“Elapo Yotheene ya Vathi”

1. Itthu xeeni saawiiranenle makristau a okathi wa arummwa ni siniwiiraneela Anamoona a Yehova olelo-va?

AWO yaanikhalela nthiti olaleerya. Vamurimani vaya, yaanoona wiira yaahaana otthara malakiheryo ni okhaliheriwa ni munepa woowaarya. Olupatthiwa khiwaawiirinhe ohiya olaleerya. Nave Muluku aanaareeliha vanceene. Itthu iyo sootheene saahiwiiraneela makristau a okathi wa arummwa ni sinniwiiraneela Anamoona a Yehova olelo-va.

2, 3. Itthu xeeni sa efaita siniromoliwa eliivuru ya Miteko?

² Tthiri soowiiraneya silempwale eliivuru ya Miteko sinnoolipihani ni sinnilipiha waamini wanyu. Eliivuru ela ennihimya miteko sinceene, maana eliivuru emosa paahi enihimya moota yaapacenrye aya ekristau.

³ Eliivuru ya Miteko ennaaromola atthu 95, ilapo 32, isidade 54 ni isisiro 9. Yoowiiraneya yoovara murima enaaromola atthu, atthu yaawo yaari ntoko hiyo, atthu akina yaavarexexa etiini aya, ahooleli a epoliitika oowiixinnuwiha, ni yaalupattha vanceene makristau. Masi etthu yootepa okhala ya efaita, eliivuru ya Miteko ennooniherya miteko sa axinnihu okathi wa arummwa. Nnaamwi yaarina mixankiho, awo khiyaahiyale okhalela nthiti olaleya ihapari sooreera.

4. Xeeni murummwa Paulo, Tabitha ni anamoona akina oororomeleya a khalai annilipiha aya?

⁴ Soovira iyaakha sinaattamela 2.000 okhuma vaavale murummwa Pedru, Paulo, meetiku oophentiwa Luka, mulipa-oovaha Baarnaba, mulopwana oolipa murima Siteefano, muthiyana oovaha Tabitha, muthiyana oowaakhela aletto Lidia ni atthu akina oororomeleya yaavanre aya miteko sa Muluku. Hata sivinre ene iyaakha sinceene, awo anninlipiha vanceene. Mwaha wa xeeni? Mwaha woowi nirina muteko mmosaru wowaapaka awiixutti. (Math. 28:19, 20) Eparakha yuulupale ovara muteko ola!

5. Ilapo xeeni awiixutti a Yesu yaavanre aya muteko aya woolaleerya?

⁵ Muhiliyale muteko Yesu aavanhe awe atthareli awe. Owo aahimmye so: “Nyuwo munoophwanya ikuru okathi munrowa anyu waakhela munepa woowaarya. Nto munrowa okhala anamoona aka oYerusalemu, oYudeya ni oSamariya wotheene, ni elapo yotheene ya vathi”. (Mit. 1:8) Wanipacerya, munepa woowaarya waahaavaha ikuru awiixutti wiira alaleerye “oYerusalemu”. (Mit. 1:1–8:3) Moottharelana, alakiheriwaka ni munepa woowaarya, awo yaamulaleerya “oYudeya ni oSamariya wotheene”. (Mit. 8:4–13:3) Nuumala-vo, awo yaahipacerya olaleya ihapari sooreera “elapo yotheene ya vathi”. — Mit. 13:4–28:31.

6, 7. Okathi ninvara ahu muteko woolaleerya, itthu xeeni nirina ahu axinnihu a okathi wa arummwa yahaarina aya?

⁶ Annihu a eseekulu yoopacerya, khiyaarina iliivuru sootheene sa Soolempwa Soowaarya wiira arumeeleke okathi woolaleerya. Mpakha mwaakha 41 nuumala Kristu orwa, khiyaakhanle Evangelyo ya Matheyo. Okathi ole saakhanle paahi ipaphelo vakhaani sa murummwa Paulo seiyo saalempwale ehinatthi omalihiwa olempwa eliivuru ya Miteko mwaakha 61 nuumala Kristu orwa. Nto vannooneya wiira makristau a okathi wa arummwa khiyaarina Biibiliya aya. Nave khiyaarina iliivuru sinimutthokiherya Biibiliya wiira yaavaheke atthu ale yaaphavela ihapari sooreera. Ekeekhai wiira makristau ayuda yaaniiwa sisommwaka Soolempwa Soowaarya musinagoga ahinatthi okhala awiixutti a Kristu. (2 aKor. 3:14-16) Hata vari siiso, awo yaahaana okhalela nthiti osoma, mwaha woowi vanikhala ntoko wiira soolepa iyo yaahaana ohela mmuru.

⁷ Olelo-va, anamunceene a hiyo nookhalana Biibiliya ahu ni iliivuru sinceene sinimutthokiherya Biibiliya. Ninnaapaka awiixutti nilaleyaka ihapari sooreera ilapo 240 ni mattaava manceene.

Okhaliheriwa ni Weettihiwa ni Munepa Woowaarya

8, 9. a) Munepa woowaarya waakhalihenrye opaka exeeni awiixutti a Yesu? b) Okhaliheriwaka ni munepa woowaarya, murumeyi oororomeleya onipaka exeeni?

⁸ Okathi Yesu aavahe awe awiixutti awe muteko woolaleerya, owo aahaaleela wiira: “Nyuwo munoophwanya ikuru okathi munrowa anyu waakhela munepa woowaarya”. Akhaliheriwaka ni munepa woowaarya aahiiso ikuru sa Muluku, atthareli a Yesu yaarowa olaleeryaka elapo yootheene. Tthiri, akhaliheriwaka ni munepa woowaarya, Pedru ni Paulo yaanaapenuxa atthu, woomola malaikha ootakhala ni waahihimuxa atthu yaakhwiiye! Masi ikuru yaavahiwe aya ni munepa woowaarya, sahaakhaliherya ovara muteko wa efaita yinceene. Muteko ene tuula: Waahiwiiriha arummwa ni awiixutti akina waaleela atthu akina ekeekhai eniphwanyiha okumi woohimala. — Yoh. 17:3.

⁹ Nihiku na Pentekoositi a 33 nuumala Kristu orwa, awiixutti a Yesu yaahipacerya “olavula mattaava oovirikana, siisaale munepa owo waawiiriha aya olavula”. Nto eyo, yaahaakhaliherya olaleya “miteko suulupale sa Muluku”. (Mit. 2:1-4, 11) Olelo-va, hiyo khaninlavula mattaava oovirikana mwa mwiiriirya. Masi, okhaliheriwaka ni munepa woowaarya, murumeyi oororomeleya onnipaka iliivuru sinimutthokiherya Biibiliya mattaava manceene ohela muhina irevista Owehaweha ni Nvenye!, seiyo khula mweeri sinikumiheriwa imilyau sinceene. Nave esaiti ahu jw.org yookhalana iliivuru sinimutthokiherya Biibiliya ni iviidiyu sinivikana mattaava 1.000. Itthu iyo sootheene, sinninikhaliherya waalaleerya “miteko suulupale sa Muluku” atthu a ilapo sootheene, maloko ni mattaava ootheene. — Wiis. 7:9.

10. Okhuma mwaakha wa 1989, muteko xeeni onivariwa wa omutaphulela Biibiliya?

¹⁰ Okhuma mwaakha wa 1989, murumeyi ororomeleya onniimananiha vanceene omukumiherya Biibiliya a Elapo Esya a Soolempwa Soowaarya mattaava manceene. Biibiliya owo ootaphuleliwa mattaava anivikana 200 ohimpirimiriwa ikoopiya imilyau sinceene ni muhoolo sinimwimpirimiriwa ikoopiya sa mattaava manceene. Tthiri Muluku paahi ni munepa awe woowaarya tonikhaliherya wiimananiha iwo okhumela saana.

11. Muteko xeeni onivariwa ni Anamoona a Yehova a otaphulela?

¹¹ Muteko wootaphulela iliivuru sinimutthokiherya Biibiliya onnivariwa ni makristau oowiivahererya ilapo sinivikana 150. Eyo khennitikiniha, maana khokhanle mutthenkeso mukina valaponi oneettihiwa ni munepa woowaarya wiira ‘olaleeryeke oratteene’ olumwenku wootheene ihapari sooreera sa Yehova Muluku, Omwene awe wa omesiya ni Omwene wa wiirimu yoowo opacenrye ovara muteko! — Mit. 28:23.

12. Etthu xeeni yaamukhaliherya Paulo ni makristau makina ovara muteko aya woolaleerya?

¹² Okathi murummwa Paulo aalalenrye awe ayuda ni ale yaatthara soowiixuttiha sa ayuda ni ale yahaakhanle ayuda wAntiyokiya wa oPisidia, “otheene ale yaarina murima wooloka wira yaakhele okumi woohimala, yaahaamini”. (Mit. 13:48) Luka onnimaliha eliivuru ya Miteko ohimyaka wiira Paulo “anaalaleerya atthu awo Omwene wa Muluku, . . . ohoovaka etthu, ni ohikhoottiheriwaka ni mutthu”. (Mit. 28:31) Opuro xeeni murummwa ole aalaleerya awe? Owo aalaleerya oRoma, ekapitaali ya epotensia ya olumwenku wootheene ya okathi ole! Hata alavulaka mwaha aahiiso alaleeryaka mwa inamuna sikina, awiixutti oopacerya a Yesu, yaahiimananiha vanceene ovara muteko aya woolaleerya akhaliheriwaka ni ovahiwa malakiheryo ni munepa woowaarya.

Ovilela Hata Nilupatthiwaka

13. Xeeni ninreerela ahu ovekela okathi ninlupatthiwa ahu?

¹³ Okathi awiixutti oopacerya a Yesu yaalupatthiwa aya, awo yaaninvekela Yehova wiira aavahe olipa murima. Etthu xeeni yaakhumelela? Awo yaanisareya munepa woowaarya ni yaanilipihiwa wiira alaleyeke nuulumo na Muluku ahoovaka etthu. (Mit. 4:18-31) Hiyo nave ninninvekela Muluku wiira onivahe ankhili ni ikuru wiira nihihiye olaleerya hata nilupatthiwaka. (Yak. 1:2-8) Khaninhiya olaleerya mwaha woowi ninnireelihiwa ni Muluku ni okhaliheriwa ni munepa woowaarya. Okathi ninlupatthiwa ahu, nihaana ovekela munepa woowaarya, ankhili ni olipa murima wiira nilaleye ihapari sooreera. — Luka 11:13.

14, 15. a) Etthu xeeni yaakhumelenle mwaha wa olupatthiwa waakhumelenle “nuumala wiiviwa Siteefano”? b) Mahiku ahu ala, atthu anceene a oSibéria yiixuntte sai ekeekhai?

¹⁴ Ohinatthi wiiviwa ni awanani awe, Siteefano aahaalaleerya moolipa murima. (Mit. 6:5; 7:54-60) Okathi wa “olupatthiwa vanceene” waakhumelenle okathi ole, awiixutti ootheene waahiya paahi arummwa, yaahitthyawela oYudeya ni oSamariya. Masi olupatthiwa iwo khiwaakhoottihenrye olaleerya. Filipe aahirowa oSamariya “omulaleya Kristu”, nto eyo yaahikumiherya mireerelo sinceene. (Mit. 8:1-8, 14, 15, 25) Nave Biibiliya onihimya wiira: “Nuumala wiiviwa Siteefano, awiixutti akina yaahipacerya ohaaxiwa. Tivo, ale yaatthyanwe yaahirowa oFeniisia, oKiipero ni wAntiyokiya. Masi awo yaalaleerya ihapari sooreera ayuda paahi. Nto akina yaahikhuma oKiipero ni oKirene, anarowa wAntiyokiya. Weiwo, yaahipacerya ovaanela ni atthu yaalavula ekereku, yaalaleeryaka ihapari sooreera saamuhimya Pwiya Yesu”. (Mit. 11:19, 20) Okathi ole, olupatthiwa waahikhaliherya omwara-mwara ilapo sinceene muhupi wa Omwene.

¹⁵ Mahiku ahu ala, etthu emosaru yaahiiraneya wUnião Soviética wa khalai. Otepexa wene iyaakha sa 1950, Anamoona a Yehova anceene yaahiroihiwa oSibéria ni yaahimwara-mwariwa mittetthe sinceene. Nto, ihapari sooreera saanilaleiwa mapuro manceene a elapo ele. Khivaarowa oweryaneya Anamoona a Yehova ophwanya musurukhu oniphiyerya weetta mukwaha wa ikiloomo 10.000 arowaka olaleya ihapari sooreera. Masi kuvernu aahaaroiha mapuro manceene a elapo ele. Munna mmosa ohimmye so: “Nuuvira okathi, makhulupale ale yaahikhaliherya vanceene wiira atthu a murima saana a oSibéria yiixutte ekeekhai”.

Oreelihiwa Vanceene ni Yehova

16, 17. Itthu xeeni siri eliivuru ya Miteko sinooniherya wiira Yehova aanireeliha muteko woolaleerya?

¹⁶ Moohaanyiherya, makristau a okathi wa arummwa yaanireelihiwa ni Yehova. Paulo ni atthu akina yaanaala ni okhuwari, “masi Muluku, aahiiriha wunnuwa”. (1 aKor. 3:5, 6) Irelatoorio silempwale eliivuru ya Miteko, sinnooniherya wiira oreelihiwaka ni Yehova muteko woolaleerya waanikela vahoolo ni okhumela saana. Mwa ntakiheryo, “nuulumo na Muluku naanitepa omwara-mwareya, nave nummuru na awiixutti naamutepa wuncerereya oYerusalemu”. (Mit. 6:7) Okhala wiira muteko waanikela vahoolo, “awiixutti otheene a oYudeya, ni oGalileya ni oSamariya, yaanikhala ni murettele, ni yaanilipihiwa. Okathi yooniherya aya omoova [wekeekhai] Yehova, ni yaakhala aya alipihiwaka ni munepa woowaarya, awo yaanitepa wuncerereya”. — Mit. 9:31.

¹⁷ Elapo ya wAntiyokiya wa oSiria, ayuda ni atthu yaalavula ekereku yaahiiwa ekeekhai alaleeriwaka ni anamoona olipa murima. Biibiliya onihimya so: “Nave-tho, Yehova aanaakhaliherya, vano atthu anceene yaahaamini, anamutthara Pwiya”. (Mit. 11:21) Olavulaka okela vahoolo ni okhumela saana muteko woolaleerya esidade ele, Biibiliya onihimya so: “Nuulumo na Yehova naanitepa omwara-mwareya, nave atthu anceene yaanaamini”. (Mit. 12:24) Okathi Paulo ni atthu akina yaalaleerya aya atthu yahaakhanle ayuda waatepa aya wunnuwa, “ni owerya wa Yehova, nuulumo nawe naanitepa omwara-mwareya ni okhalana ikuru”. — Mit. 19:20.

18, 19. a) Ninsuwela sai wiira ‘Yehova onninikhaliherya’? b) Nvahe matakiheryo anooniherya wiira Yehova khonaanya-nyala arumeyi awe.

¹⁸ Moohaanyiherya, olelo-va ‘Yehova onninikhaliherya’. Eyo ti etthu eniwiiriha atthu anceene weemererya ekeekhai ni wooniherya wiivahererya waya wa Muluku apatisiwaka. Ohiya-vo, Muluku tonnikhaliherya ovilela olupatthiwa vanceene, ikwaha sikina olupatthiwa iwo onniviha vanceene, masi okathi owo khaninhiya olaleerya ntoko Paulo ni makristau makina a okathi wa arummwa yaahaahiyale aya olaleerya okathi yaalupatthiwa aya. (Mit. 14:19-21) Okathi wootheene Yehova khonihiya onikhaliherya. Okhala wiira owo tori ‘nlipiheryo nahu’ onninikhaliherya moohaawani mwahu mootheene. (Otum. 33:27) Muhiliyale wiira mwaha wa nsina nawe noowaarya, Yehova khonikhala-khala aanyanyalaka atthu awe. — 1 Sam. 12:22; Esal. 94:14.

¹⁹ Nwehe yoowiiraneya ya emusi ya munna Harald Abt. Okhala wiira owo khaahiya olaleerya, manazista yaahimuroiha mapuro yaavariwa muteko mookhanyereriwa oSachsenhausen okathi wa Ekhotto ya Nenli ya Olumwenku Wootheene. Mweeri wa Maio a 1942, mapoliisia a Gestapo, yaahirowa etthoko ya mwaarawe aihaniwa Elsa ni yahaakuxa anaawe aaxithiyana. Awo yaahaaroiha mapuro oovirikana yaavariwa muteko mookhanyereriwa. Murokora Elsa ohimmye so: “Iyaakha kivirinhe aka kiri ene mapuro yaavariwa muteko mookhanyereriwa, makhulupale a wAlemanha aakiixuttiha etthu ya efaita yinceene. Etthu ene tiila: Munepa wa Yehova onninikhaliherya ni onilipiha wiira nivilele hata nilupatthiwaka vanceene! Kihinatthi otthukiwa, kaahisoma ekarta ya murokora mmosa yaahimya wiira okathi ninlupatthiwa ahu vanceene, munepa wa Yehova onninikhaliherya omaaleleya. Kuupuwela wiira murokora ole aamutepiha. Masi okathi kaalupatthiwa aka vanceene, kaahoona wiira etthu aahimmye awe yaari ekeekhai. Eyo ti etthu eniiraneya. Pooti oxankihaka wuupuwela eyo akhala wiira mutthu khotonko olupatthiwa vanceene. Masi eyo ti etthu ekiiranenle”.

Muhihiye Olaleerya Oratteene!

20. Paulo aapaka exeeni okathi aatthukweliwe awe ni eyo enaalipiha sai anna ni arokora akina?

²⁰ Eliivuru ya Miteko enimala murummwa Paulo okhalelaka nthiti ‘waalaleerya atthu Omwene wa Muluku’. (Mit. 28:31) Okhala wiira aatthukiwe vatthokoni, owo khaarowa olaleerya mmaitthokoni oRoma. Hata vaari siiso, Paulo aanaalaleerya atthu ootheene yaarowa opuro aari awe. Olelo-va, anna ni arokora akina khaniwerya okhuma owaani mwaha wa oretta onaawereya, woonasa wene arimumpaathi aahiiso anikhala ipa anikhapeleliwa atthu oowuuluvala aahiiso aniwereyasiwa. Hata vari siiso, omphenta waya Muluku ni ophavela waya olaleerya onnilipa ni khonimala. Ninnaavekelela anna ni arokora awo ni ninninvekela Tiithi ahu a wiirimu wiira aakhaliherye waaphwanya atthu aniphavela omusuwela yena ni itthu oniphavela awe.

21. Xeeni ninreerela ahu ovara muteko woolaleerya moowaakuveya?

²¹ Anamunceene a hiyo ninniwerya olaleerya mmaitthokoni ni okhaliherya inamuna sikina sa waapaka awiixutti. Nto ootheene ahu niimananiheke ovara muteko ahu woolaleya Omwene, niirelaka mpantta muteko woolaleerya “elapo yotheene ya vathi-va”. Muteko owo, ohaana ovariwa moowaakuveya, maana “ethooneryo” ya otthika wa Kristu ennooneya oratteene. (Math. 24:3-14) Nihaana orumeela oratteene okathi ahu. Okhuma niinaano-va, “mukhalaneke muteko munceene munaavarela anyu Apwiya”. — 1 aKor. 15:58.

22. Nilipelelaka nihiku na Yehova, etthu xeeni nlakenle ahu opaka?

²² Nlipelelaka ophiya “nihiku n’Apwiya, nihiku nenlo nulupale ni novuwa”, nihaana olaleerya moolipa murima ni moororomeleya. (Yow. 3:4) Nlelo nnimwaaphwanya atthu ari ntoko ale oBereya, yaawo ‘yaaphavela vanceene waakhela nuulumo na Muluku’. (Mit. 17:10, 11) Nto nihihiye olaleerya mpakha oleeliwa wiira: “Muhiira saana, murumeyi ooloka ni oororomeleya!” (Math. 25:23) Akhala wiira nnookhalela nthiti ovara mpantta ahu muteko woowiixuttiha atthu ni ohihiya ororomeleya wa Yehova, nnoohakalalaka mahiku ootheene mwaha wookhalana eparakha ya wiirela mpantta muteko wa olaleya ‘oratteene Omwene wa Muluku’!