Tiivi Eri Yoolakela ya Muluku wa Elapo ya Vathi?

1. Exeeni emwiirinhe Muluku opattuxa elapo ya vathi?

Yehova aahipattuxa elapo khwaavaha Adamu ni Eva. Tivonto valaponi topuro ahu. Masi, Adamu ni Eva, khiyaapakiwe wira ekhaleke wiirimu, maana Muluku iira opattuxale ene malaikha wira ekhaleke wiirimu. (Yobi 38:4, 7) Muluku aahimpweha Adamu mparayiisu valaponi yiihaniwa exardim ya wEdeni. (Maphattuwelo 2:15-17) Yehova aahaavaha Adamu ni anaaya, mukhalelo wa okumi wooloka wira akhaleke mahiku otheene valaponi.​—Musome Esalimo 37:29; 115:16.

Wuupaceryani eparayiisu yaari oxardim wa wEedeni paahi. Adamu ni Eva yahaana waasarya anaaya elapo yotheene. Nto, awo yaarowa okhapelelaka elapo ni opaka okhala eparayiisu. (Maphattuwelo 1:28) Elapo ya vathi khenrowa onyaanyiwa. Apinaatamu anrowa okhalaka valaponi mahiku otheene.​—Musome Esalimo 104:5.

Nwehe eviidiyu Exeeni Emwiirinhe Muluku Opattuxa Elapo ya Vathi?

2. Xeeni elapo ehikhanle aya eparayiisu vano?

Adamu ni Eva khiyamwiiwelenle Muluku, tivonto Yehova aahiwoomola oxardim ya wEdeni. Awosa yaahiyeleela eParayiisu, nto khuuvo pinaatamu owenrye ottikiherya. Biibiliya onihimya so: ‘elapo yovahereriwa mmatatani mw’atakhali’.​—Yobi 9:24.​—Musome Maphattuwelo 3:23, 24.

Niireke wira Yehova oohiya yoolakela awe ele yoopacerya? Nnaari! Owo, Muluku oowerya sotheene. Khanooceela etthu. (Yesaya 45:18) Owo onooreeriha itthu wira apinaatamu akhaleke ntoko saalakenle awe wuupaceryani.​—Musome Esalimo 37:11, 34.

3. Eparayiisu enrowa ottikiheriwa sai?

Eparayiisu enrowa ottikiheriwa valaponi vaavo Yesu vanrowa awe olamulelaka ntoko Mwene. Okathi wa ekhotto ya Harmagedoni, Yesu onrowa ohoolela malaikha a Muluku wira epwetexiwe awanani a Muluku. Nuumala vo, Yesu onrowa omutthukwa Satana iyaakha 1.000. Masi atthu a Muluku, anrowa woopowa okhala wira Yesu onrowa waakhapelela. Atthu awo, anrowa okhala oohakalala mParayiisu valaponi.​—Mmusome Wisupulula 20:1-3; 21:3, 4.

4. Ohaawa onrowa omala silini?

Muluku onrowa omaliha silini otakhala valaponi? Yesu aahivaha “ethonyeryo” yaarowa wooniherya wira wanikisa onnaattamela. Itthu siniireya vano mulaponi sinnaahaaxa apinaatamu, masi sinnooniherya-tho wira ninkhala wanimaliha ‘wa olumwenku’.​—Mmusome Matheyo 24:3, 7-14, 21, 22.

Okathi wa olamulelo wa Yesu wa iyaakha 1.000 oryeene wiirimu, owo onrowa omaliha ohaawa wotheene. (Yesaya 9:5, 6; 11:9) Nnaamwi oryeene Mwene, Yesu onrowa-tho orumeela ntoko Mukhulupale aNamukuttho wira amalihe itampi sa atthu animphenta Muluku. Orweela mwa Yesu, Muluku onrowa omaliha iretta, wuuluvala, ni okhwa.​—Mmusome Yesaya 25:8; 33:24.

5. Tani anrowa okhala mParayiisu onirwa?

Atthu animwiiwelela Muluku tanrowa okhala mParayiisu. (1 Yohani 2:17) Yesu aahaaruma awiixutti awe orowa owaavya atthu oowiimaaliha ni owiixuttiha moota wowaataana ni Muluku. Olelo-va, Yehova onnaatthokiha atthu imilyau sinceene wira yakhaleke mParayiisu valaponi. (Sofoniya 2:3) Arumeelaka Isalau sa Omwene sa Anamoona a Yehova, atthu anniixutta moota wookhalihana saana vatthokoni. Anamuyari ni anaaya, animukokhorela Muluku hoothe wira ettottele mureerelo ihapari sooreera.​—Mmusome Mikeya 4:1-4.