera murima ni òroromeleya” ni okhala ntoko ole ohinliyala omuhukhumu otheene yoole ohiniiwelela moolakela sooruma sawe. (Okhuma 34:6, 7) Waathokorerya wawe apinaatamu okhuma khalai onnooniherya masuu awo okhala eekeekhai.
Nsina, ni mwaneene nsina nno, ohaana othokoreriwa ntoko ootteela. Ntoko Mpattuxa ni Mwene a Mapuro Otheene, owo toniphwanelela wiiweleliwa ni okokhoreliwa ni hiyo moomalela. Nyuwo aneene munnimwiiwelela ni omukokhorela owo?
[Ekaaxa/Elatarato eri epaaxina 18]
“Erimu Esyá N’ilapo Esyá” Sinrowa Oruuha Murukunuxo Xeeni?
Elapo ennipakiwa okhala eParayiisu Luka 23:43, NM
Wuuraana moophenta wa atthu a ilapo sotheene, Yohani 13:35;
maloko otheene, ilavulelo sotheene Wisupulula 7:9, 10
Murettele mapuro otheene, ovareleleya wa atthu Esalimo 37:10,
11; otheene Mikeya 4:3, 4
Muteko woohakalaliha, yoolya yinceene Yesaya 25:6; 65:17, 21-23
Omalihiwa wa iretta, oriipiwa murima ni Yesaya 25:8;
okhwa Wisupulula 21:1, 4
Wuuraana wa elapo yotheene mu omukokhorela Muluku eekeekhai Wisupulula 15:3, 4
[Ekaaxa/Ilatarato siri epaaxina 19]
Nyuwo Munrowa Ottottela Muraarelo?
Muluku khonootha!—Tito 1:2.
Yehova onihimya wira: ‘Molumo [aka] . . . khantthikela-tho wa miyo ehivanre muteko aya, ehirale itthu sintthunaka, ehimalihenrye sarumalyaka’.—Yesaya 55:11.
Yehova oopaka “erimu esyá n’ilapo esyá”. Ekuvernu ya wirimu yoopacerya ovara muteko. Mathipelo a ‘elapo esyá’ aatikitheriwa.
Nuumala ohimya sa itthu sootikiniha seiyo “erimu esyá n’ilapo esyá” enrowa aya waaruuhela apinaatamu, Muluku, Mwene a Mapuro Otheene, onniiromola mu Wisupulula oriki: “Mone: itthu sothene miyo kokhaliha isyá! Siso-tho ahikihimerya wira: Mulepe itthu ila, okhala wira molumo aka t’òroromeleya ni t’èkekhai”.—Wisupulula 21:1, 5.
Nikoho nootthuneya ti nna: Nyuwo munnipaka mirukunuxo sootthuneya wira muphwanelele okhala mu ‘elapo esyá’ vathii va “erimu esyá”?