Niireke alipa-ookhwa anookhala-tho akumi tthiri?

ELE BIIBILIYA ONIHIMYA AWE

Atthu akhwiiye anrowa ‘ohihimuwa mokhwani’.​—Miteko 24:15, Biblia Solempwa Sowarya.

ELE ENITAPHULELA AYA WA NYUWO

Ophwanya yoomaaliha okathi onikhwa awe ole onimphenta anyu.​—2 aKorinto 1:3, 4.

Otaphuwa voohimya sa woova okhwa mootepana.​—aHéberi 2:15

Nlipelelo neekeekhai na otthikela okumana ni ale munaaphenta anyu akhwiiye.​—Yohani 5:28, 29.

NNOOWERYA TTHIRI OKUPALI ELE BIIBILIYA ONIHIMYA AWE?

Aayo, mwaha wa mathowa mararu:

• Muluku topattuxale ekumi. Biibiliya onnimuromola Yehova okhala ‘Mpattuxa a èkumi’. (Esalimo 36:10; Miteko 17:24, 25) Tthiri ole opattuxale itthu sotheene sirina okumi, ookhalana owerya woottikiherya okumi wa ale akhwiiye.

• Muluku aahaahihimuxa atthu yaakhwiiye khalai. Biibiliya onnilavula sa ohihimuxiwa wa atthu 8, ohela muhina amiravo, atthu aalupale, alopwana ni athiyana, yaawo yaattikiheriwe okumi valaponi-va. Akina yaavirinhe okathi vakhaani nuumala okhwa, masi mmosa aahiviriha mahiku maxexe oryeene mmahiye!​—Yohani 11:39-44.

• Muluku onniphavela tthiri waahihimuxa ale akhwiiye. Yehova onninyokha okhwa; owo onnimoona naakhwa ntoko nwanani. Owo onniphavela tthiri omuxintta nwanani owo vaavo onirowa awe waahihimuxa atthu akhwiiye. Owo onniphavela waattikiherya okumi ale ari mmuupuweleloni mwawe ni waaweha aryeene-tho akumi valaponi.​—Yobi 14:14, 15.