Muruu Wa Namuloko Neethanu Neeraru
Obatizo ni Wataana Wanyu ni Muluku
Obatizo wa eKristau oniiriwa sai?
Mavalo xeeni munitthuneya anyu opaka wira mphwanelele obatiziwa?
Mutthu oniivahererya sai wa Muluku?
Nthowa xeeni na vameekh’aya ninwiirihani obatiziwa?
“MÀSI t’ala: enkikhottiha obatiziwa exeni?” Nikoho nno naapakiwe eseekulu yoopacerya ni murumeyi muulupale a wEthiopia. MuKristau iihaniwa Filipe aahimooniherya wira Yesu aari Mesiya aaleiheriwe. Mwaha wa osiveliwa ni ele yiixuntte awe mwa Soolepa, eyo yaahimwiiriha mulopwana ole a wEthiopia ohimya wira aaphavela obatiziwa!—Miteko s’Arummwa 8:26-36.
2 Akhala wira muhiixutta saana miruu sivinre sa eliivuru ela mukhaliheriwaka ni Namoona a Yehova, nyuwo pooti wiikoha wira: ‘Enkikhottiha obatiziwa exeni?’ Vano nyuwo moomusuwela natiri a Biibiliya voohimya sa okumi woohimala mParayiisu. (Luka 23:43, NM; Wisupulula 21:3, 4) Nave-tho, nyuwo muhiixutta ekeekhai voohimya sa mukhalelo wa alipa-ookhwa ni nlipelelo na ohihimuwa. (Musuweli 9:5; Yohani 5:28, 29) Waaniheryasa nyuwo munnirowa omithukumanoni sa Anamoona a Yehova oSalau waya ni mooweha mmensinyu moota awo aneettela aya etiini yekeekhai. (Yohani 13:35) Vootepa otthuneya, nyuwo moopacerya wunnuuherya wataana wanyu ni Yehova Muluku.
3 Munrowa wooniherya sai wira muniphavela omurumeelaka Muluku? Yesu aahaaleela atthareli awe wira: “Murowé, mwawixuttiheke atthu a maloko othene, mwabatizaka”. (Matheyo 28:19) Yesu mwaneene ootikitherya ntakiheryo obatiziwaka mmaasini. Owo khahiyo wira aakattheliwe maasi, nnakhala wiittheliwa maasi vamuruu vawe. (Matheyo 3:16) Nsuu noowi “obatizo” mu nuulumo na eKriki nintaphulela “opwinihiwa”. Vanonto, obatizo wa eKristau ontaphulela opwinihiwa, aahiiso oxuweiwa moomalela mmaasini.
4 Obatiziwa mmaasini etthu enivekeliwa aya otheene yaale aniphavela wataana ni Yehova Muluku. Obatiziwa opuro ori atthu anceene onooniherya yoophavela anyu ya omurumeela Muluku. Ela enooniherya wira munnisiveliwa opaka yotthuna ya Yehova. (Esalimo 40:7, 8) Vanonto, wira mphwanelele obatiziwa, nyuwo muhaana waakhwaniherya itthu sinivekeliwa.
OSUWELA NI WAAMINI TI WOOTTHUNEYA
5 Nyuwo muhaakhwaniherya nivalo noopacerya. Moota xeeni? Mwaha woowi moomusuwela Yehova Muluku ni Yesu Kristu, waaniheryasa orweela mwa yoosoma yootthokihiwa ya Biibiliya. (Yohani 17:3) Masi sookhala itthu sinceene sinitthuneya anyu wiixutta. MaKristau ahaana okhalana ‘osuwela vomalela otthuna wawe [Muluku]’. (aKolosi 1:9) Orowa omithukumanoni sa Anamoona a Yehova erii yookhaliherya yuulupale mmwaha ola. Orowa mithukumano iyo etthu yootthuneya. (aHéberi 10:24, 25) Ohicompela mithukumano iyo onimookhaliheryani wuncererya omusuwela wanyu Muluku.
6 Masi, wira mphwanelele obatiziwa khahiyo wira munitthuneya osuwela itthu sotheene siri mBiibiliya. Murumeyi muulupale a wEthiopia aanisuwela itthu sikina, masi aahitthuneya okhaliheriwa wira iiwexexe mipantta sikina sa Biibiliya. (Miteko s’Arummwa 8:30, 31) Moolikanasa, nlelo nyuwo muhaana wiixutta itthu sinceene. Mwekeekhai, nyuwo munrowa ovikanihaka wiixutta itthu sikina voohimya sa Muluku. (Musuweli 3:11) Nto, muhinatthi obatiziwa, nyuwo muhaana wiixutta ni weemererya sowiixuttiha soopacerya sa Biibiliya. (aHéberi 5:12) Sowiixuttiha iyo sinihela muhina osuwela ni weemererya ekeekhai voohimya sa mukhalelo wa alipa-ookhwa, otthuneya waya osuwela nsina na Muluku ni Omwene awe.
7 Okhalana osuwela paahi khomphiyerya, tthiri, “khavo mutthu onwerya omusiveliha Muluku, ahaminiki”. (aHéberi 11:6) Biibiliya oninleela wira vaavo atthu a muttetthe wa oKorinto a khalai vaiwaly’aya mitthaka sa eKristau, awo “yahamini, khubatiziwa”. (Miteko s’Arummwa 18:8) Moolikanasa, yoosoma ya Biibiliya yohaana owiirihani waamini wira Biibiliya, ti Nuulumo nuupuxeriwe ni Muluku. Yoosoma ya Biibiliya yohaana wookhaliheryani owaamini anatiri a Muluku ni okupali owerya wa mukuttho wowoopola a Yesu.—Yoxuwa 23:14; Miteko s’Arummwa 4:12; 2 Timótheyo 3:16, 17.
MWALEELEKE ATTHU AKINA EKEEKHAI YA BIIBILIYA
8 Vaavo waamini vaninnuwa aya vamurimani vanyu, nyuwo munrowa woonaka okhala woovila ohaaleela atthu akina ele yiixuntte anyu. (Yeremiya 20:9) Waamini iwo onrowa owiirihakani ophavela vanceene waaleela atthu akina voohimya sa Muluku ni soolakela sawe.—2 aKorinto 4:13.
9 Mooreerela murima, nyuwo pooti opacerya waaleela ekeekhai ya Biibiliya amus’inyu, apatthan’inyu, oowaattamana anyu, ni apatthani oomutekoni. Moovira wa okathi, nyuwo munrowa ophavelaka olaleerya moovarihana ni marehereryo anipakiwa ni Anamoona a Yehova. Mwaphiya nivalo nna, mukhalee ootaphuwa omuleela Namoona yoowo oniwiirihani yoosoma ya Biibiliya. Akhala wira munniphwanelela olaleerya ni Anamoona akina, anoopakiwa marehereryo wira nyuwo vamosaa ni ole onoosomihani Biibiliya mukumane ni axitokweene anli a mmulokoni.
10 Ela enrowa wookhaliheryani waasuwela saana axitokweene akina a eKristau, yaawo ari amakampusi a ipwittipwitthi sa Muluku. (Miteko s’Arummwa 20:28; 1 Pedru 5:2, 3) Akhala wi axitokweene ala animoona wira munniiwexexa ni munnikupali sowiixuttiha soopacerya sa Biibiliya, munneettela malamulo a Muluku, ni mwekeekhai muniphavela okhala mmosaa a Anamoona a Yehova, awo anrowa woleelani wira munniphwanelela wiirela mpantta muteko woolaleerya ntoko namalaleerya oohibatiziwa a ihapari sooreera.
11 Axitokweene ala pooti woona wira munitthuneya opaka mirukunuxo sikina ni ohiya soolema sikina mookumini mwanyu wira mphwanelele olaleerya ni Anamoona a Yehova. Mirukunuxo iyo pooti ohela muhina ohiya soolema seiyo mwiira anyu muhooniwaka ni atthu akina. Tthiri, muhinatthi ovekela okhala namalaleerya oohibatiziwa, munitthuneya ohiya soottheka suulupale, ntoko orupihana woohiloka, ohapaliwa, ni olya mirette sootakhala.—1 aKorinto 6:9, 10; aGalasia 5:19-21.
OTTHARUWA NI ORUKUNUXA MURIMA
12 Muhaana opaka mavalo makina muhinatthi ophwanelela wira mbatiziwe. Murummwa Pedru aahimmye wira: “Murukunuxe [aahiiso ottharuwa] mirima sanyu, muhokolowele wa Muluku, wira sittipihiwe itampi sanyu”. (Miteko s’Arummwa 3:19) Ottharuwa ontaphulela wiikhupanyerya mwekeekhai mwaha wa itthu soohiloka sipanke anyu. Tthiri, ottharuwa etthu yootthuneya akhala wira mutthu owo aarina mweettelo woohiloka, nave-tho ti wootthuneya hataa mutthu yoole waaniheryasa aarina mweettelo wooloka. Nthowa xeeni? Nthowa noowi apinaatamu otheene toottheka ni anitthuneya oleveleliwa ni Muluku. (aRoma 3:23; 5:12) Muhinatthi omusoma Biibiliya, nyuwo khimwaasuwela tiivi yaari yotthuna ya Muluku. Vanonto, mwaarowa oweryaka sai okhala moovarihana ni yotthuna awe? Tivonto, ottharuwa etthu yootthuneya.
13 Ottharuwa wohaana otthareliwa ni ‘orukunuxa murima’. Nyuwo muhaana opaka itthu sikina ohiya paahi wiikhupanyerya. Nyuwo muhaana okhootta mweettelo wa okumi anyu wa khalai ni olakela wira okhuma vano orowa ohoolo, munrowa opakaka ele eri ya xariya. Ottharuwa ni orukunuxa murima arii mavalo ootthuneya yaawo munitthuneya anyu waakhwaniherya muhinatthi obatiziwa.
WIIVAHERERYA WA MULUKU
14 Nookhala nivalo nikina nootthuneya munitthuneya anyu waakhwaniherya muhinatthi obatiziwa. Nyuwo muhaana wiivahererya wa Yehova Muluku.
15 Vaavo vaniivahererya anyu wa Yehova Muluku munivekelo nnikhuma vamurimani vanyu, nyuwo munimmana natiri oowi muniphavela omurumeela owo paahi mahiku otheene. (Otumererya 6:15) Vano, nthowa xeeni mutthu vaniphavela awe opaka eyo? Saana, nkahaya mmuupuwelele mulopwana omonne muthiyana ni onaphavela omuthela. Vaavo vanisuwela awe sinceene sa owo ni onaweha wira ookhalana mikhalelo sooloka, osiveliwa wawe onootepaka wuncerereya. Moovira wa okathi, mulopwana owo onoomuleela wira oniphavela omuthela. Mwekeekhai, othela onoomuruuhela miritti sikina. Hataa vari siiso, osiveliwa onrowa omwiiriha ophavela othela.
16 Okathi onimusuwela anyu ni omphenta Yehova, nyuwo munrowa ophavelaka omurumeela moomalela aahiiso oheemererya etthu ekina wookhoottiheryani omukokhorela owo. Khuta mutthu yoole oniphavela omutthara Mwaana a Muluku, Yesu Kristu, ohaana ‘wikhotta mwanene’. (Marko 8:34) Wiikhootta hiyo aneene ontaphulela oheemererya wira soophavela aahiiso soolukama sahu sinikhoottiherye omwiiwelela Muluku moomalela. Ti maana aya, muhinatthi obatiziwa, opaka yotthuna ya Yehova Muluku, yohaana okhala etthu yuulupale mookumini mwanyu.—1 Pedru 4:2.
MUNOOWERYA OXINTTA WOOVELELA OBATIZIWA
17 Atthu akina annoovelela wiivahererya wa Yehova mwaha woowi awo anoova ahaakhwaniherya nivalo nno nuulupale. Awo pooti woova okhalana muritti ohoolo wa Muluku mwaha wowiivahererya ntoko muKristau. Yoovaka ohaakhwaniherya enivekela obatizo ni othananiha murima wa Yehova, awo anuupuwela wira fataari ohiivahererya wa Muluku.
18 Vaavo vaniixutta anyu omphenta Yehova, nyuwo munrowa ophavela wiivahererya wa owo ni okhalaka moovarihana ni wiivahererya iwo. (Musuweli 5:4) Nuumala wiivahererya, mwekeekhai nyuwo munrowa ophavelaka “wetta ntoko simphwanelaya atthu Àpwiya, mwasivelihaka Apwiya mwa itthu sothene”. (aKolosi 1:10) Mwaha wa omphenta wanyu Muluku, nyuwo khamunrowa woonaka okhala vooxankiha opaka yotthuna awe. Moohaaniherya nyuwo munrowa waakhulela ele ehimmye murummwa Yohani, wira: “Nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”.—1 Yohani 5:3.
19 Khahiyo wira munitthuneya okhala oomalela oloka wira mwiivahererye wa Muluku. Yehova onnisuwela otteettheya wanyu ni khonkhala-khala olipelelaka etthu ehinwerya anyu opaka. (Esalimo 103:14) Owo oniphavela wira mukhumele saana ni onrowa woxeereryani ni wookhaliheryani. (Yesaya 41:10) Nyuwo munoowerya okupali wira akhala wi munimuroromela Yehova ni murima anyu wotheene, owo ‘onolokiha iphiro sanyu’.—Miruku 3:5, 6.
MOONIHERYE WIIVAHERERYA WANYU MBATIZIWAKA
20 Wuupuwelela itthu seiyo sinimala ahu othokorerya, pooti wookhaliheryani wira mwiivahererye wa Yehova munivekelo. Tthiri, khuta mutthu yoowo onimphenta Muluku, ohaana ‘ohimya wamini wawe oholo w’atthu, [wira] ophwanye wòpowa’. (aRoma 10:10) Nto munooniherya sai wiivahererya wanyu ohoolo wa atthu?
21 Mmuhimeerye mutokweene onihoolela muloko wira muniphavela obatiziwa. Owo onrowa opaka marehereryo wira axitokweene a muloko owo yookoheeni makoho yaawo anihela muhina sowiixuttiha soopacerya sa Biibiliya. Akhala wira axitokweene ala annaakhulela wira munniphwanelela obatiziwa, awo anrowa woohimeeryani wira munrowa obatiziwa wakhumelela okathi.a Mwaha onitthokiherya sa yootaphulela ya obatizo, moolimaleleya onniiriwa okathi ene yoowo. Nto, mulipa-oolavula mwaha onnaalattula otheene aniphavela obatiziwa wira yaakhule makoho manli ookhweya, ntoko ephiro emosaa ya ‘ohimya wamini waya oholo w’atthu’.
22 Obatizo tonooniherya ohoolo wa atthu wira nyuwo muhiivahererya wa Muluku ni wira vano murii mmosaa a Anamoona a Yehova. Ale aniphavela obatiziwa annipwinihiwa mmaasini moomalela, yooniheryaka ohoolo wa atthu wira ahiivahererya wa Yehova.
YOOTAPHULELA YA OBATIZO ANYU
23 Yesu aahimmye wira awiixutti awe yaarowa obatiziwaka “ni nsina n’Atithi ni na Mwana ni n’Eroho Yowarya [“munepa wootteela”, NM]”. (Matheyo 28:19) Ela enitaphulela wira ole oniphavela obatiziwa onnisuwela okhulupale wa Yehova Muluku ni wa Yesu Kristu. (Esalimo 83:18; Matheyo 28:18) Nave-tho owo onnisuwela muteko onivara aya munepa wootteela aahiiso ikuruu soowerya sa Muluku.—aGalasia 5:22, 23; 2 Pedru 1:21.
24 Masi, obatizo khontaphulela opwinihiwa mmaasini paahi. Onithoonyerya etthu ekina yootthuneya vanceene. Opwinihiwa mmaasini onithoonyerya okhwa mmweettelo anyu wa okumi wa khalai. Okumihiwa mmaasini onithoonyerya wira vano nyuwo mwaakumi wira mpakeke yotthuna ya Muluku. Nave, muupuweleke wira nyuwo muhiivahererya wa Yehova Muluku, ohiya mwaha wa muteko, mwaha woophavela olokiherya itthu mulaponi, mwaha wa apinaatamu akina, aahiiso mwaha wa mulokiheryo. Wiivahererya wanyu ni obatizo ipacereryo sa omwaattamela Muluku, eyo piiyo, wataana wanyu n’uwo.—Esalimo 25:14.
25 Obatizo khontaphulela woopowa wa mutthu. Murummwa Paulo olempe so: ‘[Nvikaniheke] ovarela muteko wopowa wanyu n’umuttittimiha Muluku ni wova’. (aFilipi 2:12) Obatizo ipacereryo paahi. Vano nikoho ti nna: Munrowa ovikaniha sai okhala moophentani mwa Muluku? Muruu ookiserya onrowa waakhula nikoho nna.
[Footnote]
a Obatizo oniira mpantta wa malokiheryo anipakiwa khuta mwaakha okathi wa mithukumano sa mittetthe ni mithukumano suulupale siniiriwa ni Anamoona a Yehova.
ELE BIIBILIYA ENIIXUTTIH’AWE
▪ Obatizo wa eKristau onihela muhina opwinihiwa moomalela mmaasini, ohiya okattheliwa maasi paahi.—Matheyo 3:16.
▪ Mavalo aniroiha w’obatizoni anipacerya ni okhalana osuwela ni wooniherya waamini onitthareliwa ni ottharuwa, orukunuxa murima, ni wiivahererya wa Muluku.—Yohani 17:3; Miteko s’Arummwa 3:19; 18:8.
▪ Ntoko siisaale atthu akina yiikhoottaly’aya wira amutthare Yesu, nyuwo muhaana wiikhootta mmensinyu wira mwiivahererye wa Yehova.—Marko 8:34.
▪ Obatizo ontaphulela ohiya mweettelo wa okumi wa khalai nto khinakuxa mweettelo musyaa wira mpakeke yotthuna ya Muluku.—1 Pedru 4:2.
[Study Questions]
1. Nthowa xeeni murumeyi muulupale a wEthiopia vaavekenle awe obatiziwa?
2. Nthowa xeeni munitthuneya anyu wuupuwelela saana voohimya sa obatizo?
3. (a) Yooruma xeeni Yesu yaavanha awe atthareli awe? (b) Obatiziwa mmaasini oniiriwa sai?
4. Obatiziwa mmaasini onitaphulela exeeni?
5. (a) Nivalo xeeni noopacerya nnimwiiriha mutthu ophwanelela obatiziwa? (b) Nthowa xeeni mithukumano sa eKristau siry’aya sootthuneya?
6. Itthu xeeni sa mBiibiliya munitthuneya anyu osuwela wira mphwanelele obatiziwa?
7. Yoosoma ya Biibiliya yohaana owiirihani waamini exeeni?
8. Exeeni enrowa owiirihakani waaleela atthu akina ele yiixuntte anyu?
9, 10. (a) Wanipacerya, tanii anrowa anyu waleelaka ikeekhai sa mBiibiliya? (b) Muhaana opaka exeeni akhala wira muniphavela olaleeryaka moovarihana ni marehereryo anipakiwa ni Anamoona a Yehova?
11. Mirukunuxo xeeni atthu akina anitthuneya aya opaka ahinatthi ophwanelela okhala namalaleerya?
12. Nthowa xeeni vary’aya vootthuneya ottharuwa?
13. Orukunuxa murima ontaphulela exeeni?
14. Nivalo xeeni munitthuneya anyu waakhwaniherya muhinatthi obatiziwa?
15, 16. Wiivahererya wanyu wa Muluku ontaphulelanii, nto exeeni enimwiiriha mutthu opaka ela?
17. Nthowa xeeni atthu akina anoovelela aya wiivahererya wa Muluku?
18. Exeeni enrowa owiirihani wiivahererya wa Yehova?
19. Nthowa xeeni vahintthuneya anyu woovaka wiivahererya wa Muluku?
20. Nthowa xeeni wiivahererya wa Yehova ohinivikaniha aya okhala mwaha a wiiphiini?
21, 22. Munrowa ‘ohimya [sai] wamini wanyu oholo wa atthu’?
23. Ontaphulela exeeni obatiziwa “ni nsina n’Atithi ni na Mwana ni n’Eroho Yowarya [“munepa wootteela”, NM]”?
24, 25. (a) Obatizo onithoonyerya exeeni? (b) Nikoho xeeni nnitthuneya waakhuliwa?
[Picture on page 180]
Osuwela saana Nuulumo na Muluku nrii nivalo nuulupale wira mphwanelele obatiziwa
[Picture on page 180]
Waamini ohaana owiirihani waaleela atthu akina ele enikupali anyu
[Picture on page 180, 181]
Niireke wira muhiivahererya toko wa Muluku munivekelo?
[Picture on page 181]
Obatizo ontaphulela ohiya mweettelo wa okumi ahu wa khalai nto khinakuxa mweettelo musyaa wira nipakeke yotthuna ya Muluku