Rebeka Aahiphavela Omuhakalaliha Yehova

Rebeka aari muthiyana amphenta Yehova. Aiyawe Rebeka yiitthaniwa Isakhi. Nave, Isakhi aanimphenta Yehova. Rebeka aamusuwenle sai Isakhi? Nto aamuhakalalinhe sai Yehova? Nrowe niixutte itthu sikina voohimya sa Rebeka.

Tiithi awe Isakhi aitthaniwa Abrahamu; nto maama awe aitthaniwa Sara. Awo yaakhala elapo ya oKanani, weiwo atthu yahaamwiiwelela aya Yehova. Abrahamu aaphavela wira mwanawe omuthele muthiyana aamwiiwelela Yehova. Nto, aahimuruma murumeyi awe, waaniheryasa Eliyezeri, wira amphavele muthiyana aarowa otheliwa ni Isakhi. Muthiyana owo aakhala muttetthe wa oHarani, weiwo amusi akina a Abrahamu yaakhala aya.

Eliyezeri aaheetta mukwaha ni arumeyi akina a Abrahamu. Owo waari mukwaha wootteiva vanceene. Awo yaahivenya ni ikamelo 10 akunxe ene yoolya ni itthu yaarowa aya ovaha. Nto Eliyezeri aarowa omusuwela sai muthiyana ooreerela otheliwa ni Isakhi? Okathi Eliyezeri ni arumeyi akina yaaphiyale aya oHarani, yaaheemela veehimeni. Eliyezeri aahisuwela wira moohipisa atthu yaamoorwa orika maasi. Nto owo aahinvekela Yehova wira: ‘Mwali onrowa aka onvekela maasi wira kiwurye; nto akivaha masi vamosa ni inama saka, yoowo akhale mwali othanliwe ni nyuwo’.

Moohipisa, mwali Rebeka aahiphiya veehimeni. Biibiliya onihimya wira owo aari ooreera vanceene. Nto Eliyezeri aahinvekela maasi oowurya. Vano Rebeka aahaakhula wira: ‘Aayo, kinimoovahani. Kinoorika-tho maasi, wira kivahe ikamelo sanyu’. Muupuwele! Ikamelo iye saahivoliwa ntthona vanceene. Nto Rebeka aahitthikela orika maasi veehimeni ikwaha sinceene. Niireke nyuwo munnoona valataratoni moota Rebeka oniimananiha awe?— Eliyezeri aahitikinihiwa oweha moota Yehova aakhunle awe nivekelo nawe.

Nuumala-vo, Eliyezeri aahinvaha Rebeka itthu sinceene sooreera. Rebeka aahimwiirela Eliyezeri ni arumeyi yaarina awe orowa vatthokoni va emusi awe. Eliyezeri aahihimya ele aarummwale awe ni Abrahamu ni moota Yehova aakhunle awe nivekelo nawe. Nto emusi ya Rebeka yaahihakalala wira owo okhale mwaara a Isakhi.

Munoonela sai, niireke Rebeka aaniphavela otheliwa ni Isakhi?— Rebeka aahisuwela wira Eliyezeri aarummwale ni Yehova. Tivonto, vaavo amusi awe yaamukonhe aya akhala wira owo aaniphavela orowa oKanani wira atheliwe ni Isakhi, aahaakhula wira: ‘Kinnitthuna, aayo!’. Moohipisa, owo aahimutthara Eliyezeri. Nuumala ophiya oKanani, owo aahitheliwa ni Isakhi.

Rebeka aahireelihiwa mwaha woomuhakalaliha Yehova. Muhoolo mwaya, Yesu aayariwe emusi yeele! Nto, akhala wira munoomutakiha Rebeka ni omuhakalaliha Yehova, owo onirowa wooreelihani.